Thiampite 24
24
Meivakte Kepcingna
(Pusuana 27:20-21)
1 Topa in Moses tungah, 2Israel mite in Puanbuk sungah meiinnte a kidet ngei bangin a taan suak thei natu in olive thau phabelte hong paipui natu thupia in sawl hi. 3Topa ompuina Thiangthobel Mun sungah a om Thuciamna Thingkuang mai puankhai pua sangah meite, nitak sim Aaron in de a, zingsang dong kuangtopsak tu hi. Hi ngeina sia maisang hun theampo ah zui tu ahi hi. 4Khamh ciitak taw kivawt meikhuamte tungah meite Aaron in keamcing tu a, Topa ompuina ah a ngeina bangin taangsak nanak tu hi.
Pathian tungah A kipia Anluum
5Anvui kilogramme sawm le nii la in, anluum sawm le ni vawt in. #Pu 25:30 6Topa ompuina mun khamh ciitak taw a kituam sabuai tungah luk veu ngual nii in koi hi. 7Anluum taangin Topa tungah a kipia an taw biakpiakna a kilakna in, tua a ngualte tungah ngimnamtui a thiang tawm koi in. 8Sabbath ni sim, maisang hun theampo ah tua anluumte Topa ompuina ah kikoi tu hi. Hisia a tawntungin Israel te sep tu ahi hi. 9Hi anluumte Aaron le a suan a paalte neisa hi a, amate in mun thiangthona ah ne tu hi, banghang ziam cile thiampite atu in Topa tungah a kipia a thiangtho mama ante ahi hi.#Mt 12:4; Mk 2:26; Lk 6:4
A Maan Daan Piaknazia
10-11Pasal khat om a, a pa sia Egypt te, a nu sia Israel te Dan minam sung pan Dibri tanu Shelomith a kici sia ahi hi. Tua ngiaphual sungah tua pa sia Israel te khat taw kihau hi. A kihau sungin tua pa in Pathian haamsiat ahikom, Moses kungah paipui uh hi, 12tua pa kikhumcip a, bangbang hi tu ci sia Topa ii amate a son tu ngakin om uh hi.
13 Topa in Moses tungah, 14“Tua pa ngiaphual pua sangah paipui vun. Pathian a haamsiat lai in a za theampo in maw hi ci tetti lakna in tua pa lu tungah a khut uh nga tek tu a, tuaciang taangpi bup in suang taw deanglum tu uh hi. 15Tuaciang Pathian a haamsiat peuma in a piang bangin thuak tu a, 16kithatlum tu hi, ci in Israel mite tungah na son tu hi. Israel te khat pawpo ahibuale Israel te sungah a teang ngamdangmi khat pawpo Topa a haamsiat sia taangpi bup in suang taw deanglum tu hi.
17“Mihing a that sia peuma kithat tu hi, #Pu 21:12 18ngual nganno khat a that sia peuma in liau kik tu hi. Nuntakna khat sia nuntakna khat taw lo tu ci thu ahi hi.
19“Mihing khat in midang khat a liamsua le, ama vawt babangin a tungah kivawt tu hi. 20Ama in ngu khat a talsak le ama ngu khat kitalsak tu hi; ngual mittang khat a tawsak le ama mittang khat kitawsak tu hi. Ha tang khat a tongsak le ama hatang khat kithoksak tu hi. Midang khat a liamsua babangin ama tungah kithuk kik tu hi. #Pu 21:23-25; Thkna 19:21; Mt 5:38 21Nganno khat a that sia in liau tu a, ahizong mihing a that sia peuma kithatlum tu hi. 22Hi thukham sia no Israel te le note sungah hong teang ngamdangmite theampo ii zui tu ahi hi, banghang ziam cile Keima in Topa na Pathian ka hi hi,” ci hi. #Mi 15:16
23Hi thu Moses in Israel mite tungah a son zawkciang, tua pa ngiaphual pua sangah paipui in suang taw deanglum uh hi. Topa ii Moses tungah a thupiak bangin Israel mite in vawt uh hi.
Currently Selected:
Thiampite 24: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
