2 Samuel 4
4
Ishbosheth Kisuamlum
1Hebron khua ah Abner kisuamlupna thu, Saul ii tapa Ishbosheth in a zaak ciang lau mama a, Israel mite theampo patau uh hi. 2Ishbosheth in ulian nii nei a, ngalsim lampuite veu ahi hi, amate Benjamin nam, Beeroth khua pan Rimmon ii tapate hi a, Baanah le Rechab ahi uh hi. (Beeroth sia Benjamin ngam in kiciamtee hi. 3A teangciil te sia Gittaim ah a tai pan kipan tua munah teang uh hi.)
4Saul ii suan le paal dang khat sia Jonathan ii tapa Mephibosheth hi a, kum nga a phak laitakin Saul le Jonathan ngal sungah kithat hi. Jezreel khuapi panin amate ii thina a kizaak ciang, ama a omh nu in zamh a taipui hi; ahihang ama manlang nuam mama ahikom a nau taaksua tha a, a peangbai khat suak hi.#2 Sa 9:3
5Rechab le Baanah te Ishbosheth inn ah a haw tu in hong pai in, sun hun ama ii tawlngak laitakin tualai ah theng uh hi. 6Numei kongkhacing sia zungtaang kheapin a omna ah lusu in mu zo hi, tua ahikom Rechab le Baanah te tum ku uh hi. 7Amate inn sung hong thet poma ciang Ishbosheth ii lupna inndoi sungah tum in, ama mutthip in om sia thatlum hi. Tua zawkciang a lu tansak a, Jordan Kuam zui in zankhua paipui uh hi. 8Amate in a lutang sia Hebron ah David pia a, “Nang hong that tu a hanciam na ngalpa Saul ii tapa Ishbosheth lutang hi sungah om hi. Tuni in Topa in kumpipa nang sia Saul le a suan a paal te tungah phulaak tu hong oai hi,” ci uh hi.
9David in, “Launa theampo pan hong hun a nungta Topa taw ka kiciam hi! 10Kamtaipa sia kei kung Ziglag ah hong pai a, Saul ii thina sia lungdamhuai thu sa in kei hong son hi. Ama man in thatsak khi hi. Ama hong puak lungdamhuai thu hu a, tel ka piak sia tuabang hi! #2 Sa 1:1-16 11Mawnei ngawl, ama inn sungah a mu mihing khat a suamlum mi ngilote atu in bangza in sia zaw lai tu ziam! Tu in ama na suamlup uh hu in a phulamsak tu khi hi, tuaciang no sia lei maitang panin hong zutmaai tu khi hi!” ci in zo hi. 12David in thupia a, a ngalkapte in Rechab le Baanah te thatlum in, a khutte a peangte a tansak zawk uh ciang, Hebron tuicing hui ah khai uh hi. Amate in Ishbosheth lutang la in Hebron khua Abner ii thaankuul ah phum uh hi.
Siyin Chin Bible © Bible Society of Myanmar, 2016