Sawltakte 27

Paul Teambaw taw Rome ah pai

1Italy ah teambaw taw pai tu in a kikhensat zawkciang Paul le thongtaak dang pawlkhat sia “Kumpilianpa ii ngalkaphon” a kici Roman ngalkapte ii ngalkap bu Julius tungah amate in aap hi. 2Adramyttium pan teambaw khat tungah ka kaato uh hi, tuasia in Asia ngamkhen a teambaw tawlngakna sang zuan tu in a kithoai teambaw hi a, tua taw ka ding uh hi. Thessalonica khua pan, Macedonia mi Aristarchus taw ka ton uh hi. 3A zingsang ciangin, Sidon ka theng uh hi. Julius sia Paul tungah hong dik a, a kitaangsap pawpo a kipiak thei natu in, a lawmte kungah hawsak thei hi. 4Tua mun panin ka paisuak uh a, ko sangah vui hong lee vak ahikom, a kibeal theina Cyprus tuikulh pangh vui kidalna mun tawnin ka pai uh hi. 5Cilicia le Pamphylia hui panin, tuipi ka kan uh a, Lycia ngam Myra khua ka theng uh hi. 6Tua munah ngalkap bupa in, Alexandria pan Italy ngam a zuan tu teambaw khat mu a tua teambaw tungah hong kaasak hi.

7Ni tam ma dam takin, ka pai uh a, a khakbel ciangin, Cnidus khua hui dong haksa pi in ka theng uh hi. Tuak sangah ka paitan thei ngawl natu in, vui in hong khak ahikom, Salmone leidok hui panin Crete tuikulh pangh vui kidalna mun bealhin ka paisuk uh hi. 8Tuipi vaalbo ka neak uh a, Lasea khua pan a kikhuala ngawl Muanhuai Teambaw tawlngakna kicina mun haksa pi in ka theng uh hi.

9Tua munah ni tam mama taam ka hi uh kom, tu in Mawsuutna Ni zongh kan zo a, tui lam taw khualhaw tu sia lauhuai hi. Tua hikom, Paul in amate sia hi ngaisutna pia hi. 10“Pasalte awng, ih khualhawna sia, hi sung pan kipan, lauhuai tu in ka mu hi; vanhte le teambaw ii tungah siatna lian piang tu a, mihing thina zongh om tu hi,” ci hi. 11Ahihang ngalkap bupa in, teambaw ukpa le a neipa thuson um zaw a, Paul sonte sia a thupi laak bua hi. 12Teambaw tawlngakna mun in phalbi sung om natu a phabel mun ahi bua hi; tua ahikom, mihing a tamzaw in, ahithei le, tuipi tungah paisuakin phalbi sung teng a om thei natu mun Phoenix thet tu hanciam nuam uh hi. Crete a om Phoenix teambaw tawlngakna sia nitumna thangsang le nitumna saksang maingat hi.

Tuipi sungah Suangval

13Thangsang panin vui hong va vahiau a, mihingte in a tupna uh bangin, pai thei tu in ki um uh hi. Tua ahikom tawlngaksakna thikkip dokto in, Crete vaalbo hui a neak thei zaza neakin pai uh hi. 14Ahihang hai ngawlin, “Nisuana saksang vuipi” kici, vui thahat khat tuikulh panin hong vasuk hi. 15Vui in teambaw sawn a, vui sang maingat in, kipai thei nawn ngawl ahikom, hanciam tuan nawn ngawlin, vui ii seamna pawpo ah ka pai uh hi. 16Cauda tuikulh no ii thangsang ka kan uh ciangin, belh natu tawm om hi. Tua munah teambaw taw a kikop ngunkuang sia haksa pi in, a lal ngawl natu in ka huu zo uh hi. 17Amate in teambaw tungah tuasia kaito in, teambaw kiimkot khauzeen pawlkhat taw sawmcip uh hi. Amate in, Libya ngam sen vaalbote phulin teambaw a awk tu lau uh hi. Tua ahikom amate in, teambaw puankhakte, luak in, vui ii sawnna pawpo ah pai tu in a om uh hi. 18Suangval thahat sia, hong kizom tan ahikom, a zing ciangin, teambaw sungah a puak uh vanh pawlkhat tuipi sungah khia uh hi, 19a zing ciangin teambaw taw kisai vanhzak pawlkhat tuipi sungah khia uh hi. 20Ni tam mama hun sung, ni ahizong, aksi ahizong, ka mu thei bua uh hi. Tuaciang vui nasia takin hong va tan hi. A khakbel ciangin, suatak natu lametna bangma ka nei nawn bua uh hi.

21Mihingte sia an ne ngawlin, khuangei a om zawkciang, Paul in amate mai ah dingin, “Pasalte awng, ka thuson hong ngai pole uhte a, Crete panin din awl hi po leang hiza supna le lalna taw kipeal tu ve hing. 22Ahihang tu in kong thuum hi. Na thin uh liansak vun! Note khat zongh in, na nuntakna taan ngawl tu nu hi; teambaw bekma kisumh tu hi. 23Banghang ziam cile ama ii neisa ka hi a, ka biak Pathian ii vantunglalang khat tu zanin hong pai a, 24‘Paul awng, lau heak in! Kumpilianpa mai ah na din kul tu hi. Pathian in nang tungah hong phatna taw na khualhaw pui theampo ii nuntakna suatak zo ni hi’ hong ci hi. 25Tua ahikom, pasalte awng, thinlian vun! Banghang ziam cile, Pathian ka muang a, kei tungah hong kison bangin, tung tu hi, ci in ka um hi. 26Ahihang eite sia tuikulh khat ii vaalbo ah hong kisawn tu hi,” ci hi.

27Ni sawm le ni li ni zanin, vuipi suangval in, Mediterranean tuipi sungah ko hong then hi. Zankim hun khawngin, teambaw naseamte in, lei taw kinai zo vak hing, ci in ummaw uh hi. 28Tua ahikom khau khat ii tungah, a ngit khat sawm a, a khiaksuk uh le, metre 40 thuk hi ci in mu hi; tawmvei zawkciangin, a tee kik uh le metre 30 thuk hi. 29Amate in teambaw sia suangpi tung a tot thaak tu lau ahikom, teambaw nungsang panin, tawlngaksakna thikkip li khia suk a, khuavak natu in, thungen uh hi. 30Tua zawkciang teambaw naseamte in, teambaw panin a suatak natu in, hanciam uh hi; ngunkuang sia tui sungah khiasuk in, teambaw maisang panin, tawlngaksakna thikkip pawlkhat khia tu bangin kiheang uh hi. 31Ahihang Paul in ngalkap bupa le ngalkapte munah, “Hi teambaw naseamte sia teambaw tungah a om po bua uh le, no suatak natu lamet om ngawl hi,” ci hi. 32Tua ahikom a ngunkuang khii na khau attan uh a, ngunkuang sia tui in taisak uh hi.

33Khua hong vak mahiat in, Paul in a vekpi in, an tawm tek a neak natu in thuum a: “Tu in ni sawm le ni li ngak zo nu hi. Hi hunsung teng bangma neak nei ngawl nu hi. 34Tua ahiciang an tawm tek na neak natu uh in, kong thuum hi; na thi ngawl natu in, an kitaangsamh hi. Na lu tung a samzam khat zongh, sum ngawl tu nu hi,” ci hi. 35Hi bangin a ci zawkciang, Paul in anluum pawlkhat la in, Pathian pok in, amate theampo mai ah balneen in ne tu in kipan hi. 36Amate a thinlian a, mihing simin anluum ne uh hi. 37A vekpi kingawm in, mihing 276 teambaw tungah ka om uh hi. 38Mihing simin, an a neak siat zawk uh ciangin, amate in zungtaang teng tuipi sungah vawkin teambaw vanh zaangsak uh hi.

Teambaw Kisia cip

39Khua hong vak ciangin, teambaw naseamte in, vaalbo a tel meal bua uh hi. Ahihang amate in, vaalbo a nei tuidok khat mu ahikom, ahithei le tua munah teambaw sia kingaksak sawm uh hi. 40Tua ahikom amate in tawlngaksakna thikkipte ii khau attan in, tui sungah khiasuk uh a, teambaw heaknate sawmna khau a phel paih uh hi. Tua zawkciang vui in teambaw sia, a mai sangah a sawn natu, amate in teambaw mai sangah puan khai a, tuaciang vaalbo sang ka manaw uh hi. 41Ahihang teambaw in sen bo khat phul a, lei ah kinga hi; teambaw maisang sia awk in, a tung thei nawn bua hi. Tua laitakin tuihual nasia mama ahikom, teambaw nungsang teng a bebek in tamhtham hi.

42Ngalkapte in, thongtaak theampo tui op a, vaalbo ah a suatak ngawl natu in, thalup sawm uh hi. 43Ahihang ngalkap hon ukpa in, Paul hunnuam ahikom, tuabangin a ngamtat ngawl natu in tho hi. Tua hi ngawl zaw in, tui op thei peuma, teambaw tung panin, leangin, vaalbo dong tui a op natu thupia hi; 44a dangte in zui in, thingpheak ahizong, teambaw bek ahizong, a pom tek natu thupia hi. Hi bangin ka vekpi ma vaalbo ah ngammuang takin ka theng uh hi.

Currently Selected:

Sawltakte 27: SCB2

Highlight

Copy