Matthew 8
8
Jesus in Pasal khat Damsak
(Mark 1:40-45 Luke 5:12-16)
1Jesus mualtung pan hong tuaksuk ciang mihonpite in zui uh hi. 2Tuasia ciangin a lauhuai vun natna vei khat hong pai a, Jesus mai ah khupdin in “Topa hong damsak nuam po lete hong damsak thei tu ni hi,” ci hi.
3Jesus in a khut zan a, ama thamin, “Hong damsak nuam khi hi, dam ta'n,” ci hi. Thakhat thu in, pasalpa a natna pan dam hi. 4Tua zawkciang Jesus in, “Ngai in, kuama munah son heak in a, thiampipa kungah pai vingveng in, na pumpi vealsak ta'n; na damna thu ngual theampo hong heak natu in, Moses thupiak bangin sangaw biakpiakna vawt ta'n,” ci hi.#Thiam 14:1-32
Jesus in Rome Ngalkap hon ukpa ii Naseampa Damsak
(Luke 7:1-10)
5Jesus Capernaum khua sungah a tum laitakin, Rome ngalkapmang khat taw kisi a, tua pa in Jesus munah hu ngen hi. 6“Topa awng, ka naseampa sia inn ah ciina in lum a, tungh thei ngawlin ngim mama hi,” ci hi.
7“Na inn ah hong pai in, damsak tu khi hi,” Jesus in ci hi.
8Ahihang ngalkap hon ukpa in, “Topa awng, ka inn sungah nang nong pai tu sia ka kiphu bua hi. A dam natu thu hong piaksak po lete ka naseampa dam tu hi,” ci hi. 9“Keima mama zongh uliante khutnuai ah om a, keima khutnuai a ngalkapte om hi. Khat tungah, ‘Pai in’ ci leng pai a, ‘hong pai tan’ ci leng hong pai hi. Ka salpa munah hi sia seam in ci leng seam hi,” ci hi.
10Jesus in hi thu a zaak ciangin, lamdang sa in, a nungzuite munah, “A tatakin ka ci ciang Israel ngam sungah hi bang upna mu ngeingawl khi hi,” ci hi. 11“A maan tatak ka ci ciang, nisuana le nitumna panin, mihing tam mama hong pai tu a, Vantung ngam sungah Abraham, Isaac le Jacob taw anneakpoai sungah hong tokhawm tu hi.#Lk 13:29 12Ahihang tua Kumpingam sungah om tu a kilawmte, khuazing sungah kivawk tu a, tua munah kapin ha ngoai in om tu hi,” ci hi. #Mt 22:13; 25:30; Lk 13:28 13Tua zawkciang, Jesus in ngalkap hon ukpa munah, “Va cia ta'n, na upna bangin hong kivawtsak tu hi,” ci hi.
Tuaciang ngalkap hon ukpa naseampa tua hun laitak ma in dam hi.
Jesus in Mihing Tam mama Damsak
(Mark 1:29-34; Luke 4:38-41)
14Jesus in Peter inn ah pai a, tua munah Peter sunghnu a ci suukin lupna tungah om mu hi. 15Jesus in Peter sunghnu khut thamsak hi; a cisa natna dam a, tho in Jesus zindo hi.
16Nitak ciang mihingte in Jesus kungah doaivei tam mama hong paipui uh hi. Jesus in thaa ngilote kammal khat taw notkeak a, tuaciang ciina theampo damsak hi. 17“Ama mama in ih natna satnate hong puaksak a, ih ciluang natna hong laakkeaksak hi,” ci in Isaiah kamsaangpa ci teng a taangtun natu in seam ahi hi.#Is 53:4
Jesus Nungzui Tute
(Luke 9:57-62)
18Jesus in a kiim a mihonpite a mu ciang, a nungzuite munah tuili ngalkhat ah a pai natu in sawl hi. 19Thukhamhil sya khat in, “Sya awng, na paina po ah paikhawm tu in, ka kinging hi,” ci hi.
20Jesus in, “Ngiate in kua nei a, vacimte in bu nei uh hi. Ahihang Mihing Tapa in lup natu le, tawlngak natu a nei bua hi,” ci in zo kik hi.
21A nungzui ngei dang khat in, “Topa awng, hong ciasak ta'n a, ka pa na vui phot tong,” ci hi.
22Jesus in, “Hong zui ta'n, mithite in amate ii mithi vui tahen,” ci hi.
Jesus in Vuipi suangval Thimsak
(Mark 4:35-41, Luke 8:22-25)
23Jesus ngunkuang tung to a, a nungzuite zongh in ama zui uh hi. 24Thakhat thu in a kiitakhuai vuipi suangval khat tuili tungah hong va a, ngunkuang sia tui ii a khup tu lauhuai hi. Ahihang Jesus mutthip hi. 25Nungzuite a kungah pai in, phong uh hi. “Hong hun ta'n, Topa, thi dektak khu hi,” ci uh hi.
26Jesus in, “Banghangin tuaza liangin lau nu ziam? Na upna uh bangza in no ziam?” ci hi. Tua zawkciang ama dingto a, vuipi le tuihualte a thim natu in thupia a, tuasia ciangin thim dide hi.
27Mihing simin lamdang sa uh hi “Hisia pa bangbang mihing hi thong ziam? Vui le tuihualte ngawngawn in a thu ni hi,” ci uh hi.
Jesus in Doaivei Pasal Nii Damsak
(Mark 5:1-20; Luke 8:26-39)
28Tuili ngalkhat Gadara ngam ah Jesus a thet ciangin, thaan hawng sung pan hong pusuak pasal nii taw kisi uh hi. Hi mihingte doaivei a, kiitakhuai mama ahikom tua lampi tawnin, kuama khualhaw ngam ngawl uh hi. 29Thakhatin amate cik-au uh a, “Nang Pathian Tapa awng, ko bang hong law nuam ni ziam? A hun hong thet ma in, daan pia tu in hong pai ni ziam?” ci uh hi.
30Tuak nai ah vok honkhat taa uh hi. 31Tua ahikom doaite in Jesus munah, “Nong notkeak tu ahile zia lai a vok honte sungah hong tumsak ta'n,” ci in ngen uh hi.
32Jesus in, “Pai tavun,” ci hi. Tuasia ciang amate in a omna uh nusia in paisan a, vokte sungah tum uh hi. Vok hon bup liangpangh ah kinuntaw sukin, tuili sungah tuitaa in thi siat uh hi.
33Vok cingte tai in khua sungah tum a, tua munah doaiveite tung a thupiang theampo son siat uh hi.
34Tua ahikom khuapi sung pan mihingte Jesus taw kisi tu in hong pai tek uh hi; ama a mu uh ciangin a ngam uh panin a pusua natu ngen uh hi.
Currently Selected:
Matthew 8: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016