Mi Simna 21
21
Canaan te a Zawna
1Canaan ngam thangsang ah a om Canaan mi Arad ngam ii kumpipa in Israel te Atharim lam tawnin hong pai a zaak ciang amate simin pawlkhat man hi.#Mi 33:40 2Tuasia ciang Israel te in Topa tungah kiciamna khat vawt a: “Hi mihingte nong zosak le amate le a khuapite nangma tungah kong aap tu a, tuate ka lalcipsak tu hi,” ci uh hi. 3Amate ii pauna Topa in za a, Canaan te zosak hi. Tuaciang Israel te in Canaan te le a khuapite lalcipsak siat a, tua mun Hormah ci uh hi.
Taau taw Kivawt Ngul
4Israel te Hor Mual nusia in Edom ngam kiimveal in Aqaba Tuipi sangah pai uh hi. Ahizong lampi ah amate a thin vei zo ngawlin, #Thkna 2:1 5Pathian le Moses langpanin sonsia uh hi. Amate in, “An le tui om ngawlna hi mun sennealngam sungah a thi tu in banghang Egypt ngam pan hong pusuapui ni ziam? An lim ngawl hi bang te po ka ne zo buatu uh hi!” ci in phunsan uh hi. 6Tuasia ciang Topa in amate sungah ngul ngu neite tha a, Israel te tam mama ngul tukin thi hi. #1 Cor 10:9 7Mite Moses kungah pai in, “Topa le nang langpanin kong sonsiat uh sia maw khu hi. Tu in hi ngulte a laak natu in Topa tungah thu ngen in,” ci uh hi. Tua ahiciang a mite atu in Moses in thungen hi. 8Tua zawkciang Topa in Moses tungah, taau ngul khat vawt in a, ngul tuk thuak mihing khat pawpo in tuasia a et ciang damna a nga thei natu in, khuam tungah khai in ci hi. 9Tuaciang Moses in taau ngul khat vawtin khuam tungah khai hi. Ngul tuk thuak pawpo in tua taau ngul en a damna nga hi.#2 Kum 18:4; Jn 3:14
Hor Mual pan Moab Kuam ah
10Israel te kikhiin in Oboth ah ngiaphual saat uh hi. 11Tua mun a nusiat zawkciang, Moab ngam nisuana sang a lalsa Abiram ngam duisung ah ngiaphual saat uh hi. 12Tua zawkciang Zered Kuam ah ngiaphual saat uh hi. 13Tua mun pan kikhiin kik leleau a, Arnon Ngun ii saksang Amor ngam dong a zai duisung ah ngiaphual saat uh hi. (Arnon sia Moab le Amor mite ngamngi ahi hi.) 14Tua ahi hu in Topa ii Ngal donate Laibu sungah, “… Suphah huamsung Waheb khua, le a kuamte; Arnon Ngun, 15tuaciang Ar khua dong a ban ngamkuam dungsuk teng le Moab ngamngi sang dong in,” ci in son hi.
16Tua mun pan Tuikhuk kicina munah amate paitanin, tualai ah Topa in Moses tungah, “Mipite kikhawmsak in, amate tui pia tu khi hi,” ci hi. 17Tua laitakin Israel mite in hi la sak uh hi:
“Tuikhuk te awng,
na tui phuulsak vun;
Lasakna taw muak tu khu hi —
18Kumpi tate ii
kumpi ciangkhut taw,
Mipi lampuite ii
a ciangkhut taw in a kito
Tuikhuk na hi hi,” ci hi.
Amate duisung panin Mattanah ah kikhiin uh a, 19tua mun pan Nahaliel zuanin, Nahaliel pan Bamoth ah, 20Bamoth panin sennealngam a kimu theina Pisgah Mualdawn nuai Moab ngamkuam theng uh hi.
Sihon Kumpi le Og Kumpi A zawna
(Thuhil kikna 2:26—3:11)
21Tua zawkciang Israel mite in Amor te kumpi Sihon kungah kamtaite paisak a: 22“Na ngam hong kaantansak tavun. Kote le ngannote in lampial in na lote, ahibuale na sapithuante sungah pai ngawl tu khu hi. Na tuikhukte pan tui ka ne buatu uh hi; na ngam ka kaantan mateng, lamziikpi tung teng ka tawn tu uh hi,” cisak hi. 23Ahizong Sihon in Israel mite ii a ngam a kaantan tu oai ngawl hi. Ama in a ngalkaphonpi khawm a, duisung Jahaz ah pai in Israel te sim hi. 24Ahizong ngal kidona ah Israel te in a ngalte tam mama that a, Arnon ngun pan Jabbok saksang dong laaksak hi, banghang ziam cile tua mun sia Ammon ngam hi a, Ammon te in a ngamngi nasia takin hung uh hi. 25Tuaciang Israel mite in Amor khuapi theampo la siat a, Heshbon le a kiim a om khuate zongh la in tua khua teng theampo sungah teang uh hi. 26Heshbon sia Amor te kumpipa Sihon teenna khuapi hi a, Sihon sia Moab kumpi masa a do pa le Arnon Ngun dong a ngam theampo a laaksak pa ahi hi. 27Tua hu in laphuakte in,
“Kumpipa Sihon ii khuapi
Heshbon ah hong pai tavun!
Tua khuapi a kisa kik le
a kipua kik mu nuam khu hi.
28Khatvei lai, Heshbon khuapi panin
Sihon ngalkaphonpi sia
meikuang khat taw kibangin pai a;
Moab ngamsung
Ar khuapi lalcipsakin
Arnon thunghsang mualte
kaanghtum hi. #Jer 48:45-46
29Moab mite awng, no atu
bang zata lauhuai ziam!
No Chemosh a bia te lal siat nu hi!
Na pathian in pate ngaltaite suaksak a,
Numeite Amor kumpipa ii
ngalmatte suaksak hi.
30Ahizong tu in a suan a paalte
Heshbon pan Dibon lam tawntung
Nashim pan Medeba khua nai
Nophah dong kimon hi,” ci in phua uh hi.
31Tuabangin Israel mite Amor te ngam sungah teang a, 32Moses in Jazer khuapi sim natu lampi phabel a zong tu in mihingte paisak hi. Israel te in tua khuapite le a kiim ah khuate la in tua mun ah a teang Amor te not keak uh hi.
33Tua zawkciang Israel te Bashan lam tawnin heakkik a, Bashan Kumpi Og sia amate sim tu in a ngalkaphonpi taw Edrei ah kuan uh hi. 34Topa in Moses tungah, “Ama kiita heak in. Hi kumpipa, a mihing theampo le a ngam a lei kong zosak tu hi. Heshbon khua a uk Amor Kumpipa Sihon tungah na vawt bangin ama tungah vawt in,” ci hi. 35Tua ahikom Israel te in Og, a tapate le a mite theampo khat zongh khoaikhe ngawlin thatlum siat a, tua zawkciang amate in a ngam lua uh hi.
Currently Selected:
Mi Simna 21: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
