Mi Simna 23
23
1Balaam in Balak tungah, “Hi lai ah biaknatau sali kei atu in hong vawtsak ta'n a, khuital sali le tuutal sali hong paipui ta'n,” ci hi.
2A ci bangin Balak in seam a, ama le Balaam in biaknatau sim ah khuital khat le tuutal khat veu pia uh hi. 3Tua zawkciang Balaam in Balak tungah, “Topa in kei hong mu nuam ziam hong mu nuam ngawl ziam, pai in ka na et laanin, nang na meihal biakpiakna hui ah na ding zii in. Ama ii kei tungah hong pualaakna babangin kong son kik tu hi,” ci hi. Tuaciang Balaam sia mualdawn ah ama nguak kaato a, 4Pathian taw kimu hi. Balaam in Topa tungah, “Biaknatau sali ka vawt a tuate tungah khuital khat le tuutal khat veu biakpiakna in ka pia zo hi,” ci hi.
5 Topa in Balaam tungah, Balak atu a kam vaithak teng a son tu in heak kik sak hi. 6Tua ahiciang ama heak kik a Balak, a meihal biakpiakna hui ah Moab lampui theampo taw ding khawm lai sia mu hi.
7Balaam in hi kamsaanna pualaak hi:
“Moab kumpipa Balak in
Syria pan, nisuana mualte panin
hong paipui hi.
Balak in, ‘Hong pai ta'n a,
kei atu in Israel mite haamsiat in’ hong ci hi,
8Pathian ii haamsiat ngawl sia
bangbang haamsiat thei tu a,
Topa ii a ci ngawl po
bangbang kei lalsak na thu son tu khi ziam?
9Suangpi saang tung pan
amate ka mu thei a;
Mualtung pan amate ka en thei hi.
Amate minam khat in nungta bek a;
Minam dangte sangin
thupha a nga zawkna thu amate in he uh hi.
10Israel suan le paalte
leivui bangma hi a —
a phakza sim tu tamleih lawlawm hi.
Pathian mite khat bangin
ka ni ka hunte hong bosak ta'n a;
Mihing thutakte bangin
nuam takin hong thisak ta'n.”
11Tua zawkciang Balak in Balaam tungah, “Kei tungah bang hong vawt ni ziam? Hi lai ah ka ngalte haamsiat tu in kong paipui a, ahizong amate thupha na pia pumsai hi,” ci hi.
12Ama in, “Topa ii son tu a hong sawl teng bek son thei khi hi,” ci in zo hi.
Balaam ii a Niivei Kamsaanna
13Tuasia zawkciang Balak in Balaam tungah, “Israel te pawlkhat bek na mu thei natu mundang khat ah hong zui ta'n. Tua mun pan amate hong haamsiatsak ta'n,” ci hi. 14Ama in Balaam sia Zophim lo sung Pisgah Mualdawn ah paipui hi. Tua mun zongh ah ama in biaknatau sali vawtin tua tungah khuital khat le tuutal khat veu biakpiakna in pia hi.
15Balaam in Balak tungah, “Na meihal biakpiakna hui hi sungah na ding in a, tua munah Pathian taw ka na kimu tu hi,” ci hi.
16 Topa sia Balaam taw kimu a, a kam vaithak teng a son zawkciang Balak tungah a son tu in ciasak kik hi. 17Tua ahiciang ama heak kik a, Balak meihal biakpiakna hui ah Moab lampuite taw dingkhawm lai sia mu hi. Topa in bang hong ci ziam ci in Balak in dongh a, 18Balaam in hi kamsaanna pualaak hi:
“Zippor ii tapa Balak awng
hong pai ta'n,
Kong son tu thute hong ngai ta'n.
19Pathian sia a leilot thei
mihingte taw kibang ngawl a;
Ama sia a thin a kheal papai
mihing hi ngawl hi.
A kamciamna babang seam a;
A pau bangin taangtung hi.
20Thupha pia tu in hong kisawl a,
Pathian in thupha a piak ciang
ka khealsak kik thei bua hi.
21Israel te mai sangah
bangma kaamsiatna
ahibuale ngimna a thuak tu
ka mu kholsak bua hi.
Topa a Pathian in
amate ompui a;
Ama sia a kumpipa hi
ci in thangsak uh hi.
22Pathian in Egypt pan
amate pusuapui a;
Ama in ngam khuital khat
bangin amate panpui hi.
23Israel minam langpan natu
a kizangh thei
bum ahizong, ai ahizong
om ngawl hi.
Tu in mihingte in
Israel te thu son tu a,
‘En vun Pathian nasepna paw!’ ci tu uh hi.
24Israel minam sia
a thahat tawpi khat taw kibang a:
A sa matte ii sa,
balneen in a valh mateng,
A chi a dawn mateng in,
tawlnga ngawl hi.”
25Tua zawkciang Balak in Balaam tungah, “Israel mite haamsiat tu nong nial a, tua ahile amate thupha pia heak ka lam in!” ci hi.
26Balaam in, “Topa hong sawl theampo a seam tu ka hisia hong son zo hi ngawl khi ziam?” ci in zo hi.
Balaam ii A thumvei Kamsaanna
27Balak in, “Hong pai ta'n, mundang khat ah kong paipui tu hi. Tua mun pan kei atu in, amate na haamsiat tu Pathian in hong oai zongh hi thei tha tu hi,” ci hi. 28Tua ahiciang Balak in sennealngam a ki ensuk theina Peor Mualdawn ah Balaam paipui hi. 29Balaam in Balak tungah, “Hi lai ah biaknatau sali kei atu in sa in a, khuital sali le tuutal sali kei atu hong paipui ta'n,” ci hi. 30Ama ci bangin Balak in seam a, khuital khat le tuutal khat veu biaknatau khat sim tungah biakpiakna in pia hi.
Currently Selected:
Mi Simna 23: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
