Isaiah 16
16
Moab atu Lametna Om ngawl
1Sennealngam sungah a om Sela khuapi pan Moab mihingte in Jerusalem ah a om ngamukpa tungah tuuno khat letsong in puak uh hi. 2Amate in Arnon Ngun vaalbo tung pan ngak a, vacimte a bu uh pan a kinawkeak ciang a ci a law a heak ngawl bangin vak kawkoai uh hi.
3Amate in Judah mihingte tungah, “Bang seam tu khu ziam hong son tavun. Thingkung khat in suntang ni sat kimlai in, a limh vot khat a piak bangma in noma in hong dal tavun a, na limh sungah hong tawlngasak tavun. Ko sia ngaltaite ka hi uh hi, kuama ii hong mu thei ngawlna munah hong seal tavun. 4Na ngam sungah ko hong teangsak tavun. Kote hong susia nuamte kung pan hong dal tavun,” ci uh hi.
(Zawthawkna le suksiat nate bo tu a, ngam lalsak mite thotsak tu hi. 5Tua zawkciang, David suan le paal sung pan khat sia kumpi suak tu a, ama in mihingte thumaanna le itna taw uk tu hi. Ama in a maan sia seam papaih tu a, thukhaikim thu omsak tu hi.)
6Judah mihingte in, “Moab mihingte bang zata in kiphasak ci thu ih za zo hi. Amate a kisaktheina le a kiletsakna ih he hi, ahihang amate ii kisuantaakna sia a luithawthong hi,” ci uh hi.
7Moab mite sia ngimna a thuak hu in kap tu uh hi. Kir Heres khuapi sungah a om lai in a neak bul uh anlimte a phaw kik uh ciangin, amate a vekpi in kap tu uh hi. A thin kiam tu uh hi. 8Heshbon khua hui a lote le Sibmah ii sapithuante kilalsak hi — tua sapithuan pan a piang sapittuite in minam ukte zu khamsak ngei bul hi. Khatvei lai in a khualana Jazer khuapi dong, nisuana sang sennealngam dong, nitumna sang Tuipi Thi ngalkhat dong sapitkungte zaam hi. 9Tu in Jazer atu ka kaa bangma in tu in Sibmah ii sapitkungte atu in ka kap hi. Mihingte lungdamsak natu in anlaak poai om ngawl ahikom Heshbon le Elealeh atu in ka thitui taak hi. 10Tu in lo ngam pha sungah kuama lungdam ngawl hi. Sapit huan sungah kuama au ngawlin lasa ngawl uh hi. Sapittui vawt tu in kuama in sapitngate cil ngawl uh hi; lungdam in, au nate bo hi. 11Moab atu in khuangai in Kir Heres atu in ka tau hi. 12Moab mihingte in mualtung a thiangtho biakna munte le a biakinnte ah thungen tu in pai a, thapaai thawthong in, amate atu bangma phattuamna om ngawl hi.
13Tuasia in Moab taw kisai Topa thupuak maksak ahi hi. 14Tu in Topa in, “Kum thum a cin lianin Moab ii hauna letnate mangthang tu a, a mite tam mama sung pan amate tawm bek nungta lai in, thazawm tu uh hi,” ci hi.
Currently Selected:
Isaiah 16: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
