Job 14
14
1Eite theampo sia a thaneam a cimaw sa in ih piang hi.
A vekpi in khantom nuntak haksatna le ngimnate a kibang in kidim hi.
2Ih khangto a, paakte bangin manlang takin ih vul hi;
limhte bangin ih bo hi.
3Pathian awng, kei nong en beak tu ziam,
ahibuale thu hongsit in kei tungah thu nong khen tu ziam?
4Mihing bang a thiang ngawl na khat pawpo sung pan
a thiangtho na piang thei ngeingawl hi.
5Ama khansau za tu — a nuntak hun tha pha za tu sia a masia in kikhensat zo hi.
Nangma in tuate na khensat zo a,
tuasia kilai kik thei ngawl tu hi.
6Mundang en in a, ama nguak nusia in;
Ama in a thuak zo tu ahile — a nuntakna haksa sungah nuamsasak in.
7Thingkung kiphuk sa khat atu in lametna om hi;
tuasia nungta kikin meang hi.
8A zungte haamin, a bul lei sungah thi kale
9tui a nga thingkung no bangin meang tu hi.
10Ahihang mihingte thi a, tua in amate tawpna hi;
amate thi hi, tuasia zawkciang amate koisungah om ziam?
11Ngun a luan tawp te, tuili a kangte bangma in,
12mihingte thi in, a tho kik ngei buatu hi.
Vanpi a kip laiteng amate khanglo ngeingawl tu hi;
amate a mutna pan tung nawn ngawl tu hi.
13Mithi khua ah kei hong seal heu lete uuk nang;
na thin uuk thai dong hong seal ka ven,
tuasia zawkciang kei nong phaw kik natu hun khat ciangtan in.
14Mihingte thi le amate nungta kik thei ziam?
Ahihang hi ngim ngana hunte a bo dong
hun phazawte ngak tu khi hi.
15Tuasia ciang nong sam tu a, kong zo tu hi,
tuaciang nong bitphua sa kei tungah na lungkim tu hi.
16Tua zawkciang ka kalsuan simin nong encik tu a,
ahizong ka mawna ka khialna te nong sul zui buatu hi.
17Nangma in tuate na maisak tu a, na heam tu hi;
ka vawt a maan ngawlte theampo na niilkeak tu hi.
18Mualte a cip tu hun le
a kip suangliangte a kikhin tu hun hong theng tu hi.
19Tui in suangpite seu tu a,
tuaciang nguapi in leinealte tai tu hi;
tuabang keakin kote ii nuntak tu lametna teng na lalsak hi.
20Mihing khat na zothaw a ama a tawntung na hawlkhia hi.
A thi ciang a meal mang hi.
21A tapate in minphatna nga kale ama in heaksak ngeingawl hi,
amate a min siat ciang ama tungah kison ngawl hi.
22Ama in ama ii a pumpi natna le
a thin heena teng bek phawk hi.
Currently Selected:
Job 14: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
