Joshua 24
24
Shechem ah Joshua in Mipite tungah Thuson
1Joshua in Israel nam teng theampo Shechem ah khawmtua hi. -Ama in upate, lampuite, thukhente, Israel uliante sam a, Pathian ompuina munah hong pai tek uh hi. 2Joshua in mipite theampo tungah, “Topa Israel te ii Pathian ii a ci sia hi teng hi: ‘Khuangeipi hun lai in noma taanghpupite sia Euphrates ngun langkhat ah teang a, pathian dang bia uh hi. Tua taanghpupite sung pan khat sia Terah hi a, Abraham le Nahor ii pa ahi hi.#Pian 11:27 3Tuaciang noma ii taanghpupi Abraham ka la a, Euphrates ngunngal ngam pan Canaan ngam buppi kaantan in ka paipui hi. Suan le paal tam mama ka pia hi. Ama Isaac ka pia a, #Pian 12:1-9; Pian 21:1-3 4tuaciang Isaac tungah Jacob le Esau ka pia hi. Esau tungah a neisa tu in Edom mualtung ngam ka pia a, ahihang na taanghpupi uh Jacob le a tate ahile Egypt ah paisuk hi.#Pian 25:24-26; Pian 36:8; Thkna 2:5; Pian 46:1-7 5A zawkciang Moses le Aaron ka paisak a, Egypt tungah ngimna lianpi ka pia hi. Ahihang no sia kong pusua pui hi. #Pu 3:1—12:42 6Egypt panin na taanghpupite uh ka pusua a, tuaciang Egypt te in siphu ngalleang le siphu ngalkapte taw del uh hi. Ahihang na taanghpupite uh San Tuipi a thet uh ciang, #Pu 14:1-31 7amate au in kei tungah hu hong ngen uh hi, tuasia ciang amate le Egypt te kilaklaw ah khua ka zingsak hi. Egypt te tungah tuipi ka kihualsak a, amate tuitaa siat hi. Egypt tungah ka vawt ka sep teng na he uh hi.
“ ‘Sennealngam sungah khuangei ma na teang uh hi. 8Tua zawkciang Jordan ngun ii nisuana sang a om Amor te ngam ah kong paipui hi. Amate in no hong do ahihang amate kong zosak hi. Amate ngam la in, maisang na manaw uh ciang, amate ka mon hi. #Mi 21:21-35 9Tua zawkciang Moab kumpi pa, Zippor ii tapa Balak in no hong do hi. Ama in Beor tapa Balaam samin no hong haamsiat tu in sawl hi. #Mi 22:1—24:25 10Ahihang Balaam ii kam ka nangai bua hi, tua ahikom ama in no thupha hong pia hi, tuabangin Balak khut sung pan kong suatak hi. 11Jordan ngun kaantan in, Jericho khua theng nu hi. Jericho mite in Amor te, Periz te, Canaan te, Hit te, Girgash te, Hiv te le Jebus te ii hong do bangma in no hong do hi. Ahihang amate tung theampo ah zawna kong pia hi. #Jos 3:14-17; Jos 6:1-21 12Maisang na manaw uh ciang Amor kumpipa te nii ka nawkeak natu in amate nasia takin ka lausak hi. No ma namsau te le thal te hang hi ngawl hi. #Pu 23:28; Thkna 7:20 13Na thaw ngeingawl uh leitang kong pia a, na saat ngawl uh khuapite kong pia hi. Tu in note tua munah teangin noma suan ngawl sapitkungte pan sapitngate le na ciin ngawl uh olive kungte pan olive thaute na ne uh hi.’ ” #Thkna 6:10-11
14“Tua ahiciang, tu in, Topa zatak vawt vun a, thintak le thumaanna taw a na seam vun,” ci in Joshua in a thu son zom a, “Mesopotamia le Egypt a na taanghpupite ii biak pathiante vawk vun, Topa atu bek seam vun. 15Ama na, na seam nuam bua uh le, tu ni in khensat vun, akua atu seam tu nu ziam, ih taanghpupite ii Mesopotamia ah a biak pathiante atu ziam maw, tu laitak na teenna leitang a nei Amor pathiante atu ziam? Ka innkuan puite le kei ka hi le Topa atu ka seam tu uh hi.”
16Mipi te in “ko Topa nusia in pathian dangte na seam ngeingawl tu khu hi! 17Topa ih Pathian in ih pate le ei sia Egypt ngam saltanna pan hong pusuapui a, nalamdang lakna a vawtte ih mu hi. Ih paina po ah ih kaantan sa minamte khut sung panin hong keamcing hi. 18Hi ngam sungah maisang nawk in ih pai ciang hi munah a teang Amor te a vekpi in Topa in hong nawkeaksak hi. Tua ahikom ko zongh Topa na seam tu khu hi; ama ih Pathian hi,” ci in zo kik hi.
19Joshua in mipite tungah, “Ahihang Topa na seam zo ngawl tha tu nu hi. Ama sia a thiangtho Pathian hi a, ama in na mawnate uh hong maisak ngawl tu hi. Ama in ama a demte kuama dual ngawl hi, 20Tuaciang ngamdang pathiante ii na seam tu in ama na nusia uh le ama in note hong langpan tu a, daan hong pia tu hi. Nidangin no tungah hong dik hikale ama in note hong mon tu hi,” ci hi.
21Mipite in Joshua munah, “Hi ngawl hi! Topa na seam tu khu hi,” ci uh hi.
22Joshua in amate munah, “Topa na seam tu a, na teal huvau in no mama a tetti hi tu nu hi,” a ci ciang,
“Hi hi, koma tetti hi khu hi,” a ci uh hi.
23“Tua ahiciang ngamdangte pathian na kep uhte vawk vun, tuaciang Topa Israel te ii Pathian tungah na thumaanna kamkho pia vun,” ci in ngen hi.
24Tuasia ciang Mipite in Joshua munah, “Topa ih Pathian naseam tu khu hi. A thu piakte ni tu khu hi,” ci uh hi.
25Tua ahikom Joshua in tua ni in mipite atu thuciamna khat vawt a, Shechem ah thukhamte le ngeina zui tute pia hi. 26Joshua in hi thupiakna te Pathian Thukham laibu sungah at hi. Tua zawkciang ama in suangtum pui khat la in, Topa biakna mun oak thingkung nuai khat ah phut hi. 27Mipite theampo tungah ama in, “Hi suang sia ih tetti hi tu hi. Topa ii ei tungah hong pau kammal theampo tuasia in za siat zo hi. Tua ahikom tuasia in note ii lang ah tetti hi tu a, Topa na langpan ngawl natu hi tu hi. 28Tua zawkciang Joshua in mipite ciasak a, mi theampo in a neisa ngam le lei ah heak kik uh hi.
Joshua le Eleazar Thi
29Tuasia zawkciang Nun ii tapa Topa naseampa Joshua sia kum za le kum sawm a phak ciang thi hi. 30Ama sia ama ii neisa leitang, Ephraim mualtung ngam, Gaash Mual saksang Timnath Serah ah kiphum hi. #Jos 19:49-50
31Joshua nuntak lai teng Israel mite in Topa na seam uh hi, tuaciang ama thi zawkciang zong, Topa ii Israel atu a sep a vawt theampo a mu lampuite nuntak lai teng tuabang ma na a sepna zom suak uh hi.
32Egypt pan Israel mite ii a paipui uh Joseph luang sia Shechem ii pa Hamor tapate tung pan ngunntang zakhat taw Jacob leisa leitang no khat sung Shechem ah kiphum hi. Hi leitang sia Joseph suante in lua hi. #Pian 50:24-25; Pu 13:19; Pu 33:19; Jn 4:5; Sawl 7:16
33Aaron tapa Eleazar thi a, Ephraim mualtung ngam ah a om, a tapa Phinehas tungah a kipia Gibeah khua ah kiphum hi.
Currently Selected:
Joshua 24: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016