Ezekiel 24
24
Anhuanna Beal Kaangh Kheangh
1Sal ka tan zawk a kum kua kum, tha sawm le ni sawm ni in Topa in kei hong paupui hi. 2Ama in, “A thithei mihing awng, tuni sia bang ni ziam ci sia at in, banghang ziam cile tuni sia Babylon kumpipa ii Jerusalem khua uumci tu a kipat ni hi. #2 Kum 25:1; Jer 52:4 3Hong langpan ka mite munah Keima, Vaanglianpipa Topa ii amate atu ka sonteena sia va son tan:
Mei tungah beal suang vun a tua ii sungah tui dimh vun.
4Sabak a phabel teng
thasuk vun —
saliangte le sapheite —
a ngu limci belte zongh beal dim thasuk vun.
5A phabel tuute ii sa zangh vun;
beal nuai ah thing thut vun.
Tui sosak vun; a ngu le a sate sosak vun.”
6Hisia Vaanglianpipa Topa ii ci nop teng hi: “Mihing thatte ii khuapi sia a lal ahi hi! Ama sia a kinawt ngeingawl beal kaangh kheangh taw kibang hi. Sate bak khat zawkciang bak khat kithuuk a, khat zongh kikhe ngawl hi. 7Khuapi sungah mihing kithat hi, ahihang chisan sia leivui ii seal thei natu lei ah keesak ngawl hi. Chisan sia suang nguak tungah keesak hi. 8Tuabang a kiseal thei ngawlna munah chisan ka nusia zo a, tua in thin uuk phulaak natu suaksak hi.”
9Hisia Vaanglianpipa Topa ii ci ahi hi: “Mihing thatte ii khuapi sia a lal ahi hi! Keima mama in thingkangte ka sia to tu hi. 10Thingkang a tamzaw lai hong paipui tavun! Mei zaap vun! A sa huan vun! Satui so kangsak vun! A ngute kaanghthamsak vun! 11Tu in taau bealhawm sia a san dongin meikam tungah suang vun. Tua hile a kheangh teng kaanghin, a kok zawkciang beal sia a ngeina bang thiang kik tu hi, 12ahizong tua kheangh theampo meikuang sungah bo tuan ngawl tu hi. 13Jerusalem awng paktat ngamtatnate in nang hong niinsak zo hi. Thiansua tu in kong hanciam hangin na nin veve lai hi. Ka thin uukna a cingin na thuak mateng na thiangtho kik buatu hi. 14Keima, Vaanglianpipa Topa in ka son zo hi. Ka dian tu hun hong theng zo hi. Na maw na khialnate ka koithong buatu hi, ahibuale hesuakna ahizong, mulkimna ahizong kong nei buatu hi. Na ngamtatna sa tungah nang sia daan hong kipia tu hi.” Vaanglianpipa Topa in son zo hi.
Kamsaang pa ii Zi Thina
15 Topa in kei hong paupui hi. 16Ama in, “A thithei mihing awng, mihing na itbel khat sia thakhat thu in ka la tu hi. Phun thei ngawl tu, kap thei ngawl tu, thitui zongh taaksak thei ngawl tu ni hi. 17Naang in na om hunlam kuama in zasak heak in. Khuangaina lim na lakna in lukhu khu ngawl, peangnguakin vak heak in. Na maitang seal heak in a, a khuangaite neak ante ne heak in,” hong ci hi.
18Zing tuungin mite taw thu ka son hi. Tua nitakin ka zi hong thi a, a khuavak ni ciang hong sonsa bangin ka ngamta hi. 19Mite in, “Banghang hi bangin ngamta ni ziam hong ci hi.”
20Tua ahikom, amate tungah, “Topa in hong paupui a, 21no Israel te tungah hi kam vaithak son tu in hong sawl hi: Note in Biakinnpi ii a kip a khona sia kiphatsak pui nu hi. Mu nuamin a en tu na pai uh hi, ahizong, Topa in Biakinnpi sia minpaansak tu hi. Tuaciang Jerusalem ah na nusiat na innkuanpui khangmoite ngal sungah kithat tu hi. 22Tuasia ciang keima ngamtat sa bangma in na ngamta tu uh hi. Na maitang uh seal ngawlin, a khuangaite ii anneakte na ne buatu uh hi. 23Lukhu khu ngawl ahibuale peangnguakin vak heak vun a, khuangai ahibuale kapin om heak vun. Na mawnate hu in na hingkiam tu a, na tau hon tu uh hi. 24Tuasia ciang kei sia no atu lim lakna khat kong hi tu a; keima ngamtat babangin na ngamta tu uh hi. Topa in hite hong pian ciangin ama sia Vaanglianpipa Topa ahi hunlam he tu nu hi, hong ci hi,” ka ci hi.
25 Topa in, “Tu in a thithei mihing awng, amate kisak thei pui, a lungdamna ahi, a et nop le a haw nop, a kho Biakinnpi sia, ka lakeak tu hi. Tuaciang, a tapate le a tanute ka laaksak tu hi. 26Hi bangin ka vawt ni in, lalna sung pan a suakta khat po hong pai in, thupiangte nang hong ko tu hi. 27Tua ni in na taan sa kampau theina vaang sia na nga kik tu a, ama taw thu na son tu uh hi. Hi bangin nang sia mihingte atu lim khat na hi tu a, amate in keima sia Topa ka hi hong he tu uh hi,” ci hi.
Currently Selected:
Ezekiel 24: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
