Amos 4
4
1A thaneamte vawtsia a, mizawngte a nengniam, na pasalte ii zuhang hong piak tan tu a ngen, pha takin a kivaak, Bashan a khuipuite bangin a thau, no, Samaria numeite awng, hi thu ngai vun! 2Vaanglianpipa Topa thiangtho ahi bangma ama in, “Amate in note thikkoai taw hong kai tu hun hong theng tu hi; note khat simin ngasa tangthaakna thikkoai khat tung a awk ngasa khat bang hi tu nu hi. 3Luphung hawngvang nai belna ah note hong kikai keak tu a, a pua ah hong kilawnthal tu hi,” ci in hong kamciam zo hi.
Israel ii Thuheak Laakna
4Vaanglianpipa Topa in, “Israel mite awng, na hi nuam vangaat uh le mun thiangtho Bethel ah pai in mawna khialna vawt tavun! Gilgal ah pai vun a, na tha neiza uh taw maw tavun! Paisuak vun a, zing khat zawk ciangin zing khat sangaw biakpiak tu ngannote hong paipui tavun, ni thum simin na sawm a khat hong paipui tavun. 5Paisuak vun a, Pathian tungah lungdamkona in na anluumte pia vun a, na piak thua uh biakpiaknate tungtaang ah kisuangtaak vun! Hisia in na sep thanop uhte nam ahi hi.
6 Topa in, “Na khuapite theampo tungah kialpi a tungsak sia keima khi hi, ahihang kei kung nong zuan kik bua uh hi. 7Na lo ante ii kisapbel hun laitakin nguatui ka hangsak hi. Khuapi khat sungah ngua ka zusak a, khat sungah ngua ka hangsak hi. Lo khat sungah nguazu a, a dang lo khat kocip hi. 8Dangkona taw tha zawmin, khuapi tam ma ii mite sia khuapi khat ah tui mu tu ki um in a pai uh hang neakkhom tu a om bua hi. Tua hi napi, kei kung nong zuan kik tuan bua lai uh hi.
9“Na lo ante nguataksak tu in vuisa ka vasak hi. Khaumawte in na huan an le sapitkung te, na theikung le olive kung te netum uh hi. Kei kung nong zuan kik bua lai uh hi.
10“Pul natna khat Egypt ah ka tunsak bangin no tungah kong tungsak hi. Na khangnote ngal sungah ka thatlum a, na siphu te ka la hi. Na ngiaphual uh ah mithi uih taw na naakvang kong dim hi. Tuabang hi napi kei kungah nong heak kik tuan bua lai uh hi.
11“No pawlkhat sia Sodom le Gomorrah ka suksiat bangin kong susia hi. No a thi mong teng sia meikhuk khat pan a kiteen thingkhua kaanghmong bang na hi uh hi. Tua hi napi, kei kung nong zuan kik tuan bua lai uh hi,” ci hi. #Pian 19:24 12“Tuabang ahikom, Israel mite awng, note daan hong pia tu khi hi. Hi sia vawt tu ka hi ciang ka thukhenna thuak tu in kinging sa in om vun!” ci hi.
13Pathian in mualte a vawt pa le vuite a bitphuapa ahi hi.
Ama in a ngaisutnate mihing in hesak hi;
ama in sun sia zan suaksak hi.
Ama in leitung saangnate tungah vak hi.
Hisia ama min hi: Vaanglianbelpa Topa Pathian ahi hi!
Currently Selected:
Amos 4: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016