Mi Simna 27
27
Zelophehad ii Tanute
1Joseph tapa Manasseh, Manasseh tapa Machir, Machir tapa Gilead, Gilead tapa Hepher, Hepher tapa, Zelophehad ii tanute sia Mahlah, Noah, Hoglah, Milcah le Tirzah te ahi hi. 2Amate pai in Moses, thiampi Eleazar, lampuite le taangpi bup ii mai, Topa ompuina Puanbuk kongbiang ah ding a, 3“Ka pa uh in tapa nei ngawlin duisung ah hong thi san hi. Ama sia Topa a langpan Korah ii nungzuite sungah kihel ngawl a; ama mawna hangin thi hi. 4Tapa a nei ngawl hu bekin ka pa ii min banghangin Israel sung pan bo tu ziam? Kote ii pa ii mealheakte taw in ko zongh ngamh hong pia tavun,” ci hi.
5Moses in amate thu Topa tungah ko a, 6tuaciang Topa in, 7“Zelophehad tanute ii ngetna maan hi; a pa mealheakte taw in ngamh piakhawm in. A pa ngamh amate in lua tahen.#Mi 36:2 8Pasal khat in tapa nei ngawlin a thi ciang a tanu in a neisa lua tu hi, ci in Israel mite son in. 9Ama in tanu a nei buale ama ii suapui pate in lua tu hi. 10Ama in suapui pa a nei buale, a pa ii suapui pate in lua tu hi. 11Ama in suapui pa ahibuale papi, pano a nei buale a bee kuungbel khat in lua tu a, ama ii neisa suak hi. Hi thu sia Keima Topa ii kong thupiak hi a, Israel mite zui tu thukham ahi hi,” ci hi.
Moses a lai tu in Joshua Kiteal
(Thuhil kikna 31:1-8)
12 Topa in Moses tungah, “Abarim Mualte tungah kaato in a, Israel te ka piak tu ngam le lei sia ngal et in. 13Tuasia na mu zawkciang na suapuipa Aaron thi bangin na thi tu hi, 14banghang ziam cile Zin duisung ah kong thupiak sia noma ngeal in nong langpan uh hang hi. Meribah ah Israel taangpi bup in keima hong phutsat lai in, a thiangtho ka vaangletna amate mai ah ahi tubangin nong saang nuam bua uh hi,” ci hi. (Meribah sia Zin duisung Kadesh khua ah a om ciktui naak ahi hi.) #Thkna 3:23-27; 32:48-52
15Moses thungen a, 16“Nuntakna theampo ii naak ahi Topa Pathian awng, 17na mipite tuucing nei ngawl tuute bang ahi ngawl natu in a lampui thei tu le ngal kisimna ah thu a pia thei tu mihing khat nong tealsak natu in, thu kong ngen hi,” ci hi. #1 Kum 22:17; Eze 34:5; Mt 9:36; Mk 6:34
18 Topa in Moses tungah, “Kicinna a nei Nun tapa Joshua sam in, a lu tungah na khut nga in.#Pu 24:13 19Thiampi Eleazar le taangpi bup mai ah ama dingsak in a, amate theampo ii mai ah nangma hong laih a hina thu thangsak in. 20Israel taangpi bup in a thu a nit thei natu in, na thuneina pawlkhat ama pia in. 21Joshua in thiampi Eleazar suang tu a, Eleazar in keima deina a heak natu in Urim le Thummim zangh tu hi. Tuabangin Joshua le Israel taangpi bup sia thu theampo ah Eleazar in vaihawm tu hi,” ci hi.#Pu 28:30; 1 Sa 14:41; 28:6 22Topa thupiakna bangin Moses in seam hi. Ama in Thiampi Eleazar le taangpi bup mai ah Joshua dingsak hi. 23Topa thupiak bangin Moses in Joshua lu tungah a khut nga in, ama a laih a hina thu thangsak hi. #Thkna 31:23
Currently Selected:
Mi Simna 27: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
