Isaiah 66
66
Topa in Minamte tung Thukhen
1 Topa in, “Vantung sia ka tokhum hi a, leitung sia ka peang ngakna ahi hi. Tua ahiciang a koibang inn sa tu a, a koibang mun sia ka teen natu mun ahi ziam? #Mt 5:34; 23:22; Mt 5:35 2Keima mama in vaannuai buppi ka bitphua hi! Kiniamkhiakin a kisiik kikte, kei hong kiita in ka thu hong nite dik ka sa hi. #Sawl 7:49-50
3Mihingte sia a uuk bang po in ngamta uh hi. Amate in khuital khat ngo in, ahibuale mihing khat that in, biakpiakna in nei a; tuuno, ahibuale ui khat ii ngawng thiaktanin biakpiakna in nei a; antang, ahibuale vokte ii chi pia a; ngimnamtui pia, ahibuale milim khat tungah thu a nget uh sia amate atu in kibang siat hi. Amate in a kiihuai biaknate diksa uh hi. 4Tua ahikom amate tungah tuasiatna — amate ii kiitak tuasiatnate ma ka thengsak tu hi — banghang ziam cile ka sap ciangin kuama in hong zo ngawl a, ka pau ciangin kuama in hong ngai ngawl uh hi. Amate in ka thu nit ngawl tu le a sia vawt tu ma teal uh hi,” ci hi.
5No, ama kiita in a thu a nite in, Topa ci bang ngai vun: “Kei tungah nong thumaan hu in, na mite sung pan ma in pawlkhat sia note hong ensan in bangma hong heang ngawl tu hi. Amate in no hong nunau in, ‘Lungdam takin na nuntak uh kong mu thei natu uh in, Topa in a letna hong lak hen a, hong ngum tahen’ hong ci uh hi. Ahihang amate mama maimawl tu uh hi! 6Ngai vun! Khuapi sungah ngamlumna, Biakinnpi sungah aw nginna sia Topa ii a ngalte daan a piakna awnging ahi hi!
7“Ka khuapi thiangtho sia nautun phot ngeingawlin thakhat thuin nau a suak paih nupi khat taw kibang hi. #Tpl 12:5 8Tuabang te akua in mu ngei a za ngei ziam? Ni khat thu in ngam khat piang ngei ziam? A minam a pian ma in Zion in khuangei thuak ngawl tu hi. 9Ka mite sia keima in nausua hun ciang a suak tu in vawt a, tuaciang, a suaksak ngawl tu in hong ngaisun heak vun,” ci in, Topa pau zo hi.
10Jerusalem taw lungdam khawm
vun; ama atu in lungdam vun,
hi khuapi a it note theampo awng!
ama atu in a hee a kap note theampo awng,
tu in ama taw lungdam khawm vun!
11Tano khat in a nu noai tawpin nop a sak bangin
note in Jerusalem ii zawna haunate nuam na sa tu uh hi.
12 Topa in, “Tawntung nopsakna kong pia tu hi; a kang ngeingawl nguntui bangin minamte ii haunate note kungah hong luang tu hi. Note sia a nu ii a op, a kaang tungah a toai, a itna taw a ou tano khat taw na kibang tu uh hi. 13A nu in a tano a heenep bangin, keima in Jerusalem khua sungah note kong heeneam tu hi. 14Hi thu a pian na mu uh ciang, na lung uh dam tu hi; note hong thahatsakin hong ciidamsak tu hi. Tuasia ciang Topa keima in ka thu hong nite hu in, ka ngalte tungah ka thin uukna ka lakna thu na he tu uh hi,” ci hi.
15 Topa sia meikuang taw hong pai tu hi. Ama sia a thin a uuk sakte tungah daan pia tu in vuipi ii tha tungah to tu hi. 16Ama in mawna nei in a mu leitung mihingte theampo mei le namsau taw daan pia tu a — tam mama thisak tu hi.
17 Topa in, “Huan thiangthote sungah a ngui ngitngutin a paite, voksa, zunam sa le a dang a kiihuai ante ne a, doai biakna vawt tu in amate le amate a kithiansua mite ii a bo tu hun nai zo hi. 18Amate ii ngaisutna le a nasepnate ka he hi. Ngam theampo ii mite khawmtua tu in kong pai hi. Amate hong pai khop uh ciang, ka vaangletna in bang vawt thei cisia mu tu hi, 19tuaciang amate daan pia pa ka hi sia he tu uh hi.
“Ahihang amate sung pan pawlkhat ka khe tu a, ka minthanna a za ngawl, ahibuale ka letna le ka vaangletna a mu ngawl lai minamte le ngam khualate ahi, Spain, Libya, Lydia le a thalkaap thiamte ii ngam, Tubal le Greece te ngam ah ka puak tu hi. Amate in hi ngamte sungah ka letna thangsak tu uh hi. 20Amate na Israel mipuite theampo sia hi ngamte pan keima kungah letsong in hong puak kik tu uh hi. Israel mite in biakpiakna antangte sia biakna taw kisai bung thiangthote taw Biakinnpi ah hong paipui bangma in, amate in na ngammipuite sia siphu, laa, kalaoh le siphu ngalleangte le khui leangte tungah pua in ka mual thiangtho Jerusalem ah hong paipui tu uh hi. 21Keima in amate pawlkhat sia thiampite le Levi te ka suaksak tu hi.
22“Leitung thak le vantung thakte in keima ii vaangletna taw kho top tu ahi bangma in, na suan na paalte le na min kip in kho tu hi. #Is 65:17; 2 Pe 3:13; Tpl 21:1 23“Thadet Poai vawt sim le Sabbath Ni simin in ngam sim pan mite sia kei hong bia tu in hi mun Jerusalem ah hong pai tu uh hi,” Topa in ci hi. 24“Amate a cia uh ciang kei hong langpan te ii luanghawmte mu tu uh hi. Amate a ne lungte thi ngeingawl tu a, amate kihalna meite kimit ngeingawl tu hi. Amate sia mihing nam theampo in a kiihuai in mu tu uh hi,” ci hi. #Mk 9:48
Currently Selected:
Isaiah 66: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016