Thiampite 20
20
Thu ni Ngawlte Daan piaknate
1 Topa in, 2Israel mite tungah hi bang a sonsawn tu in Moses tungah, “Note khat pawpo ahibuale note taw a teang khawm ngamdangmi khat pawpo, Molech pathian biakna in a zak tu in a ta a pia pawpo sia, taangpi in suang taw deanglum tu uh hi. 3Mihing khat pawpo a tate khat Molech tungah pia in, ka Puanbuk thiangtho ninsak a, ka min thiangtho a daisak le ka nungngat tu a, ka mi khat in ka ngaisun nawn buatu hi. 4Ahizong tua pa ngamtatna taangpite in awlmawk ngawlin a thatlum bua le, 5tua pa, a innkuan bup le Molech bia in ka tungah hong thumaan ngawl theampo ka nungngat tu hi. Amate ka mi in ka ngaisun nawn buatu hi.
6“Mithite ii thaate tungah thu a dongh thei mihingte kungah mi khat pawpo pai in thu a dongh le ama ka nungngat tu a, ka mi khatin ka ngaisun nawn buatu hi. 7Note thiangtho tavun, banghang ziam cile keima in Topa na Pathian ka hi hi. 8Ka thukhamte hong zui tavun, banghang ziam cile Keima in Topa hi a, kong thiangthosak hi,” ci hi.
9 Topa in a nuai a zui tu ngeinate pia hi. A nu le a pa a haamsiat peuma kithatlum tu hi; ama ii thina sia ama kivawt ahi hi. #Pu 21:17; Mt 15:4; Mk 7:10
10Mi khat in Israel mipui khat ii zi a khialpui le a nii in kithatlum tu hi. #Pu 20:14; Thiam 18:20; Thkna 5:18 11Mi khat in a pa zite khat a khialpui le a pa maimawlsak hi a, a nii in kithatlum tu hi. Amate thina in amate kivawt ahi hi. #Thiam 18:8; Thkna 22:30; 27:20 12Mihing khat in a tapa zi a khialpui le a nii in kithatlum tu hi. Mealheak kuung sung numei le pa omkhop khialna vawt ahiciang amate thina in amate kivawt ahi hi. #Thiam 18:15 13Pa khat in a dang pa khat taw a khial le a kiihuai ngamtatna hi a, a nii in kithatlum tu hi. Amate thina in amate kivawt ahi hi. #Thiam 18:22 14Mi khat in numei khat le tua nu ii nu a teenpui le a thum in kihallum tu hi, banghang ziam cile amate in a min daihuai ngamtatnate vawt uh hi; note sungah hi bang ngamtatnate omsak ngawl het tu nu hi. #Thiam 18:17; Thkna 27:23 15Mi khat in nganhing taw a khial le, a nii in kithatlum tu hi. 16Numei khat in nganhing khat taw khial nuamin a hanciam le a nii in kithatlum tu hi. Amate thina in amate kivawt ahi hi. #Pu 22:19; Thiam 18:23; Thkna 27:21
17Mi khat in a suapuinu ahibuale a suapuisealnu a teenpui le, amate mipite mai ah a maizumhuai le a thasiathuai in kivawt tu a, a mihuam sung pan kihawlkhia tu hi. A suapuinu khialpui ahikom a piang bang a thuak kul hi. #Thiam 18:9; Thkna 27:22 18Mi khat in numei khat a nin nei laitak a khialpui le a nii in a mihuam sung pan kihawlkhia tu hi, banghang ziam cile biakna sang pan a thiang ngawl thu taw kisai ngeinate paltan ahi hi. #Thiam 18:19
19Mi khat in a ni taw a khial le, mealheak kuung ahi hu in a piang bang a nii in a thuak kul tu hi. #Thiam 18:12-14 20Mi khat in a pa suapuipa zi taw a khial le, a pa suapuipa maimawlsak hi a, a nii in daan thuak tu a; tasel tu hi. 21Mi khat in a suapuipa zi a teenpui le, tasel in amate thi tu hi. Ama in biakna taw kisai a thiang ngawl na seam hi a, a suapuipa maimawlsak ahi hi. #Thiam 18:16
22 Topa in, “Kong paipuina Canaan leitang ii note hong nial ngawl natu in ka thukham le ka thupiakte theampo zui vun. 23Tualai ah a teang mite ii ngeinate zui heak vun; hi ngamsung na tum thei natu in hi ngam pan tua doai bia te not keak tu khi hi. A ngamtat siatnate in hong thasiasak hi. 24Ahizong hi ngamhoi ngampha lua tu in, hong ciam zo ka hi ciang kong pia tu hi. Keima in Topa na Pathian ka hi a, minam dangte sung pan kong tuamkoi zo hi. 25Tua hi a, nganhing le vacimte biakna taw kisai in a thiang le a thiang ngawl na khentel tu uh hi. A nin ahi nganhing le vacimte ne heak vun. Nin hi ka ci sa hi a, na ne uh le a nin hong suaksak tu hi. 26Note na thiangtho tu uh a, keima neisa bek na hi tu uh hi, banghang ziam cile keima in Topa ka hi a, ka thiangtho hi. Keima neisa bek na hi thei natu in minam dangte sung pan kong tuamkoi hi.
27“Pa ahizong nu ahizong mithisate thaa tung thu a dongh peuma suang taw kideanglum tu hi; hi bang a ngamta pawpo ama ii thina in ama kivawt ahi hi,” ci hi.
Currently Selected:
Thiampite 20: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
