Jeremiah 39
39
Jerusalem Khuabona
1Zedekiah ii Judah kumpi a sua zawk a kum kuana, a tha sawm tha in Babylon kumpipa Nebuchadnezzar sia a ngalkap buppi taw hong pai in Jerusalem sim hi. 2Zedekiah ii kumpi a sua zawk kum sawm le kum khatna, a tha li tha, ni kua ni in khuapi luphungte kisulet hi.
3(Jerusalem khuapi a kilaak ciang Babylon kumpipa ii uliante theampo hong pai in Kongpi Laita ah mun hong la uh hi. Tuate sungah Nergal Sarezer, Samgar Nebo, Sarsechim le Nergal Sarezer dangkhat kihel hi.)
4Zedekiah kumpipa le a ngalkapte theampo in a piang thu a mu uh ciang zanlai in khuapi pan a suatak natu hanciam uh hi. Amate sia kumpi huan sung lam tawnin luphungte ngeal kikawnna kongpi lam tawnin, Jordan Kuam sangah suakta uh hi. 5Ahihang Babylon ngalkaphonpi in delin Jericho khua nai zaangtam ah Zedekiah man uh hi. Tuasia ciang amate in Zedekiah sia Hamath ngamsung Riblah khua ah a om Nebuchadnezzar kumpipa kungah paipui uh a, tua munah Nebuchadnezzar in ama tungah thukhen hi. 6Riblah khua ah Nebuchadnezzar kumpipa in Zedekiah ii mu tang ma in a tapate thatlum a, Judah ngam kumpi uliante zongh thatlumsak hi. 7Tua zawkciang Zedekiah ii mittangte khelsak a, Babylon ah paipui tu in kol bulsak hi. 8Tua hun sung ma in Babylon te in kumpi inn le mipite ii innte haltum a Jerusalem khua luphungte sutham uh hi. 9A khakbel in ngalkap hon ukpa, Nebuzaradan in khuapi sungah a taanglai mite sia ama kung a zuan teng taw Babylon ah thongtaak tu in paipui khawm hi. 10Ama in bangma nei ngawl a, a zawngkhalbel mihing pawlkhat sia Judah ngam ah nusia in sapithuante le lote pia hi.
Jeremiah ii Suatakna
11Ahihang Nebuchadnezzar kumpipa in a nuai a thute a piak natu in ngalkap hon ukpa, Nebuzaradan tungah thupia hi: 12“Pai in Jeremiah na mu ciang pha takin keam in. Vawtsia heak in, a dei pawpo vawtsak in,” ci hi. 13Tua ahikom Nebuzaradan in kumpi uliante Nebushazban le Nergal Sarezer le Babylon kumpipa ii ulian dangte theampo taw 14kumpi innhuang sung panin kei hong la uh hi. Amate in Shaphan ii tupa, Ahikam ii tapa Gedaliah kungah, keima inn ah ngam muang takin hong thet natu le pha tak hong kep tu in hong aap uh hi. Tuabangin tua mun ah om mite sungah ka teang hi.
Ebedmelech atu Lametna
15Kumpi innhuang sungah thong hong kitaaksak lai in, Vaanglianbelpa Topa, Israel ii Pathian in hi bangin a ci teng sia, 16Ethiopia mi Ebedmelech tungah a son tu in Topa in kei hong sawl hi. “Ka vawt tu hi ka ci bangin hi khuapi tungah nopsakna ahi ngawl siatna ka tungsak tu hi. Hi bangin hong pian ciang a mu tu in tua munah na om tu hi. 17Ahihang Keima, Topa in nang kong dal tu a, na kiitak mihingte khut sungah hong ki aap ngawl tu hi. 18Nang sia kong keamcing tu a, hong kithatlum ngawl tu hi. Kei hong muang na hikom na nuntakna suakta tu hi. Keima, Topa in ka ci zo hi.”
Currently Selected:
Jeremiah 39: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
