Ephesus te 2
2
Thina pan Nuntakna
1A bosa hun sungah note in na thunit ngawl hang le, na mawnate hangin thaa lamsang ah a thisa na hi uh hi.#Col 2:13 2Tua hunlai in note in, leitung ngitlona zia na zui uh hi; van awng sungah thaa vaangletnate a ukpa thu na ni uh hi, tua thaa in tu laitakin Pathian thu a ni ngawl mihingte a uk sia ma ahi hi. 3A tatakin eite zongh, amate bang ih hi ngei a, ih pianpui lungngulnate taw ih nungta zo hi, ih pumpi le ih thinsung taw a kisi bangin ih seam ih vawt hi. Ih pianlim in ngualdang bangma in, Pathian thin uukna thuak tu in, a kiciangtan sa ih hi hi.
4Ahihang Pathian ii hesuakna sia kicing lawlawm a, tuaciang eite hong itna sia lian mama hi. 5Tua hi a eite ih thunit ngawlna taw thaa lamsang ah a thisa in ih om laitak Christ taw hong nungtasak kik hi. Pathian ii thuthiamna taw note hong kingum zo hi. 6Christ Jesus taw pumkhat ih hina taw vantung ngam ah ama taw a uk khawm tu in, Pathian in eite ama taw hong thosak zo hi. 7Hi bangin a sepna sia Christ Jesus sungah hong kilak, ki itna sungah a om, a tuanin a lian saap thuthiamna sia hong pai tu hun theampo ah a kikhomsuan tu ahi hunlam hong lakna ahi hi. 8-9Banghang ziam cile note in upna tungtawnin Pathian ii thuthiamna taw ngup sa na hi uh hi. Tua in note hanciamna hang hi ngawlin, note kisuantaak thaak ngawl natu in Pathian letsong ahi hi. 10Eite in tu a ih hi babangin, Pathian hong vawtsa ih hi a, Jesus Christ taw kipumkhatna sungah ngamtat pha nuntakna nei natu in, hong bitphua sa ih hi hi, tua thu in eite sep tu in, hong koi kholsak sa ahi hi.
Christ sungah Pumkhat
11Amate le amate “Vunteap atte” (Pate ii amate pumpi tungah a vawtte cinopna) a kici Jew te in “Vunteap at ngawlte” hong ci, pianna suana pan Gentile te ahi note in, hun bosa sungah na omzia uh kiphawk tavun. 12Tua hunlai in note in Christ taw kikhenin a omte na hi uh hi. Note in ngamdangmite na hi uh a Pathian ii tealsa mihingte na hi bua uh hi. Pathian ii mihingte tungah a kamciamte a bulphu thuciamnate sungah na kihel bua uh a, note in hi leitung ah lametna sel le Pathian selin na nungta uh hi. 13Ahihang tu in, Christ Jesus taw na kipumkhat uh hu in, a khuala a om ngeisa note sia Christ ii chisan hu in a nai hong kithen zo hi. 14Banghang ziam cile Christ ama mama in, Jew te le Gentile te minam khat hong suasakna taw eite tungah kilemna hong puak zo hi. Amate a khen, ngal a suaksak kidoina pang sia ama pumpi taw sutham zo hi. 15Ama taw kipumkhatna hangin, minam niite sung pan, a thak minam khat a bitphua thei natu in, minam a doi Jew te ii thukhamte, a thupiakte le a zui tute theampo phiatin hong kilemsak hi.#Col 2:14 16Thinglamtee tungah Christ a thi ciangin amate kilaklaw ah kingal vawtnate lalthamsak hi; ama ii thinglamtee hangin, tua minamte ngeal sia pumkhat a suak tu in ngawmtua a, Pathian kungah zotpui kik hi.#Col 1:20 17Tua ahikom Christ hong pai in Pathian taw a kikhuala, no Gentile te tung le Pathian taw a kinai Jew te tungah kilemna thu ahi Lungdamna Thupha hong hil hi.#Is 57:19 18Christ tungtawnin eite theampo, Jew te ih hi a, Gentile te ih hi zongin, Thaa khat sungah Pa omna ih theng thei hi.
19Tua ahikom, Gentile te sia, ngamdang mi, khualmi hi nawn ngawl a; tu in note in Pathian ii mihingte taw ngam mipui, Pathian innkuan sungah a kihel mihingte na hi uh hi. 20Note zongh, sawltakte le kamsaangte ii cian phungkawng tungah a kisate na hi uh a, tua phungkawng, innking suangpi sia Christ Jesus ahi hi. 21Ama in inn bup a lenpa hi a, khangtosakin Topa tungah a ki aap biakinn thiangtho a suaksakpa ahi hi. 22Ama taw na kipumkhatna sung uh ah note zongh, Pathian ii a Thaa taw a teenna munah ngualdangte taw hong kisa khawm hi.
Currently Selected:
Ephesus te 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016