Jeremiah 9
9
1Ka lu sia tuikhuk hi hen a, ka mitte thitui ii naak khat hi le uuk ing,
tua hi thong le a kithatlum ka mite atu in a sun a zanin ka kap zo tu hi.
2Ka mite taisan thei in
sennealngam sungah om natu mun khat nei leng ka uuk hi.
Amate sia a thu maan ngawl vive,
ngual a leeheak honkhat hi uh hi.
3Amate sia leilot thu son tu in kinging tawntung uh hi;
thumaanna taw sangin thumaan ngawlna taw ngam uk zaw uh hi.
Topa in,
“Ka mite in thusia khat zawkciang khat vawtin
kei sia a Pathian bang zongh in hong sim bua uh hi,” ci hi.
4A kuama po in a lawmpa
tungtaang a kikep kul tu hi,
kuama in a suapuipa
muang thei ngawl hi;
banghang ziam cile suapui theampo sia
Jacob bangin ngualtheam thei a, a kuama po in a lawmte sonsia hi.
5-6Amate theampo in a lawmte lampui khial uh a,
kuama in thumaan
son ngawl hi;
amate in a leeite uh leilot thuson hil uh a
mawna khialna a vawt uh sia thasua peuma ngawl tu hi.
Amate in ngoltol ngamtatna khat zawkciang khat vawt uh a;
theamna taw a ngamtatnate khat zawk khat kizom hi.
A mite in ama nial hi Topa in ci hi.
7Tua ahikom Vaanglianbelpa Topa in,
“Ka mite leisung sumpiang bangin
ka thiangsak tu a, ka sittel tu hi.
Ka mite in a sia vawt zo a —
amate bang law tuan thei tu khi ziam?
8Amate ii leeite sia thi theina thaltangte bang ahi hi;
leilot thu veu son uh hi.
mi simin a innpaamte tungah kamthiam pau hi,
ahihang thaang siana kam hi nginge hi.
9Hi thute hu in amate daan pia ngawl tu khi ziam?
Hi bang minam khat tungah phula ngawl tu khi ziam?
Keima Topa in ka son hi,” a ci hi.
10Keima in, “Mualte atu in khuangai a mau in,
ngamsung lohingna munte atu in ka kap tu hi.
Banghang ziam cile
tua munte kongaw a, kuama khualhawin kaantan ngawl hi,
ngannote haamna aw kiza nawn ngawl hi;
vacimte le ngamsate tai siat zo hi,” ka ci hi.
11 Topa in, “Jerusalem khua sia na a sia te kholna le,
ngiate teenna mun ka suaksak tu hi;
Judah ngam khuapite sia
kuama ii teen ngawlna sennealngam suak tu hi,” ci hi.
12Keima in, “Topa awng, hi ngam sia kuama khualhaw ngawl natu in banghangin kisia cip a sennealngam bangin kongaw ziam? Akua in hi bang thute a tel thei tu za in ciim tu ziam? Midangte tungah sonsawn thei tu in akua tungah na thiang son zo ziam?” ci in ka dongh hi.
13 Topa in, “Ka mite in ka piak hilcianna taisan ahikom hi thu piang hi. Amate in ka thu hong mang ngawl, ka ci bangin ngamta ngawl uh hi. 14Tua kawmkaal ah, a thin uh pui in a taanghpupite ii hil bangin Baal milimte bia uh hi. 15Tua ahikom, Vaanglianbelpa Topa Israel ii Pathian, keima ii vawt tu sia ngai in: Ka mite neak tu in a khaa thingno kungte ka pia tu a, a dawn tu in nguu tui ka pia tu hi. 16Amate ahizong a taanghpupite ahizong ii a zaak ngeingawl minamte sungah amate ka thethaang tu a, amate ka siatcipsak siat matengin a do tu in ngalkap honte ka puak tu hi,” ci in zo hi.
Jerusalem Mite in Huna Ngen
17Vaanglianbelpa Topa in,
“Bang piang ziam ngaisun vun!
A kapte hong pai natu in sam vun,
mithi vuina late a sa numeite sam vun,” ci hi.
18Mi honpi in, “Ih mittangte thitui taw a kidim mateng le,
ih mitkhute kaana taw a kawt mateng
amate hong manlang in,
mithi vui la ei hong sak natu son vun,” ci uh hi.
19Zion khua sung a kaana aw ngai vun;
“Ih lalcip hi!
Hong kimaimawl cipsak hi!
Ih ngam ih nusiat kul tu hi
ih innte hong suksiatsak hi,” ci uh hi.
20Keima in,
“Topa thu ngai vun, no numeite awng,
a kammalte nadon vun.
Na tanute sia kaa tu dan hil vun a,
na lawmte sia mithi vuina lasak zia hil vun.
21Thina sia ih khelkite tawnin
hong pai a,
ih kumpi inn sung
hong tum hi;
Thina in lampite ah patangte le
sumbukte ah tangvalte vaatlum hi.
22Mithi luangte sia, lo sungah eak vuum bang,
anlate in taang at a, a nusiat bangin,
kuama ii laak ngawl ankung bangin,
mun theampo ah kithethaang kawkoai hi.
Hi thu son tu a Topa ii kei hong sawl ahi hi,” ka ci hi.
23 Topa in,
“Miciimte in amate ii ciimna,
mi thahatte in amate ii thahatna,
mihaute in amate ii haunate kisakthei pui heak hen.
24Mihing khat pawpo in a kisathei nuam ahile,
keima hong heakna le hong telna kisakthei pui tahen,
banghang ziam cile
ka itna in kipin kho a, thumaan le thutang ka seam hi.
Hite sia ka thin hong nuamsakte ahi hi.
Topa keima in ka ci zo hi,” ci hi. #1 Cor 1:31; 2 Cor 10:17
25-26 Topa in, “A sam uh a tomin a meet Egypt, Judah, Edom, Ammon, Moab mite le sennealngam ah a teang mite daan ka piak tu hun hong theng tu hi. Hi mite theampo a vun uh ki at hi napi, vunteap ki atna taw kisai zui tu thuciamna zui ngawl uh hi. Hi mite le, Israel mite kuama in ka thuciamna zui ngawl uh hi,” ci hi.
Currently Selected:
Jeremiah 9: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
