Isaiah 21
21
Babylon Bo natu Mukholna
1Hisia sia Babylon taw kisai thupuak ahi hi. A lauhuai ngam khat panin suumpei khat bangin sennealngam kaantan in, tuasiatna hong pai tu hi. 2A ngitlo huai thupiangte mukholna khat ka mu a, kilee heakna le lalcipna ahi hi.
Elam ngalkapte awng, sim vun! Media ngalkapte awng, khuapite kiim uum vun! Babylon ii a piansak ngimna a thuakna sia Pathian in bosak tu hi.
3Mukholna sungah ka zaak le ka mute in hong lausakin, numei khat nau a tut ciangin na a sak bangin na ka sa hi. 4Ka lu hong vai in, lau in ka liing hi. Nitak hong thet tu ka thangai a, ahihang hong thet takpi ciang liinna le launa bekma hong puak hi.
5Ka mukholna ah anneakpoai khat kingingin ka mu hi; leangnate to natu in puan saate kipha hi. Amate an ne tui dawnin a om laitak thakhat thu in thupiakna khat nging hi; “Uliante awng! Na lumte pua khol vun!” ci hi.
6Tua zawkciang Topa in kei tungah, “Pai in a ngal encik khat koi in, a mu bangin thu hong puak tu in sawl in. 7Mihing nii veu, nii veu siphu tungto in hong pai ahizong, mihingte laa tung le kalaoh tung to in hong pai ahizong ama in a mu le, pha takin tuate a etcik tu ahi hi,” hong ci hi.
8Ngal encik pa au in, “Topa awng, a sun a zanin ngalvilin ka ding tan hi,” ci hi.
9Thakhat thu in amate hong theng hi! Mihing nii veu nii veu siphu tung to hi. Ngal encik pa in, thu puak in, “Babylon bo zo hi! Amate ii biak milim theampo lei ah tamhtham dipdeapin om hi,” ci hi. #Tpl 14:8; 18:2
10Israel ka mite awng, mangtaang bangin no hong kicil zo hi, ahihang tu in Israel te ii Pathian ahi, Vaanglianbelpa Topa tung pan ka zaak, a zaaknophuai thuphate kong son zo hi.
Edom taw kisai Thupuak
11Hisia in Edom taw kisai thupuak ahi hi. Edom pan khat in kei hong samin, “Phualcing pa awng, zan hun a bo nai tu ziam? A bo pal tu ziam hong son ta'n,” hong ci hi.
12Ka zo kikna pan, “Zingsang hong thetheng hi, ahizong zan hun hong theng kik leleau tu hi. Nong dongh kik nuam le hong heak kikin hong dongh ta'n,” ka ci hi.
Arabia taw kisai Thupuak
13Hisia in Arabia taw kisai thupuak ahi hi.
Dedan mi, Arabia ngamkol sungah kalaoh hon taw ngiaphual saatin a om note awng, 14note kungah hong pai tuidu dangtaak mihingte tui pia vun. Tema ngammi note awng, ngaltaite an pia vun. 15Namsau taw kithalupna pan, thal taw kikaplupna pan le ngal launa theampo pan a suakta tu in mihingte tai uh hi.
16Tua zawkciang Topa in kei tungah, “Kum khat sung lianin Kedar minamte ii a letna bo tu hi. 17Kedar mite sung pan thal toaite sia ngalhang belte hi a, ahihang amate sung pan tawm bek taang lai tu hi. Keima, Israel te ii Topa Pathian in ka son zo hi,” hong ci hi.
Currently Selected:
Isaiah 21: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
