Thuhil kikna 7
7
Topa ii Aituam Mite
(Pusuana 34:11-16)
1“Topa na Pathian in na laak tu uh ngam ah hong paipui tu a, ama in tua ngam pan minam tam mama notkeak tu hi. Mainawt in na pai uh kawmin ama in note sang a lianzaw le a thahat zaw minam salite ahi: Hit te, Girgash te, Amor te, Canaan te, Periz te, Hiv te le Jebus te notkeak tu hi. #Sawl 13:19 2Topa na Pathian in, hi mite na khutnuai ah hong koi a, noma in na zaw uh ciang a vekpi that nanak tu nu hi. Amate taw kipawlna vawt heak vun a, hesuak peuma heak vun. 3Amate kuama teenpui heak vun, tuaciang na tate in amate kuama teenpuisak heak vun, 4banghang ziam cile tuasia ciang, amate in na tate uh pathian dang a bia tu in, Topa kung pan lam pialpui tu uh hi. Tua bangin a piang le Topa thin uukin thakhat thu noma hong thatlum tu hi. 5Tuabang ahiciangin amate ii biaknataute baltham vun, a suangkhuam thiangthote saattham vun, a numeipathian Asherah lim zentham in, a milimte haltum vun. #Thkna 12:3 6Hi bang vawt vun, banghang ziam cile note Topa na Pathian neisa hi nu hi. Leitung mi theampo sung pan ama aituam mi in note hong teal hi. #Pu 19:5; Thkna 4:20; 14:2; 26:18; Tit 2:14; 1 Pe 2:9
7“Midangte sang na tam zawk uh manin Topa in hong it a, hong teal hi ngawl hi; leitung ah minam citawm belte na hi uh hi. 8Ahizong Topa in note hong it a, na taanghpupite tungah a kamciam taangtungsak nuam hi. Tua ahikom ama in note a thahatna lian taw hong hun a, Egypt kumpipa sila panin hong suaktasak hi. 9Topa na Pathian sia Pathian khat bek ahi hunlam le ama ii thumaanna phawk vun. Ama in a thuciam keamcing tu a, ama a itte le a thupiakte a zui mihingte khang tulkhat dongin a itna kip lak tu hi, #Pu 20:5-6; 34:6-7; Mi 14:18; Thkna 5:9-10 10ahizong ama a ngaimaw te daan a piak tu haisaang ngawl tu hi. 11Tu ciangin, hong kihilna sate ni tavun a; tuni a kong piak thukham theampo zui tavun.
Thunitna ii Thuphate
(Thuhil kikna 28:1-14)
12“Hi thupiakte ngai in, thumaan takin na zui uh le, na taanghpupite tungah a kamciam bangin Topa na Pathian in noma taw a thuciamna keam suak tu a, a itna kip hong lak tu hi. #Thkna 11:13-17 13Ama in hong it in thupha hong pia tu a, pungin ta tam mama na nei tu uh hi; ama in na lote thupha pia tu a, lo ante, sapittui le olive thaute na nei tu uh hi; ama in khuite le tuu tam mama piakna taw thupha hong pia tu hi. Noma hong piak tu in na taanghpupite tungah a kamciamsa ngam le lei ah hi thupha theampo hong pia tu hi. 14Note bangin thupha tamzaw a saang hi leitung ah kuama om ngawl tu hi. Note na hi uh zong, na ngannote ahizong taciing om ngawl tu hi. 15Topa in natna theampo pan hong dal tu a, Egypt ah na thuak uh a kiitakhuai natnate khat zongh no tungah hong tungsak ngawl tu a, ahizong na ngalte theampo tungah tuate tungsak tu hi. 16Topa na Pathian ii na khut sungah hong piak minam theampo mon vun, hesuak heak vun. A pathiante bia heak vun, banghang ziam cile thitheina piang tu nu hi.
17“Hi mite ei sang tamzaw a, ih notkeak zo buatu hi ci heak vun. 18Amate kiita heak vun; Topa na Pathian in Egypt kumpipa le a mite tungah a vawt thute phawk vun. 19Na mittang taw na mu a kiitakhuai natnate, nalamdang lakna te, a lamdangte le Topa na Pathian ii no hong suataksakna, a vaangletna le a thahatna phawk vun. Egypt te a thalup bangma in ama in tu a na kiitak uh hi mihingte theampo mon tu hi. 20Ama in amate sungah patauna ngawngawn piangsak tu a, suakta in a buu mihingte zongh mon siat tu hi. 21Tua ahiciang hi mite kiita heak vun. Topa na Pathian sia note taw omkhawm hi; ama sia a lian Pathian hi a, ih kiitak tu pa ahi hi. 22Mainawt in na pai uh kawmin ama in hi minamte tawtawm, tawtawm in notkeak tu hi. Note in thakhat thu in amate theampo na mon thei buatu uh hi, banghang ziam cile tuabang na hi uh le ngamsate hong tam seseam tu a, note atu in lauhuai vaial tu hi. 23Topa in na ngalte na khut sungah hong pia tu a, amate a kilalcipsak siat mateng in amate patausak tu hi. 24Ama in a kumpite na khut sungah hong koi tu hi. Na thatlum tu a, amate kimangil tu hi. Kuama in note hong khaktan zo ngawl tu hi; a vekpi na lalcipsak siat tu uh hi. 25A milimte hal vun. Tua milim tungah a om khamh le ngunnte dei heak vun a, noma atu in la heak vun. Na la uh le note atu in thina piang tu hi, banghang ziam cile, milim biaknate Topa in huatsa hi. 26Hi milimte khat zongh na inn ah ciapui heak vun, na ciapui uh le amate tungah haamsiatna sia ma note tungah tung tu hi. Hi milimte zawngsak in na ensan tu uh hi. banghang ziam cile tuate sia Topa haamsiatna nuai ah om hi.
Currently Selected:
Thuhil kikna 7: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
