Thuhilsya 4
4
1Tuaciang hi leitung ah a piang thumaan ngawlna theampo ka en kik hi. A kivawtsiate kakap a, kuama in hu ngawl hi. Kuama in amate hu ngawl tu hi, banghang ziam cile amate a vawtsiate in thahatna nei hi. 2A thi le a bo sate ka eang hi, a nungta laite sangin amate nuamsa zaw pek hi. 3Ahihang tuate sangin a hamphazaw laite sia hi leitung ah a piang thumaan ngawl a mu ngeingawl, a piang ngawl laite ahi hi.
4Mihingte in ngual a zaw natu in banghangin nasia tak na seam ziam ci zongh ka tel zo hi, banghang ziam cile a innpaamte a een hang ahi hi. Ahihang tuasia in a luithawthong ahi hi. Tuasia in vuiva del taw kibang hi. 5Mihing khat pukthi liang dongin leekoai in a omcipna sia mawmawt vai hi, amate in ci hi. 6Tua zongh hi thei tha tu hi, ahihang vuiva man nuam a, khut nii taw komlaak tawntung sangin thinnopna taw, tawmno ih nei sia phazaw hi.
7Nuntakna sungah luithawthong ahi, thudang khat zongh ka mu hi. 8Hi sungah ama nguakin a teang khat om hi. Ama in tapa le nei ngawl, suapui le nei ngawl hikale ama sia na seam tawntung a, bangma hunin a hauna taw lungkim ngeingawl hi. Ama le ama nopsaknate nialin, akua atu in nasia takin na seam ziam? Tuasia zongh luithawthong hi a, tuaciang a ngim huai mama nuntakzia ahi hi.
9Khat sangin nii phazaw hi, banghang ziam cile amate ngeal in a kizen zaw in naseam khawm thei hi. 10Amate khat a puk le a dang khat in phongto thei hi. Ahihang khat nguak a om khat sia puk le mansa hi lel hi, banghang ziam cile kuama a hu tu om ngawl hi. 11Khua a sik le nii lumkhawm leang khualum thei hi, ahihang nang nguak bangbangin na khua lumsak thei tu ni ziam? 12Khat nguak ii lel tu kisimna sia nii in zo thei hi. Khauzam thum taw a kipheak khauzeen sia a tat tu haksa hi.
13-14Mihing khat sia zawnna panin a ngam ii kumpi suak tu in khangto thei a, ahibuale thonginn pan kumpi tokhum dong kaato thei hi, ahizong a khan haam ciang ngual ii ngaisut pha piakte saan ngawl tu dongin a mawmaw le, tua pa sangin khangmoi a zawng a pil khat phazaw hi. 15Hi leitung ah a teang mihing theampo ka ngaisun a, amate sungah kumpipa ii dinmun a la tu khangmoi khat a om sia ka phawk hi. 16Kumpipa khat ii a uk mihingte sia kisim zo ngawl tha tu a, ama a thi zawkciang ama nasep sate hangin a lungdam khat beak om ngawl tu hi. Tuasia in luithawthong ahi hi. Tuasia in vuiva del bang ahi hi.
Currently Selected:
Thuhilsya 4: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
