1 Corinth te 11
11
1Christ ii zia le tong ka zui bangin, kei ii zia le tong hong zui tavun.#1 Cor 4:16; Php 3:17
Biakpiakna sungah Lu Tuamna
2Nong phaw tawntung uh hu le note tungah kong piak hilciannate na zui uh hu in kong pok hi. 3Ahihang na tel tu uh ka dei thu pan, Christ in mihing theampo tungsia ah a lianbel hi a, pasal in zi tungsia ah a lianbel hi, Pathian in Christ tungsia ah a lianbel ahi hi. 4Tua ahikom pasal khat in, mihon sungah a thunget ciang ahizong, Pathian thu a thansak ciang ahizong, a lu tungah khuk khat a nei le, Christ mindaisak suak hi. 5Tuaciang numei khat pawpo in mihon sungah thu a nget ciang ahizong, Pathian thu a thansak ciang ahizong, a lu tungah bangma a om buale, a pasal mindaisak suak a; a lu a meettol numei dangkhat taw, kilamdanna nei ngawl hi. 6Tua nu in a lu tungah khuk khat a nei buale, a sam zongh a meet vet tu ahi hi. Tuaciang khat in a lu a tol in meet tu ahibuale a sam a tan tu sia maizumhuai thu ahi bangma a lu tungah tuamna khat nei le pha hi. 7Pasal khat in a lu seal kul ngawl hi, banghang ziam cile ama in Pathian lim le vaangletnate, ama tung panin kilanghsak hi. Ahihang numei in pasal vaangletna a kilanghsak hi; #Pian 1:26-27 8banghang ziam cile pa sia numei sung panin kibitphua ngawlin, numei sia pa sung pan kibitphua hi. #Pian 2:18-23 9Pa in numei atu kibitphua hi ngawl a, ahihang numei in pa atu in a kibitphua hi. 10Tua ahiciang vantunglalangte hangin, numei in a pasal ii thuneina nuai ah om hi, ci in lak natu in a lu tuamna khat nei tu hi. 11Ahihang Topa sung ih nuntakna ah, numei in pasal ngawl taw tuam din thei ngawl a, pasal zongh numei ngawl taw tuam din thei ngawl hi. 12Banghang ziam cile numei sia pasal panin a kivawt bangma in, pasal zongh numei sung pan a suak ahi hi; tuaciangin na theampo a piangsak sia Pathian ahi hi.
13A lu tungah bangma a om ngawl numei khat sia mihon biak piakna sungah Pathian tung thu a nget tu sia a kilawm le a kilawm ngawl noma in khensat tavun. 14Banghang ziam, leitung pianzia mama zongh in pasal khat sam a sau in a hoai le a maizumhuai hi a, 15ahihang numeite tungah tuasia in hoina khat hi ci in hong hil hi. Numei samsau sia ama a kituam natu in, a kipia ahi hi. 16Ahihang khat po in hi thu a nial nuam tha le, eite ih hi zong, Pathian ii pawlpite ahizong, biakpiakna ah ngeina dang kinei ngawl hi ci sia bekma son tu ka nei hi.
Topa ii Zan An
(Mt 26:26-29;Mk 14:22-25; Lk 22:14-20)
17Hi a nuai ah ngamtatzia tu hilnate sungah ahile no kong pok bua hi, banghang ziam cile biak kikhopna ah a tatakin phatna sangin siatna piang zaw hi. 18A masa phitbel in na kikhopna uh sungah a kilangpan pawl tuatuamte om hi ci in hong kison hi; hisia in a maan na mun om tu ka um hi. 19(No sungah thutangzaw sia a kimu thiang natu in kikhennate ahile a om kul hi.) 20A pawl in na kikhop uh ciang, na neak uh sia Topa ii Zan An hi ngawl hi. 21Banghang ziam cile na neak uh ciang mihing khat sim in, noma an tek ma leap papaih na hi uh kom pawlkhat sia ngilkial in na om uh a, a dang teng sia zukham in om hi. 22Tuabangin na neak na dawn natu uh, inn tek nei hi ngawl nu ziam? Tua ahibuale Pathian ii pawlpi zawngsakin, a nei ngawlte na maizumsak nopna uh ziam? Hi thu huvau ah bang son tu in nong muangmaw uh ziam? No hong pok tu khi ziam? Hong pok ngawl het tu khi hi!
23Banghang ziam cile Topa ii hilcianna ama ii tung pan ka saante sia note tungah kong pia sawn hi: a thu in Topa Jesus a kileeheak tu nitakin, ama in anluum la a, 24Pathian munah lungdam a ko zawkciang anluum balneen a, “Hisia in note atu in a kipia ka pumpi ahi hi. Kei nong phawna in hi bangin vawt vun,” ci hi. 25Tuasia bangma zan an a neak zawkciang ama in hai la in, “Hi hai in ka chi taw a kikipsak Pathian ii thuciamna thak ahi hi. Na dawn uh simin, kei nong phawna in na dawn vun,” ci hi.#Pu 24:6-8; Jer 31:31-34
26Hisia ii khiakna sia, hi anluum na neak uh sim le, hi hai panin na dawn uh simin ama hong pai kik dongin, Topa ii thina thu a thangsak na hi uh hi. 27Hi thu taw kipee in khat po in, ama zatak ngawlna taw Topa ii anluum ne a, hai a dawn le, tua mi in Topa ii pumpi tung le a chi tungah a maw ahi hi. 28Tua ahikom mihing sim in, ama le ama kisittel phot tu a, tua zawkciang anluum ne in, hai panin dawn tu hi. 29Banghang ziam cile anluum a neak ciang le hai panin a dawn ciangin, Topa ii pumpi ii a khiakna a tel buale, a neak a dawn hu in ama le ama tungah thukhenna a tungsak suak hi. 30Tua hu in note sungah mihing tam mama thazawmin a ciina a, tam ma na thi zo uh hi. 31Eima le eima kisittel phot in hi leang, Pathian thukhenna sungah ih theng buatu hi. 32Ahihang eite sia leitung bup taw hong kimawsak ngawl natu in, Topa in thu hong khen a, daan hong pia ahi hi.
33Suapuite awng, tua ahikom, Topa ii Zan An ne tu in, na kikhoptua uh ciangin, khat le khat na kingak vun. 34Tuaciang na kikhop uh ciangin a ngilkial khat po a om le, Pathian ii thukhenna nuai ah na tum ngawl natu in inn ah an ne tahen. Thudangte sia, kong pai ciangin ih son tu hi.
Currently Selected:
1 Corinth te 11: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
