Pianciilna 50
50
1Joseph, a pa tungah kisepsuk a, kapin a pa maitang namh hi. 2Tuaciang Joseph in a pa luang a muat ngawl natu vawt tu in thupia hi. 3A luang muat ngawl natu nasepna sia a ngeina bangin ni 40 sung hai hi. Egypt mite sia ama atu in ni 70 sung khuangai in kap uh hi.
4Khuangai hunte a ven ciang, Joseph in kumpipa ii uliante tungah, “Hesuakna in kumpipa tungah hi thu hong sonsak tavun: 5‘Ka pa a thi mahiat in Canaan ngamsung, ama atu in a kinginna sa thaankuul ah ka phum natu in kamciamna hong vawtsak hi. Tua ahiciang hesuakna in ka pa a phum tu in hong paisak ta'n, tua zawkciang kong cia kik tu hi,” ci hi. #Pian 47:29-31
6Kumpipa in, “Kamciamna na vawt bangin, pai in na pa phum ta'n,” ci in zo hi.
7Tua ahiciang Joseph a pa phum tu in pai hi. Kumpipa ii ulian theampo, ama zumsung upate le Egypt ngam lampuite theampo Joseph taw pai uh hi. 8Ama ii innkuanpui, a suapuipate le a pa ii innkuanpui a om lai teng theampo ama taw pai uh hi. A tanote, a tuute, a kealte le a khuite bek ma Goshen ngam ah taang hi. 9Siphu ngalleang tung le siphu tung a to mihingte zongh ama taw pai tek uh a; mihing tam peuma hi.
10Jordan ngun nisuana sangah a om Atad ancilna mun a thet ciang, amate ngei hialpo khuangai in nging takin kap uh hi, tuaciang Joseph in ni sali sung khuangai kaana hun in zangh hi. 11Canaan ngammite in Atad ah tua mihingte khuangai in kap a mu ciangin, “Egypt te in a ciliap huai khuangai kaana nasia takin vawt hi ta a!” ci uh hi. Tua ahikom tua mun sia Abel Mizraim kici hi.
12Tua ahiciang Jacob thupiak bangin a tapate in seam uh hi; 13amate in Canaan ngam ah a pa luang pua in thaan mun tu in Abraham ii Hit mi Ephron tung pan a lei, Mamre nisuana sangah a om Machpelah lo sung thaankuul ah phum uh hi. #Sawl 7:16 14A pa a phum zawkciang Joseph, a suapuite le mithi phumna ah a zui theampo taw Egypt ah cia kik uh hi.
Joseph in A Suapuite Thinnuamsak
15A pa thi zawkciang Joseph suapuite in, “Joseph in hong ngaimaw lai hen a, ama tungah siatna ih vawt theampo thuk kik hong sawm thong le bang law tu ziam?” ci uh hi. 16Tua ahikom amate in Joseph tungah, “Ih pa a thi ma in, 17ama in, ‘Na suapuite ii nang tung a kong vawt khialna lian sia hesuakna taw maisak ta'n,’ ci in nang tungah hesuak ngen vun hong ci hi. Tu in na pa ii Pathian naseam kote ii vawt khialna sia pan hesuakna taw hong maisak ta'n,” ci in kam vaitha uh hi. Joseph sia hi kam vaithak a zaak ciang kap hi.
18Tua zawkciang a suapuite hong pai in, ama mai ah kun uh hi. Amate in, “Hi lai na mai ah na silate bangin om ung,” ci uh hi.
19Ahizong Joseph in amate tungah, “Lau heak vun; Pathian dinmun ah keima le keima kikoi thei ngawl khi hi. 20Note in a sia nong sawm uh hi, ahizong tua thupiang sia hu in tuni a, a nungta mihing tam mama te ii nuntakna a huu tu in, Pathian in tuasia a pha lam in hong heisak hi. 21Bangma no lau natu om ngawl hi. Note le na tate kong khoi tu hi,” ci hi. Tuabangin Joseph in a suapuite thinsung lungsung kha tu in kamthiam kamneam zanghin a suapuite thinnuamsak hi.
Joseph Thina
22Joseph, a pa innkuanpuite taw Egypt ah teang khawm tan a; kum 110 a phak ciang thi hi. 23Ama in Ephraim ii tate le tute a mu dong nungta hi. Ama in Manasseh ii tapa Machir ii tate zongh a nuntak lai in ama innkuanpui in nei hi. 24Ama in a suapuite tungah, “Kei a thi nai tu ka hi hi, ahizong Pathian in note hong keam tatak tu a, hi ngam pan, Abraham, Isaac le Jacob te tungah a ciliap huai takin a kamciamna ngam ah hong paipui nanak tu hi,” ci hi. 25Tua zawkciang Joseph in a mite kiciamna khat vawt tu in sawl hi. Ama in, “Pathian in tua ngam ah hong paipui ciangin noma taw ka luang paipui tu khu hi ci in hong kamciam tavun,” ci hi. #Pu 13:19; Jos 24:32; Heb 11:22 26Tuabangin Joseph kum 110 a phak ciang Egypt ngam ah thi hi. Amate in Joseph luang a muat thei ngawl natu in vawtin, mithi kuang khat sungah koi hi.
Currently Selected:
Pianciilna 50: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016