Isaiah 19
19
Pathian in Egypt Daan pia tu
1Hisia sia Egypt ngam taw kisai thupuak ahi hi. Topa sia meei tungah to in, manlang mama in Egypt ngam ah hong pai hi. Ama mai ah Egypt milimte liingin, Egypt mihingte a hanna bo hi. #Jer 46:2-26; Eze 29:1—32:32 2Topa in, “Egypt ngam sungah tualngal thosakin, unau khat le khat, innpaam khat le khat ka kidosak tu hi. A kidem khuapite khat le khat kido in, a kidem kumpite khat le khat vaangletna kituu in kihau tu uh hi. 3Egypt te ii ngealnate lalsakin, a thin kho nate ka siasak tu hi. Amate in a milimte tungah huna ngenin, thaa sam theite thu dongh in, mithite ii thaa te tungah ngaisutna ngen tu uh hi. 4A ngoltol a tatkha, zawthawk thu taw a ngilo kumpi khat tungah Egypt te aapin ka uksak tu hi. Keima, Vaanglianbelpa Topa in ka son zo hi,” ci hi.
5Nile nguntui kiamsuk in, ngun sia dadamin kang tu hi. 6Nguntui luanna tuilamte dadamin ko in ui tu hi. Pumpa kung le phaipheang kungte ko ngaw tu a, 7Nile ngundung vaalbo tungah a kiciing ankung theampo ko ngaw in, hui in seamkeak tu hi. 8Nile ngun sungah ngasa mat taw nuntakna a zong theampo tau in kap tu uh hi; a ngasa tangthaakna le a ngeente kimanna om ngawl tu hi. 9Puanneal puan a takte thinkiam tu uh hi; 10thiamtakte le khutthiam naseamte thin tamthamin a thin lal tu uh hi.
11Zoan khua lampuite sia mi mawmawte ahi uh hi! Egypt mipil belte in a mawmawthuai ngaisutna pia uh hi! Amate in taanghlai mipilte le kumpite zalaih tu ka hi uh hi ci in bangbangin kumpipa tungah son ngam ziam? 12Egypt kumpipa awng, ngaisutna a pia thei tu tua na mipilte koisungah om ziam? Egypt atu in Vaanglianbelpa Topa in bang ngealnate nei cisia amate in nang tungah hong son thei tha tu hi. 13Zoan le Memphis lampuite mawmaw uh hi. Amate sia minam lampui tute ma in kingaisun ahihang lampui khial uh hi. 14Topa in a lungmanhuai bialbual ngaisutna amate in piasak hi. Tua hu in, Egypt te in a maan ngawl theampo seamin, ama luak naal tawk thei zukham pa khat bangin hoi vatut hi. 15Egypt ngam sungah a om, a hau a zawng, mi thupi mi thupi ngawl, kuama in Egypt te hu thei ngawl hi.
Egypt in Topa Bia tu
16Egypt mihingte sia numeite bangin meidoai tu hun khat theng tu hi. Vaanglianbelpa Topa in amate daan pia tu in a khut a vaan sia a mu uh ciang, amate lau in liing tu uh hi. 17Vaanglianbelpa Topa ii Egypt mihingte daan piak tu in a seesa thu a phaw kik simin Egypt mihingte in Judah te kiita tu uh hi.
18Tua hun a thet ciang, Egypt khuapi ngate sungah Hebrew kam kipau tu hi. Tualai a mihingte in Vaanglianbelpa Topa min suangin kiciamnate vawt tu uh hi. Khuapite sung pan khuapi khat sia, “Ni ii Khuapi” kici tu hi.
19Tuasia hun a thet ciang, Egypt ngam sungah Topa biaknatau khat om tu a Egypt ngamngi ah, ama min in khansuang khat kiphut tu hi. 20Tuate sia Vaanglianbelpa Topa ii Egypt ngam sungah a om hunlam a kilakna limte hi tu hi. Tualai ah a om mite kizothaw in Topa tungah huna a nget uh ciang, ama in amate a suatak tu mihing khat puak tu hi. 21Topa sia Egypt mihingte tungah ama mama kilangh tu hi, tuaciang amate in ama he in, bia tu a, sangaw biakpiakna le meihal biakpiaknate pia tu uh hi. Amate in Topa tungah a ciliap huai kamciamnate pia in, tua a kamciamna bangin seam tu uh hi. 22Topa in Egypt te daan pia tu hi, ahihang tua zawkciang damsak tu hi. Amate in Topa sangah kiheak tu uh a, ama in a thungetnate za in a ci uh damsak tu hi.
23Tua hun a thet ciang, Egypt le Assyria ngam kilaklaw ah lampi lian khat om tu hi. Tua ngam nii te pan mihingte khat le khat kihaw in minam niite in Topa bia khawm tu uh hi. 24Tuasia hun ciang, Israel sia Egypt le Assyria taw za kikim tu a, hi minam thumte leitung theampo atu in thupha a hi tu uh hi. 25Vaanglianbelpa Topa in amate thupha pia in, “Ka mi Egypt te awng; no kong bitphua sa Assyria te awng; tuaciang no kong teal mi Israel te awng, thupha kong pia tu hi,” a ci hi.
Currently Selected:
Isaiah 19: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
