Job 32
32
Elihu ii Pauna
32:1—37:24
1Job sia ama mawbaang kisa ngawl ahikom pasal thum teng in zo kikik tu hanciam nawn ngawl hi. 2Ahihang a kungah a ding Elihu a kici pasal khat in a thin uukna vei zo nawn ngawl hi, banghang ziam cile Job in ama le ama kitangsakin, Pathian mawsiat hi. (Elihu sia Buz ii suan Barakel ii tapa hi a, Ram ii bee le phung pan hi.) 3Ama sia Job ii ngualtamh thumte tungah a thin uuk si hi. Amate in Job ii kam a zo natu he thei tuan ngawl hi, tuasia in Pathian sia a khial bang suaksak hi. 4Elihu ahile tualai ah a moibel ahikom ngual theampo ii thuson man dong ngak hi. 5Tua pasal te thum in Job kam a zo thei ngawl a mu ciang ama thin uukin, 6thuson tu hong kipan hi.
Elihu
Kei moi lai a, no haam zo nu hi,
tua ahikom ka ngaisutna kong son tu ka lauthawng hi.
7Noma na pau tu uh ma hi a,
no uhaamzawte in na ciimna nong hop tu uh ma hi ci in kei le kei ka kici hi.
8Ahihang mihingte kungah pai in
ciimna a pia sia Vaanglianbelpa Pathian ii thaa hi.
9Khanghaamna in
mihingte ciimsak ngawl a,
a maan sia hesak
tuan ngawl hi.
10Tua ahikom tu in nong nangai tu uh ka dei hi;
ka ngaisutna teng hong sonsak tavun.
11Na thu son uh lai in thinsau takin kong ngai a,
tuaciang ciim kammalte na zon uh laitakin kong ngak nginge hi.
12Pha takin kong ngai a, na lel uh ka he hi;
Job paunate na nial thei tuan bua uh hi.
13Bangbangin ciimna ka mu zo uh ci thei tu nu ziam?
Pathian in Job kam a zo kul tu hi,
banghang ziam cile noma in Job na lel uh hi.
14Job in kei hong paupui hi ngawl a, noma hong paupui hi.
ahihang no ii zo bangin ka zo ngei buatu hi.
15Job awng, amate in a kammal zak tu he tuan ngawl hi;
nang hong zo thei ngawl hi.
16Amate pau ngawl a om laitak ngak kenkon tu khi ziam?
Amate tua munah dingin a pau tu he nawn ngawl uh hi.
17Hi ngawl hi, tu in keima in kong zo tu a,
ka ngaisutna kong son tu hi.
18Pau ngawlin ka om thei nawn bua hi.
Ka pau tute ka iip thei nawn bua hi.
19Pau tu hun nga buathong leng,
sapittui thak a dim savun thawl bang in puaktham tu khi hi.
20Thuak zo nawn ngawl khi hi; ka pau tu kul hi.
21Hi kam kinialna sungah pan tuam mun nei ngawl tu khi hi;
kuama sialpok ngawl tu khi hi.
22Sialpok dan zongh thiam ngawl khi hi,
ngual ka sialpok le Pathian in manlang takin kei daan hong pia tu hi.
Currently Selected:
Job 32: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
