Pusuana 20
20
Thupiak Sawmte
(Thuhil kikna 5:1-21)
1Pathian in hi bang kammal teng son hi: 2“Keima in note saltanna Egypt pan hong pusuapui Topa na Pathian ka hi hi.
3“Keima simngawl pathian dang bia heak vun.
4“Vantung ahizong, leitung ahizong leinuai tui sungah ahizong note atu in na khat pawpo ii lim vawt heak vun. #Pu 34:17; Thiam 19:4; 26:1; Thkna 4:15-18; 27:15 5Milim khat pawpo mai ah kun heak vun, ahibuale bia heak vun, banghang ziam cile keima in Topa na Pathian ka hi a, hong demte ka dual bua hi. Kei hong ngaimawte le amate ii a suan a paalte tungah khang thum khang li dongin daan ka pia tu hi. #Pu 34:6-7; Mi 14:18; Thkna 7:9-10; 20:7; Thiam 19:12; 20:8; Pu 16:23-30; 31:12-14 6Ahizong kei hong it in, ka thukhamte a zuite ahile ka itna a khang tul tampite tungah ka lak tu hi.
7“Keima min, a sia vawt natu in zangh heak vun, banghang ziam cile keima Topa na Pathian in ka min a zangh khial pawpo daan ka pia tu hi.
8“Sabbath tang vun a, tua ni thiangthosak vun. 9Note na na sep natu in ni luk na nei uh a, #Pu 23:12; 31:15; 34:21; 35:2; Thiam 23:3 10ahizong a ni sali ni sia keima atu a kikoituam tawlngak ni ahi hi. Tua ni in kuama — nangma, na tate, na silate, na ngannote le na ngam sungah hong teang ngamdangmite khat zongh in naseam ngawl tu uh hi. 11Ni luk sungin Keima Topa in leitung, vantung, tuipi le tuate sung a om theampo ka vawt a, ahizong ni sali ni in ka tawlnga hi. Tua ahi hu in Keima, Topa in Sabbath thupha pia in tua ni ka thiangthosak hi. #Pian 2:1-3; Pu 31:17
12“Keima kong piak ngam le lei ah khansau in na nuntak thei natu in na nu le na pa zakta vun. #Thkna 27:16; Mt 15:4; 19:19; Mk 7:10; 10:19; Lk 18:20; Eph 6:2; Eph 6:3
13“Mihing that heak vun. #Pian 9:6; Thiam 24:17; Mt 5:21; 19:18; Mk 10:19; Lk 18:20; Rom 13:9; Jas 2:11
14“Palngul mawna vawt heak vun. #Thiam 20:10; Mt 5:27; 19:18; Mk 10:19; Lk 18:20; Rom 13:9; Jas 2:11
15“Nguta heak vun. #Thiam 19:11; Mt 19:18; Mk 10:19; Lk 18:20; Rom 13:9
16“A maan ngawlin khat pawpo mawsiat heak vun. #Pu 23:1; Mt 19:18; Mk 10:19; Lk 18:20
17“Midang khat ii inn lungngul heak vun: a zi, a silate, a khuite, a laate ahibuale a neisa khat pawpo lungngul heak vun,” ci hi. #Rom 7:7; 13:9
A Mite ii Launa
(Thuhil kikna 5:22-33)
18Mipite in khualeng vanto le lemle awngingte za in, khualeng le meikhu suak mual a mu ciang, lau in liing a, a khualana ah ding uh hi. #Heb 12:18-19 19Amate in Moses tungah, “Nangma in ko nong paupui le kong ngai tu uh hi; ahizong Pathian in kote hong paupui le ka thi tu lau khu hi,” ci hi.
20Moses in, “Lau heak vun! note na khial ngawl natu hong sit tu in Pathian hong pai hi bek a, ama thu ni tawntung tu in hong vawt hi,” ci in zo kik hi. 21Ahizong mipite a khualana ah ding veve a, Pathian omna meeivom nai ah Moses bek pai hi.
Biaknataute taw kisai Thukhamte
22Israel te tungah Moses ii son tu in Topa in thupia a: “Keima, Topa in vantung pan note kong paupui na zia mu zo ni hi. 23Keima nong biak banah note biak tu in ngunn le khamh pathiante vawt heak vun. 24Lei taw kivawt biaknatau khat kei atu in vawt vun a, na tuute le na khuite taw meihal biakpiakna le kipawlkhop biakpiaknate tua biaknatau tungah pia vun. Kei nong biak natu in kong koi tuamsak mun teng ah kong pai tu a, thupha kong pia tu hi. 25Kei atu in suang taw biaknatau na vawt uh ahile, a ki attan suang taw sa heak vun, banghang ziam cile suang tungah sikkhu na zak uh ciang tua suang sia kei atu in zak tham man ngawl sua nu hi. #Thkna 27:5-7; Jos 8:31 26Kei atu biaknatau na sak uh ciang a tungah kaato natu in keallei vawt heak vun; na vawt uh le a tung na kaato uh ciang noma sealno teng kilanghsak tu nu hi.
Currently Selected:
Pusuana 20: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
