2 Corinth te 12
12
Paul ii Mukholnate le Thupualaaknate
1Bangma phattuamna om ngawl ahitazong, ka kisuangtaak kul tu hi. Ahihang tu in Topa hong piak mukholnate le thupualaaknate huvau kong son tu hi. 2Tu nung kum sawm le kum li lai in Tapidaw khat sia vantung a saang belna ah kila to hi ci in ka he hi. (Hisia in a piang tatak ma ziam maw, mukholna khat nei ahi ziam ci sia ka he bua hi — Pathian bek in he hi.) 3-4Khatvei hong ci kik leng, hisia pa sia Paradise ah kila to hi ci in ka he hi. (Tusia zong a piang tatak ma ziam maw mukholna nei ziam ci sia ka he bua hi — Pathian bek in he hi.) Tua munah kammal taw a kilo thei ngawl, mihing kam le muk ii son thei ngawl kamte ama in za hi. 5Tua ahikom hisia pa huvau ka kisuangtaak tu hi — ahihang ka thazawmna hong kilanghsak thute simngawl keima tungtaang ah ka kisuangtaak buatu hi. 6Hi ka son thu in thumaan ahikom, kisuangtaak nuam leng zong a mawmaw ka hi tuan buatu hi. Ahihang kisuangtaak ngawl tu khi hi, banghang ziam cile ka pauna hong kizaakna le ka sepna hong kimuna za sangin a vaalin kuama ii hong thupi ngaisut tu ka dei bua hi.
7Na lamdang tam mama ka mute hu in, kiphatsakna taw ka kisakthei ngawl natu in keima pumpi sungah hong zo tu in Satan sawltak khat bangin na a seam, a bot pumpi natna khat hong kipia ahikom, ka kiphatsak ngawl natu in hong khaam hi. 8Hisia hong laak keaksak natu in tua huvau Topa tungah thumvei thu ka ngen hi. 9Ahihang ama ii hong zona in: “Ka thuthiamna in nang atu in kicing hi, banghang ziam cile na thazawm ciangin keima vaang sia lianbel hi,” hong ci hi. Christ ii vaangletna in kei tung panin hong dalna ka phaw natu in, ka thazawmnate hu in ka kiphatsak sia ka lungdam belna ahi hi. 10Christ atu in thazawmna, kiselnona, haksatna, vawtsiatna le buainate ah ka lung a kim hi. Banghang ziam cile ka thazawm ciangin a thahat ka suak hi.
Corinth te atu Paul ii Thinbotna
11Keima sia a mawmaw bangin ka ngamta hi — ahihang noma in tuabang a ngamta tu in nong vawt uh hi. Note in kei nong deina a lak tute na hi uh hi. Banghang ziam cile bangma ka hi ngawl hangin, note ii a lamdang tuamin na ngaisut uh “sawltakte” sangin ka nozaw tuan bua hi. 12Sawltak ka hina a kilak natu in nalamdang laknate le a lamdangte tam mama note sungah hong kivawtte sia thinsauna tatak taw hong kivawt ahi hi. 13Sum taw huna tu kong konlaw ngawl sia simngawl, pawlpi dangte sangin a siazaw in kong vawtna bangbang om ziam? Nong hesuakna in tuabang ka phat ngawlnate hong maisak tavun!
14Tu in no kungah hong haw tu in thumvei ka kithoai zo a — note tungah bangma kong ngen buatu hi. Ka dei sia in na sum na paai uh hi ngawl a, noma mama na hi uh hi. A tatakin ci leang tate in nute pate a vaak tu hi ngawlin, nute pate ii tate a vaak tu hizaw hi. 15Ka nei theampo ka nuntakna dongin note kong hu natu in lungdam takin ka zangh siat tu hi. Tua za in kong it mama hu in, nong itna uh khiam zaw pumsai tu nu ziam?
16Tua zawkciang kei sia note atu in vanhngit ka hi ngawlna maan na sa tu uh hi. Ahizong khat po in kei sia theamna zangh thei a, leilotnate taw note hong aitaa hi hong ci tu hi. 17Kamtai kong paisakte khat po tungtawnin note tung panin noptuam kong la ziam? 18Titus in hong pai in, Tapidaw suapui dang khat hong tonpui natu in keima nget ahi hi. Titus in a kilawm ngawlin, no tung pan laak hong nei ci tu nu ziam? Ama le kei sia a kibang tupna te tungtawnin a kibangin ngamta hi ngawl khu ziam?
19Note mai ah a tawntungin koma le koma kipanghong bangin, nong ngaisun tha tu uh hi. Hi ngawl hi! Pathian mai ah Christ ii pau le hong oai bangin ka pau uh a, ka it lawmte awng, na ka vawt theampo uh sia, noma kong hu natu a, a kivawt ahi hi. 20No kung kong thet ciangin kong dei bang na hi ngawl na uh kong mu tu le, kei zongh nong dei uh bang ka hi ngawlna nong mu tu ka lau hi. Kihauna le ki eenna, thintomna le kaangsung heakna, kiselnona le kingensiatna, kiphatsakna le kilemngawlna te ka mu tu ka lau hi. 21Kong pai kik ciangin, a bosa hun sung note tam mama in mawna na vawt uh a, cii le sa deina taw nu le pa mawna te — paktat ngamtatnate pan a kisiik kik ngawl mawneite hu in, keima ka kap tu a, note mai ah ka Pathian in kei hong maizum sak tu ka lau hi.
Currently Selected:
2 Corinth te 12: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
