Mi Simna 25
25
Peor ah Israel Mite
1Israel te Acacia Kuam ah ngiaphual a saat lai in, pate in tua munah a om Moab numeite khialpui uh hi. 2Tua numeite in Moab pathian a kibiakna mun sangaw biakpiakna poai ah amate sam uh hi. Israel te in an ne in, 3Peor ii Baal pathian bia uh hi. Tua ahikom amate tungah Topa thin uuk a, 4Moses tungah, “Israel lampui theampo sam in a, ka thu nong nitna in suntangin amate thatlum siat in, tua hile a mite tungah ka thin uuk nawn ngawl tu hi,” ci hi. 5Moses in uliante tungah, “Note khat simin na nam sungah Peor ii Baal pathian a bia teng peuma thatlum tu nu hi,” ci hi.
6Moses le Israel taangpi bup khuangai in Topa ompuina Puanbuk kongbiang ah kapin a om laitak, amate mu tangin Israel te khat in Midian numei khat ama puanbuk sungah tumpui hi. 7Tua thu Eleazar tapa, thiampi Aaron tupa, Phinehas in a mu ciang a kikhopna pan dingin pusuak hi. Ama in tei khat la a, 8tua pa le tua nu ii nung pan zui in Puanbuk sungah a nii in khawlet hi. Hi bangin Israel te tungah a tung natsiatna sia kivengsak a, 9ahizong mihing 24,000thisak zo hi.
10 Topa in Moses tungah, 11“Phinehas ngamtatna hangin Israel mite tungah ka thin a uk nawn bua hi. Ama in keima simngawl Pathian dang biak tu peuma a dei ngawlpa hi a tua thu hangin thin uuk hi kaleng amate ka mon bua hi. 12Tua ahiciang maisang hun theampo ah a kip tu thuciamna khat Phinehas taw ka vawt tu sia ama tungah son in, 13Kei hong demte peuma saang ngawl a, Israel te ii mawmai sakna zongh piangsak ahikom ama le a suan a paalte thiampi kiseamsak top hi,” ci hi.
14Midian numei taw thalup a thuak khawm Israel sia pa ii min Zimri hi a, Simeon nam sung pan innkuan lutang sia Salu tapa ahi hi. 15Tua numei min sia Cozbi ahi hi. A pa sia Zur hi a, Midian bee le phung honkhat ii ukpi ahi hi.
16 Topa in Moses tungah, 17“Midian te sim in a, mon in, 18banghang ziam cile Peor ah note hong theamin a tatsiat uh hang le Peor ah natsiatna a tun lai in a kithatlum Cozbi hang ahi hi,” ci in thupia hi.
Currently Selected:
Mi Simna 25: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
