Mi Simna 34
34
Ngam le Lei ii Ngamngite
1 Topa in Moses tungah, 2Israel mite atu in a nuai a hilnate pia hi: “Keima kong piak Canaan ngamsung na tum uh ciang na ngamngi uhte a nuai a bang hi tu hi. 3Thangsang ngamngi sia Zin duisung pan kipan tu a, Edom ngamngi dung zui in pai tu hi. Nisuana sang ngamngi sia Tuipi Thi thangsang mong pan kipan tu hi. 4Tuaciang thangsang zuan in Akrabbim Mualciangh sangah kotin Zin kaantan suak tu a, thangsang Kadesh Barnea dong kipee hi. Tuaciang nitumna saksang zuan in Hazar Addar ah paito a, Azmon dong hi tu hi, 5tua mun pan Egypt ngamngi kuam sangah kot tu a, Mediterranean ah tawp tu hi.
6“Nitumna sang ngamngi sia Mediterranean Tuipi hi tu hi.
7“Saksang ngamngi sia Mediterranean pan Hor Mual dong kithung tu a, 8tua mun pan Hamath Mualciangh dong hi tu hi. Tuasia Zedad le 9Ziphron dong paisuak in Hazar Enan ah tawp tu hi.
10“Nisuana sang ngamngi sia Hazar Enan pan Shepham dong kithung tu hi. 11Tuasia Ain ii nisuana, thangsang ah a om Harbel ah pai tu a, Galilee Tuili vaalbo nisuana sang mualte tungah pai in, 12tuaciang Jordan ngun zui in thangsang Tuipi Thi dong hi tu hi.
Hite sia na ngam king li ii ngamngi hi tu hi,” ci hi.
13Tua ahiciang Moses in Israel te tungah, “Hi ngam sia Topa in nam kua le langte tungah a piak ngam hi a, lai meetang sawkin na nga tu uh hi. #Mi 26:52-56 14Reuben le Gad namte le nisuana sang Manasseh nam a khenlangte in, 15Jordan ngun langkhat nisuana sang Jericho ngalkhat ah amate innkuante taw kizui in ngam hawm siat zo uh hi,” ci hi. #Jos 14:1-5
Ngam Hawmna ah Vaipuak nei Lampuite
16 Topa in Moses tungah, 17“Thiampi Eleazar le Nun tapa Joshua in mipite atu in ngam hawmsak tu hi. 18Ngam hawmna ah amate hu tu in, a nam sim pan lampui khat veu teal in,” ci hi. 19-28Hite sia Topa ii teal mite hi:
| Anam | Lampui |
|---|---|
| Judah | Jephunneh ii tapa Caleb |
| Simeon | Ammihud ii tapa Shelumiel |
| Benjamin | Chislon ii tapa Elidad |
| Dan | Jogli ii tapa Bukki |
| Manasseh | Ephod ii tapa Hanniel |
| Ephraim | Shiphtan ii tapa Kemuel |
| Zebulun | Parnach ii tapa Elizaphan |
| Issachar | Azzan ii tapa Paltiel |
| Asher | Shelomi ii tapa Ahihud |
| Naphtali | Ammihud ii tapa Pedahel |
29Hi mite sia Canaan ngam ah Israel mite atu neisa hawm tu in Topa sawlte ahi hi.
Currently Selected:
Mi Simna 34: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
