Mi Simna 36
36
Pasal nei Numeite ii Ngamhluana
1Joseph ii tapa ahi Manasseh ii tupa, Machir ii tapa le Gilead bee le phung sung innkuan lutang teng sia, Moses le lampui dangte kungah pai hi. 2Amate in, “Topa in ngam le lei Israel mite tungah lai meetang sawk a hawmsak tu in note thu hong pia hi. Ama in no tungah ka suapuipa uh Zelophehad ii neisa teng a tanute piak natu in thu hong pia si hi.#Mi 27:7 3Ahizong a tanute in nam dang taw a kiteang le, a neisate tua nam dangte neisa suak tu a, ko ii nga tu theampo kikhiam tu ahi sia phawk vun. 4Kipiak kikna Jubilee kumin, a kizuaksa theampo a nei ciilte tungah a kipiak kik ciang, Zelophehad tanute neisa sia a teenna nam ii neisa belapna hi paisuak tu a, ko nam ii supna hi tu hi,” ci uh hi.
5Tua ahiciang Moses in Israel mite tungah Topa ii Thupiak om bangin thupia sawn hi. Ama in, “Manasseh namte ii a ci teng maan hi. 6Tua ahiciang Topa in Zelophehad tanute in a dei po teenpui thei tu hi, ahizong amate nam sung pan bek hi tu hi, ci hi. 7Israel mi peuma ii neisate ama ii nam sungah kip tu hi. 8Israel nam khat sungah ngamhlua numei peuma in tua nam sung pan pasal khat teenpui hamtang tu hi. Tu a bangin Israel mikim in a taanghpupite neisa teng lua tu a, 9nei le lam sia minam khat pan nam dang khat tung theng ngawl tu hi. A neisate a nam tek in neisuak tu uh hi,” ci hi.
10-11Tua ahiciang Zelophehad tanute, Mahlah, Tirzah, Hoglah, Milcah le Noah te in Moses tungah Topa thupiak bangin a suapui sealhte teenpui uh hi. 12Amate in Joseph tapa Manasseh nam ii bee le phungte taw kiteang uh a, a neisate a pa ii nam sungah kip hi.
13Hite sia Jericho khua pan Jordan Ngun ngalkhat Moab zaangtam ah Topa ii Moses tungtawnin a piak Israel mite zui tu ngeinate ahi hi.
Currently Selected:
Mi Simna 36: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
