Thiampite 12
12
Naunei Zawkciang Numeite Thiansuana
1 Topa in Moses tungah Israel mite atu in, 2zui tu a nuai a ngeinate pia hi. Numei khat in tha sim nin a nei hunsung bangma in tapa khat a nei zawk ni sali sung sia biakna taw kisai in thiangtho ngawl hi. 3Ni liat ni in a tapa vunteap ki at tu hi. #Pian 17:12; Lk 2:21 4Tuaciang numei in a chi luanna pan biakna taw kisai in a thiantho dong ni sawmthum le ni thum sung ngak tu hi. Ama in a kithiansuana hun a cin mateng a thiangtho na khat zongh tham thei ngawl tu a, a thiangtho Puanbuk sungah tum ngawl het tu hi.
5Numei khat in tha sim nin a nei hunsung bangma in tanu khat a nei zawk ni sawm le ni li sung biakna taw kisai in thiangtho ngawl hi. Tuaciang a chi luanna pan biakna taw kisai in a thian natu in ni sawmluk le ni luk ngei lai tu hi.
6Tapa ahizong tanu ahizong nei in a thiansua na hun a cin zawkciang, ama in Topa ompuina Puanbuk kongbiang ah a om thiampipa tungah meihal biakpiak natu in kum khat a pha tuuno khat le mawphel biakpiak natu in inn vakhu ahibuale ngam vakhu khat paipui tu hi. 7Thiampipa in Topa tungah tua nu ii a zeksa biakpiakna piaksak tu a, ama thiantho ngawlna teng thiansuana in a zeksa teng vawtsak a, tuaciang ama biakna taw kisai in thiangtho tu hi. Hi thu in numei khat ii a naunei zawkciang a zui hamtang tu ahi hi.
8Numeinu in tuuno khat a nei zo bua ahile inn vakhu nii ahibuale ngam vakhu nii, meihal biakpiak natu in khat, mawphel biakpiak natu in a dang khat paipui tu a, tuaciang thiampipa in tua nu a thiantho ngawlna pan a thiansua tu in a zeksa teng vawtsak tu a, tuaciang ama biakna taw kisai in thiangtho tu hi. #Lk 2:24
Currently Selected:
Thiampite 12: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
