1 Corinth te 9
9
Sawltak khat ii Nga tuakte le Sep tute
1Keima sia a suakta mihing khat hi ngawl khi ziam? Sawltakpa khat hi ngawl khi ziam? Ih Topa Jesus mu ngei hi ngawl khi ziam? Topa atu ka sepna ii a nga sia note hi ngawl nu ziam? 2Ngualdangte in sawltak khat bangin hong saang bua phial zong, note in nong saan tu uh ahi hi! Topa taw kipumkhat a na nuntak uh hu in, noma mama sia sawltak khat ka hina a kilakna ahi hi.
3Mihingte in hong sit ciang, hisia in keima le keima ka kihuukna ahi hi: 4Ka nasepna hu in kei in an le tuite hong kipiak natu thu om hi ngawl ziam? 5Sawltak dangte, Topa suapuite le Peter ettee in, ka khualhaw ciang ka kitholpui tu Tapidaw zi khat nei thei natu thu om hi ngawl ziam? 6Tua ahibuale koma kivaak natu zongin na a seam sia Barnabas le kei bek hi khu ziam? 7Ama ii sum zangh a, ngalkap sung a seam ngalkap om ngei na ziam? A sapithuan sung pan a piang sapitnga a ne ngawl lothopa akua om ngei ziam? Ama tuute ii noai a ne ngawl tuucingpa a om ziam?
8Ni sim a ettee thei hi bangte taw keima le keima ka kidep tu kul ngawl hi, banghang ziam cile Thukham in tuabang ma in ci hi. 9Moses Thukham sungah, “Khuital khat an cil in na zak uh ciangin, a muk na tuamsak heak vun,” ci in ih sim hi. Tu in, Pathian in khuitalte a thinnuammaw ziam?#Thkna 25:4; 1 Tim 5:18 10Ama in tuabang a ci ciang koma hong cinopna tatak hi ngawl ziam? Hi hi, tua thu in koma atu in a ki at ahi hi. Lothopa le anlapa in an a kilate hawm khawm tu ci in lametna taw diang ahi uh hi. 11Kote in note sungah thaa thaicii kong poai uh hi. Tuaciang note tung panin, leitung hamphatnate nga le ung tam lei tu ziam?#Rom 15:27 12Ngualdangte in note tung panin, hite nga natu lametna nei thei ahile, ko in a lianzaw ngawngawn muangmaw thei ngawl tu khu ziam?
Ahihang hi ka nga tuak, ka zak tuak uhte hong zangh ngeingawl khu hi. Tua hizaw ngawlin, Christ huvau Lungdamna Thupha lampi a nokkhaksak ngawl natu in haksatna theampo a thuak hi zo khu hi. 13Biakinn sungah naseamte in Biakinnpi panin an nga a, biaknatau tungah sangaw biakpiakna seamte in, a satel nga uh hi.#Thkna 18:1 14Tuasia bangma lungdamna thu a hilte in, tua ii tung panin a nuntak kivaak kitaa natu nga tu ci in Topa thupiaksa ahi hi.#Mt 10:10; Lk 10:7
15Ahihang hi ka nga tuak, ka zak tuak uhte ka zangh ngei bua a, tu a lai kong thaakna zongh tuabangte keima atu in a la nuam ka hi bua hi. Tua sangin ka thi nuamzaw hi! Hi kisaktheinate kuama in a luithawthong thu a sua buatu hi. 16Lungdamna thu ka hil hu in, ka kisuantaak natu thu ka nei bua hi. Tuasia tatak ma seam tu in hong kisawl hi. Tuaciang lungdamna thu hil bua leng kei atu in bangza in lauhuai tu ziam! 17Keima uuk thu in ka tealna taw ka nasep seam hi leng, thaman hong kipiak tu ka lamen tu hi; ahihang sep tu pealmaw in nei a, a seam ka hi hi, banghang ziam cile Pathian in kei hong muang a, hi vaipuak hong aap hi. 18Tua ahile bang thasum ka saang ziam? Lungdamna Thupha atu nasepna sungah nga tuakte la ngawl, sum la ngawlin, lungdamna thu hil theina hunpha ka nga sia in, ka noptuamna thupha ahi hi.
19Keima in kuama ii sila ahi ngawl, mihing suakta khat ka hi hi; ahihang mihing a tam thethei ka nga natu in ngual theampo ii sila ka kisuaksak hi. 20Jew te taw na ka sepkhop laitakin, amate ka nga thei natu in Jew khat taw kibangin ka nungta hi; Moses Thukham ukna nuai ah om ngawl ka hi hang, tuabang a omte ka nga thei natu in, Thukham ukna nuai ah a omte bangin ka ngamta hi. 21Tuasia bangma Gentile te taw na ka sepkhop ciangin, amate ka nga thei natu in, Jew Thukham puasia ah a om Gentile te khat bangin ka om hi. Hi bangin ih ci ciang, Pathian thukham ni ngawl khi hi ka cinopna hi ngawl hi; a tatak sia Christ ii Thukham nuai ah ka om hi. 22Upna thaneamte kawm ah ka om ciang, amate ka nga thei natu in, amate khat bangin thaneam in ka om hi. Tua ahikom ahithei tu lampi khat po taw ahizong amate pawlkhat beak ngupna a nga thei natu in, mihing theampo ii a diksak thethei tu in ka om hi.
23Hite theampo sia lungdamna thu hangin thupha ka hop thei natu a seam ka hi hi. 24Tai kidemna sungah a kihel tam mama ahihang amate sung pan a zo khat bek in zawna tel nga ahi hunlam sia na heak uh ahi hi. Tua ahikom zawna tel na nga thei natu in tai vun. 25A kikhomsuan ngawl paakkual lukhu khat a kikhuksak natu in, a kimai khat sim in a sinna sungah a haksa mama kitekna nuai ah kipum aap hi; ahihang eite ih hile, a tawntungin a kip tel atu in ih seam hi. 26Tua hu in matut natu mun khau kithungna dong ah, tang takin ka tai hi; tuasia hu ma in ngual a thong khial ngawl kithok thiampa taw ka kibang hi. 27Tua kidemna ah ngual thato zo kasap a kihel zo ngawl pa ka sua ngawl natu in keima le keima kithongin ka pumpi ka ngimsakin ka kitek dipdeap hi.
Currently Selected:
1 Corinth te 9: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
