2 Corinth te 10
10
Paul in Pathian Nasepna A Huukna
1Keima Paul in keima aituamin kong thuum hi — Note taw ka omkhop ciangin dikin cingh a, no taw a kikhuala a ka om ciangin hangsan hong kici hi. Christ cikna le thiamna hu in kei zongh note kung kong pai ciangin, ka hangsan a kul tu dong hong kivawt ngawl natu kong thuum hi; 2banghang ziam cile, leitung deinate taw ngamta hi hong cite tungah hangsan thei khi hi. 3Hi leitung ah a teang ka hi uh sia thumaan hi, ahihang leitung nate lungngulna taw ngalsim ka hi bua uh hi. 4Kidona sungah ka zak uh ngalhiamte sia leitung ngalhiamte hi ngawlin, kulh khote lalcipsak natu ka zak uh a thahat Pathian ii vaangletna ngalhiamte ahi hi. Kam kinialna maan ngawlte ka saatmit uh hi; 5Pathian thu heak natu hong nokkhaksak thei kiphatsakna teng ka sumit uh hi; ngaisutna a minpiang sia man in ka khumcip uh a, Christ ii thu ka nisak uh hi. 6Tuaciangin note na thumaanna uh na kitelthiangsak zawkciangin, thumaan ngawl ngamtatna pawpo daan pia tu in ka kinging tu uh hi.
7Note sia a puatham omzia teng bek na en uh hi. Khat po in Christ ii neisa in a kituat a om ziam? Pha hi, ama le ama ngaisun kik tahen, banghang ziam cile kote zongh ama za ma in, Christ ii neisa ka hi uh hi. 8Banghang ziam cile Topa ii thuneina hong piakte hu in, ka kisuangtaak ngawp tha le zong ka mai a zum bua hi — tua thuneina sia no kong sukcip natu hi ngawlin, kong lapto natu ahi hi. 9Lai kong thaakte taw no hong lausak nuam a, hanciam bang ka hi tu sia ka dei bua hi. 10Khat po in, “Paul laithakte sia kamkhal kamciik veu zangh ahihang, ama tatak ei taw hong om ciang, ama thaneam in, a kammalte zongh bangma ahi tuan bua hi!” ci tha tu uh hi. 11Tuabang mihing khat in note taw kong omkhop ngawl uh ciang laithakte sung kong at uh thu le, tua munah note taw kong om uh ciang ka vawt tu uh thute sia a kilamdang buatu hi ci in tel hamtang tahen.
12A tatak ahile amate le amate a kiliansak mama te taw a kibangin, ka kituat bua a, ka kitee ngat ngam buatu hi. Amate bangza mawmaw ziam! Amate le amate ki en in, a kitee natu vawt tawm a khat le khat a kimuna za uh taw thukhente ahi uh hi! 13Ahizong ko ka hi uhle, ka kisuantaakna uh in, a omsa ciangtanna a vaal buatu uh hi; Pathian ii hong see sa a kiciangtan nasepte sung bek ah ka kisuangtaak uh a, no sungah na ka sep uh sia zongh kihel hi. 14Tua ciangtanna huam sungah om na hi uh ciang, Christ huvau Lungdamna Thupha puakin note kungah kong pai uh ciangin tuate ka kan buatu uh hi. 15Tua ahikom Pathian hong koisak sa ciangtannate kalhin midangte sepna sungah ka kisuangtaak bua uh hi. Tua sangin Pathian hong koisak sa ciangtanna sung teng ah seam tawntung a, na upna uh khangto thei in note sungah ka nasepna uh a taangzai zaw thei tu in ka lamen uh hi. 16Tua zawkciangin Lungdamna Thupha sia note ii ngalkhat ngamte ah ka hil thei tu uh a, ngualdang khat ii lo sungah a kiseam sa nasep tungtaang ah kiphatsak natu a om buatu hi.
17Ahihang laithiangtho in, “A kuama po a kisuangtaak nuam sia in, Topa sep sa tungah kisuangtaak tahen,” a ci bang hi tu hi.#Jer 9:24 18Banghang ziam cile mihing khat sia, ama le ama pha a kisak ciang hi ngawlin, a phat takpi hunlam a kimu ciangin tua pa sia Topa in pha hi ci in a ngaisun hi.
Currently Selected:
2 Corinth te 10: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
