Pusuana 32
32
Khamh Khuitalno
(Thuhil kikna 9:6-29)
1Moses mual tungah ngei hialma om in hong tuaksuk ngawl sia mipite in a mu ciang Aaron kungah kikhawmin ama tungah, “Egypt pan lam hong pui Moses hisia pa bang tat ziam ih he bua hi; tua ahikom eite lam hong pui tu in pathian khat hong vawtsak ta'n,” ci uh hi. #Sawl 7:40
2Aaron in amate tungah, “Na zite, na tapate le na tanute ii a baa khamh bilbaate suutin kei kungah hong paipui tavun,” ci hi. 3Tuaciang mi theampo in a khamh bilbaate suutin Aaron kungah paipui uh hi. 4Aaron in tua bilbaate la in tuisak a, khui milim vawtna sungah sung in khamh khuitalno khat vawt hi. #1 Kum 12:28; Sawl 7:41
Mipite in, “Israel awng, hisia in Egypt pan hong pusuapui ih pathian ahi hi!” ci uh hi.
5Tua zawkciang Aaron in khamh khuital mai ah biaknatau khat vawtin, “Zing ciangin Topa patoaina in poai kikhaam tu hi,” ci in taangko hi. 6A zing ciang zingtuungin amate in nganhing pawlkhat sangaw meihal biakpiak natu le a dangte sia kipawlkhop biakpiakna ah neak tu in hong paipui uh hi. Tua poai ah mite tokhawm in etlawm ngawl za dongin neakna dawnna le numei le pa paktatna suaksak uh hi. #1 Cor 10:7
7 Topa in Moses tungah, “Manlang in ciasuk ta'n, banghang ziam cile Egypt pan na paipui na mite khialin kei hong nial uh hi. 8A zui tu in ka thupiak lampi pan pial zo hi; khamh khuital vawtin bia uh a, sangaw biakpiakna pia zo uh hi. Amate in hisia Egypt pan a pusua pui amate ii pathian hi ci uh hi. 9Hi mihingte thinpuizia ka he hi. 10Tu in, kei hong tho tu hanciam heak in. Amate tungah ka thin uuk a, ka mongsak tu hi. Tua zawkciang nangma le na suan na paalte minam lian khatin kong vawt tu hi,” ci hi.
11Ahizong Moses in Topa a Pathian tungah hesuak ngenin, “Topa awng, na thahatna le na vaangletna taw Egypt pan na suatak, na mite tungah banghangin na thin uuksak mama thong ni ziam? #Mi 14:13-19 12A mite mual tungah that in a mot nop manin, nangma in Egypt pan pusua pui hi banghang Egypt te in ci theisak tu ni ziam? Na thin uuk thaisak in; na ngaisutna kheal in a, na mite tungah tuasiatna tungsak heak in. 13Na naseamte ahi, Abraham, Isaac le Jacob phawk in. Amate tungah ciliap huai takin na kamciam ahi, a suan a paalte van ah aksi za in tam tu a, a suan a paalte in na khapsa ngam theampo a tawntungin amate ii neisa hi tu hi, na ci thute phawk in,” ci hi. #Pian 22:16-17; Pian 17:8 14Tua ahiciang Topa in a ngaisutna khealin, a mite tungah a tawn bangin tuasiatna tungsak ngawl hi.
15Mualtung pan Moses tuaksuk a, thupiakte a mai lang le lang ah a ki at suangpheakte nii toai hi. 16Hi suangpheakte Pathian vawt hi a, a tungah thupiakte ama mama ii khet sa ahi hi.
17Mipite auna Joshua in za a, Moses tungah, “Ngiaphual sungah ngal kisimna aw ka za hi,” ci hi.
18Moses in, “Tua aw sia ngalzawna aw le hi ngawl, ngallelna aw zongh hi ngawl a; tua sia lasakna aw hi,” ci hi.
19Moses ngiaphual nai ah hong pai in khuital milim le mihingte lap a mu ciang a thinso hi. Tualai mualpeang ah, a toai suangpheakte nii lei denna nei in tamhthamsak hi. 20Moses in amate vawt khuital no la in, tuisak a, ngoaivui in tui taw hel hi. Tua zawkciang ama in tua tui Israel mite nesak hi. 21Ama in Aaron munah, “Amate in tuabang a cizathuai mawna na vawtsak natu in nang bang hong law ziam?” ci hi.
22Aaron in, “Kei tungah hong thin uuk heak in; hi mihingte ii siatna a vawt nop hamtang sia he ni hi. 23Amate in kei tungah, ‘Egypt pan hong pusuapui hi mipa Moses bang tat ziam, ih he bua hi; tua ahiciang kote hong lampui tu in pathian khat hong vawtsak ta'n, hong ci uh hi.’ 24Amate ii kizepna manpha khamhte hong paipui natu in ka sawl a, a nei peuma in suutin kei hong pia uh hi. Tua a manpha kizepnate mei sungah ka vawk a, khuitalno milim suak hi,” ci in zo hi.
25Aaron in a mite uk zawk pang ngawl a omsak sia le, a ngalte mai ah a mawmaw bangin a omsakna thu Moses in mu hi. 26Tua ahiciang Moses in ngiaphual kongpi ah dingin au a, “Topa sangah a pang peuma hi lai ah hong pai tavun!” ci hi. Tuasia ciang Levi mite theampo ama kungah kikhawm uh a, 27Moses in amate tungah, “Israel te Topa Pathian in na namsau tek taw hi ngiaphual kongpi pan a langkhat dong pai in, na suapuite, na ngualtamhte le na innpaamte thatlum tu in note theampo hong sawl hi,” ci hi. 28Levi mite in a thu ni a, tua ni in mihing tulthum bang thatlum uh hi. 29Moses in Levi te tungah, “Topa ii nasepna sungah thiampite a seam tu in na tapate, na suapuite na thalupna uh taw in noma tek tuni in kipumpiak zo na hi uh kom, Topa in note a thupha hong pia zo hi,” ci hi.
30A zing ciang Moses in mipite tungah, “A cizathuai mawna khat vawt zo nu hi. Ahizong tu in mualtung Topa kungah ka na paito kik tu a; note mawmai natu nga thei tha tu khi hi,” ci hi. 31Tuaciang Topa kungah Moses heakkik in, “Hi mite in a cizathuai mawna vawt zo hi. Amate in khamh taw pathian khat vawt in bia uh hi. 32Nong hesuakna in a mawna maisak in; ahizong na maisak zo buatu le, na mite min na khumna laibu sung pan ka min hong phiat ta'n,” ci hi. #Ps 69:28; Tpl 3:5
33 Topa in, “Ka tungah mawna a neite bek ka laibu sung pan a min ka phiat tu hi. 34Tu in pai in kong sonna munah mihingte paipui in. Ka vantunglalang in lam hong lak tu phawkin a, ahizong a hun a cin ciang hi mihingte a mawna daan ka pia tu hi,” ci in zo hi.
35Tua ahikom, Topa in mite tungah natna tungsak hi, banghang ziam cile amate in Aaron khamh khuitalno milim a vawtsak hang ahi hi.
Currently Selected:
Pusuana 32: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
