Jeremiah 37
37
Jeremiah tungah Zedekiah ii Hesuakngetna
1Babylon kumpipa Nebuchadnezzar in Josiah ii tapa Zedekiah sia Jehoiakim ii tapa Jehoiachin taangin Judah ngam kumpi in koi hi. #2 Kum 24:17; 2 Khang 36:10 2Ahihang Zedekiah, a uliante le mipite in Topa ii ka tungah thu hong piak sia mang nuam ngawl uh hi.
3Ih minam luangin Topa ih Pathian tungah keima sia thungen tu hong sawl tu in, Zedekiah kumpipa in Shelemiah ii tapa Jehucal le Maaseiah ii tapa thiampi Zephaniah hong paisak hi. 4Tualai hunin thong sungah kei hong kikhum ngawl lai a, mihonpite sungah ka vak kawkoai thei lai hi. 5Babylon ngalkaphonpi in Jerusalem kiim uum zo uh hi, ahihang Egypt ngalkaphonpi in Egypt ngamngi kaantan zo hi ci thu a zaak uh ciang amate nungkin kik uh hi.
6Tua zawkciang Topa, Israel ii Pathian in, 7Zedekiah tungah son tu in hi bangin keima hong sawl hi, “Egypt ngalkaphonpi sia nangma hong hu tu in hong pai a, ahihang a ngam ah heak kik tu uh hi. 8Tuasia ciang Babylon te hong pai kik tu a, Jerusalem khuapi simin, la in, mei taw haltum tu uh hi. 9Babylon te hong pai kik nawn ngawl tu hi ci a na ngaisut thak ngawl natu, noma le noma na kitheam ngawl natu, Keima, Topa in kidop natu thu kong hilkhol hi, banghang ziam cile amate hong pai kik nanak tu hi. 10Babylon ngalkap buppi na zo zong, a taanglai a liamte bekma puanbuk sungah lum lai ahi hial uh zong, tuate ma hong thoto veve tu a, hi khuapi haltum tu uh hi.”
Jeremiah Kiman in Thong kitaaksak
11Egypt ngalkaphonpite hong nai hu in Babylon ngalkaphonpi sia Jerusalem pan nungkin hi. 12Ka inn kuan neisa teng sung pan ka nga tu ka tel la tu in Jerusalem khua pan dingin Benjamin ngam ah ka pai hi. 13Ahihang Benjamin Kongpi ka thet ciang tualai ah kongpi cing ngalkapte a uk bupa, Shelemiah ii tapa, Hananiah ii tupa Irijah in ka pai tu hong khaam a, “Babylon te kungah a taiku hi ngawl ni ziam?” hong ci hi.
14“Tuabang hi ngawl hi! Tai ku ngawl khi hi,” ci in ka zo hi. Ahihang Irijah in ka thuson hong ngai bua hi. Ama in kei hong manin uliante kungah hong paipui zawsap hi. 15Amate ka tungah thin uuk mama in hong saatsak in zum thuzeakpa Jonathan ii inn, thonginn a, a kivawt inn sia sungah hong khum in taw hong kalhcip uh hi. 16Leinuai inndoi khat sungah kei hong khum a, tua munah khuangei hialma hong koi hi.
17Tua zawkciang Zedekiah kumpipa in keima hong sam a, kumpi inn sungah ama in, “Topa kung panin bang thu hong pai ziam?” ci in kei hong dongh tuam hi.
“Thu om hi” ci in ka zo a, “Nang sia Babylon kumpipa khut sungah hong ki aap tu hi,” ci in ka son belap hi. 18Tua zawkciang keima in, “Thong sungah nong khum natu in nangma tungah ahizong na uliante tungah ahizong, hi mipite tungah ahizong bang khialna lian vawt khi ziam? 19Babylon kumpipa in nang le hi ngam hong sim ngawl tu hi ci a, nang tungah hong son, na kamsaangte bang tat ziam? 20Tu in Kumpipa awng, ka thu son nong ngai natu le kong nget sia nong vawtsak natu in hesuak kong ngen hi. Nong hesuakna in Jonathan ii inn thong sungah hong puak kik heak in. Nong puak kik ahile, tua munah thi takpi tu khi hi,” ka ci hi.
21Tua ahikom Zedekiah kumpipa in kumpi innhuang sungah kei hong kikhum natu in thu hong pia hi. Tua munah ka om a, khua sungah anluum a bo siat dong ni simin anluum lum khat veu anluum vawtna panin kei hong kipia hi.
Currently Selected:
Jeremiah 37: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
