Abharuumi 8

Abheekirirya bharoorokereribhwa na Omutima Omurabhu

1Mbe bhoono, Waryubha ataribhajibhya abhantu bhanú bhagwateeni na Kiristu Yeesu. 2Kunjira ya okugwatana na Kiristu Yeesu, eginguru gya Omutima Omurabhu unú arareeta obhuhoru bhwa koko, ginkoreri mbe omwiyagaari, naho ntige okutungwa na eginguru gya obhusarya na oruku. 3Amaragiriryo gataaringa na eginguru gya okutukora twiyagaare, kwa ekisigo kya obhusimuka bhwetu bhwa obhusarya. Nawe, kinú amaragiriryo gayo gataatura okukora, Waryubha yaakora. Yaatuma Omwana waaye omumwemwe, yaaje kubheetu mukyaro, aringi omuntu kya bheetu abha obhusarya, naho abhe ekimwenso kurusumo rwa obhusarya bhwetu. Kwa okukora ego, Waryubha yaabhuturira ekiina eginguru gya obhusarya mubhuhoru bhwetu. 4Waryubha yaakora ego, naho amangʼana gonsego ga obhuheene ganú gareenderwa mumaragiriryo gakunaane bhujomu munsi weetu. Bheetu turoorokereribhwa na Omutima Omurabhu, na tutakoorokereribhwa kweki na obhusimuka bhwetu bhwa obhusarya. 5Abhantu bhanú bharoorokereribhwa na obhusimuka bhwabho bhwa obhusarya, obhungʼeeni bhwabho bhuhanjiri okukora obhusarya. Nawe, bhanú bharoorokereribhwa na Omutima Omurabhu, obhungʼeeni bhwabho bhuhanjiri okukora amakorwa ganú garangʼarira Omutima Omurabhu. 6Abhantu bhanú bharoorokereribhwa na ameetegeerero ga obhusimuka bhwa okukora obhusarya, bharanyoora oruku rwa koko. Nawe, abhantu bhanú bharoorokereribhwa na ameetegeerero ga Omutima Omurabhu, bharanyoora obhuhoru bhwa koko na omurembe. 7Abhantu bhanú bharoorokereribhwa na obhusimuka bhwabho bhwa obhusarya, bhayo m-basigu bha Waryubha. Bhatakwikirirya okugwata amaragiriryo gaaye, kweki bhatakutura okugagwata. 8Kwa ego, abhantu bhanú bharoorokereribhwa na obhusimuka bhwabho bhwa obhusarya, bhatakutura okumungʼarira Waryubha.

9Nawe, bheenyu mutakutungwa na obhusimuka bhwenyu bhwa obhusarya, muroorokereribhwa na Omutima wa Waryubha,#8:9a Omutima wa Waryubha. Maaha Omutima Omurabhu mu Moonjooro eguru ya Amangʼana Amakongʼu. kwa okubha areekara munsi weenyu. Omuntu wowonse unú ataana Omutima wa Kiristu,#8:9b Omutima wa Kiristu. Omutima wa Kiristu ngʼo Omutima wa Waryubha, kasi Omutima Omurabhu. uyo ataringi omwihigira wa heene wa Kiristu. 10Bhoono, Kiristu areekara munsi weenyu. Kwa ego, kora nyoore emibhiri gyenyu girakwa kwa ekisigo kya obhusarya, Omutima Omurabhu arabhahaana obhuhoru, kwa okubha Waryubha abhabhariri okubha abhaheene embere yaaye. 11Omutima Omurabhu unú areekara munsi weenyu, ngʼo Omutima wa Waryubha unú yaamuhyukya Yeesu Kiristu okurwa mubhaku. Kwa ego, Waryubha arihyukya kora emibhiri gyenyu ginú girakwa, kwa enjira ya Omutima waaye Omurabhu unú areekara munsi weenyu.

12Kwa ego, abhahiiri bhaani kuimani, bheetu etakwenderwa twikare kwa okutungwa na obhusimuka bhwetu bhwa obhusarya. 13Nyoore mureekare kwa okoorokereribhwa na obhusimuka bhwenyu bhwa obhusarya, murikwa. Nawe, mukaanga kimwi kwa eginguru gya Omutima Omurabhu, okukora amangʼana ganú obhusimuka bhwenyu bhwa obhusarya bhureenda mukore, muriikara koko.#8:13 Maaha mukitabho kya Abhagaratia 6:8.

14Bhonsego bhanú bharoorokereribhwa na Omutima wa Waryubha, bhayo mbo abhaana bha Waryubha. 15Waryubha ataabhahaana Omutima Omurabhu, naho mubhe kweki abhagaya bhanú bharoobhoha, nawe, yaabhahaana Omutima Omurabhu, naho mubhe abhaana bhaaye. Omutima uyo ngʼo aratubheera okumubhirikira Waryubha, “Aba,” ensonga yaaye niiga, “Taata!” 16Omutima uyo omwene arakomererya mumitima gyetu ega, bheetu m-baana bha Waryubha. 17Mbe, kwa okubha bheetu m-baana bha Waryubha, tubheeri abhagabhi bhaaye. Turinyoora engabho yeetu hamwi na Kiristu. Na kwa okubha turasanga munyanko hamwi na Kiristu, kweki turigungibhwa hamwi nawe.

Waryubha arituhaana obhukuru bheetu abhaana bhaaye

18Oni niina obhuheene ega, enyanko yeetu ya eribhaga rinu, etaringi ekintu, nkaairingʼaanʼya na obhukuru bhunú Waryubha arituhaana kwibhaga rinú riraaja. 19Ebhibhumbwa bhyonsego bhinú bhyabhumbwa, bhiraganyirira kwa enamba enene eribhaga rinú Waryubha aryorokya, kya ego bharingi abhaana bhaaye. 20Ebhibhumbwa bhyonsego bhinú Waryubha yaabhumba bhyeehiimwa bhitabha na obhwera. Etaringi ega, ebhyene mbyo bhyeenda ego, nawe, n-kya ego Waryubha omwene yeenda.#8:20 Maaha mukitabho kya Obhwambiro 3:17. Kora ego, bhireesigira eribhaga riyo, 21kwa okubha bhirituuribhwa okurwa mubhugaya bhwa obhusarya na oruku. Hayo nho, bhirihaanwa obhwiyagaari na obhukuru bhunú Waryubha arihaana abhaana bhaaye.

22Tumanyiri ega, okuhikira bhoonwego, ebhibhumbwa bhyonsego bhirakuura bhukongʼu kwa obhururu, kya omukari unú ararumwa obhusungu kwibhaga rya okwibhura. 23Nawe, etaringi ega, ebhintu bhiyo mbyo ebhyenego bhiranyahaarika, nawe, kora bheetu bhanú tuuna Omutima Omurabhu, unú twahaanwa kya enonkwe ya mbere, turanyahaarika mumitima gyetu. Turanyahaarika, kwa okubha turaganyirira bhukongʼu eribhaga rinú Waryubha aritukunaanʼya okubha abhaana bhaaye. Hayo nho, turitunguribhwa bhonsego na okuhaanwa emibhiri emihya. 24Obhwisige bhuyo tuunabho okurwa hanú Waryubha yaatutuurya. Nawe, nyoore tureesiga ekintu kinú turatura okukirora, bhuyo bhutaringi obhwisige. Bhoono, niwi areesiga ekintu kinú ararora? 25Nawe, tukeesiga okuhaanwa ekintu kinú tutakurora, hayo nho, turaganyirira kwa obhwigumirirya bira okurosa.

26Hamwi na gayo, Omutima Omurabhu ngʼo aratubheera obhunyooheeru bhwetu. Bheetu tutamanyiri okumusabha Waryubha kya ego ereenderwa, nawe, Omutima Omurabhu omwenego, ngʼo aratusabhira ku Waryubha kwa ekiriro kya obhusurumbaru kinú kitakutura okugambwa. 27Waryubha unú areekomya gonsego ganú garingi mumitima gya abhantu, ngʼo amanyiri ameetegeerero ga Omutima Omurabhu,#8:27 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. kwa okubha Omutima uyo, arasabhira abhantu bha Waryubha kya ego Waryubha ahanjiri.

28Tumanyiri ega, Waryubha arakora amangʼana gonsego okureeta amajomu, kubhantu bhonsego bhanú bhamuhanjiri,#8:28 Waryubha arakora amangʼana gonsego okureeta amajomu, kubhantu bhonsego bhanú bhamuhanjiri. Ensonga eindi eratura okubha ega, amangʼana gonsego garareeta amajomu kubhantu bhonsego bhanú bhamuhanjiri Waryubha, kasi kumangʼana gonsego, Waryubha arakora emirimu hamwi na bhanú bhamuhanjiri, naho abhahaane amajomu. bhanú bhaabhirikirwa okurekana na obhwendi bhwaye. 29Waryubha yaamanya abhantu bhaaye, okurwa ekyaro kitarabhumbwa. Bhayo mbo yaabhasora bhabhe kya ego Omwana waaye, Yeesu Kiristu aringi. Yaakora ego, naho Omwana waaye abhe omutangi gati ya abhahiiri abhaaru. 30Mbe, bhayo yaaringa abhasoreri okurwa ekyaro kitarabhumbwa, mbo yaabhirikira akabhabhara okubha abhaheene embere yaaye, na mbo yaamura ega, aribhahaana obhukuru.

Abheekirirya bhatakutura okwahukanibhwa na obhuhanje bhwa Waryubha

31Mbe bhoono, tugambe-ki eguru ya amangʼana gayo? Nyoore Waryubha aringi orubhaara rwetu, niwi aratura okutuhiga? 32Waryubha ataamumaahira ekyabhira Omwana waaye omumwemwe, nawe, yaamuruusya naho akwe kurusumo rwetu bhonsego. Nyoore yaakora ego, bhoono, atarituhaana amajomu agandi gonsego? 33Bhoono, niwi aratura okubhajongera abhasorwa bha Waryubha? Atariho, kwa okubha Waryubha omwene ngʼo arabhabharira okubha abhaheene. 34Kweki niwi unú aribhabhuturira ekiina? Atariho, kwa okubha Kiristu Yeesu, unú yaakwa na akahyuka okurwa mubhaku, unú areekara orubhaara rwa obhuryo rwa Waryubha, weeki ngʼo aratusabhira.

35Bhoono n-kintu-ki kinú kiratura okutwahukanʼya na obhuhanje bhwa Kiristu? Kitariho! Kora nyoore ekaabha enyanko enduru, ekaabha entambara, ekaabha etaabhu, ekaabha enjara, ekaabha okubhurwa emyenda, ekaabha engʼanga ya oruku, kasi okwitwa. 36N-kya ego Amangʼoore Amarabhu garagamba ega,

“Kira orusiku turingi muruku, kwa okubha turakukorera emirimu uuwe.

Turakorerwa kya amangʼondi ganú garahirwa okugoogwa.”#8:36 Maaha mukitabho kya Egijabhuri 44:22.

37Nawe, kora nyoore gayo gonsego garatuujira, bheetu turagendererya okuhiga bhukongʼu, kwa okubha turabheerwa na Kiristu unú atuhanjiri. 38-39Mmanyiri kwa obhuheene ega, kitariho ekintu kinú kiratura okutwahukanʼya na obhuhanje bhwa Waryubha. Kora bhakaabha bhamaraika,#8:38-39 Bhamaraika. Maaha eringʼana rinu mu Moonjooro eguru ya Amangʼana Amakongʼu. kasi abhatungi bhanú bharingi mumasaaru, kasi ebhibhumbwa bhya eginguru, kasi amangʼana ganú gareebhuka kwibhaga rinu kasi kwibhaga rinú riraaja, kasi kyokyonse kinú kiringi murwire, kasi mukyaro kya abhaku, kasi ekintu kyokyonse mukyaro munu. Waryubha arigendererya okutuhanja, nyoore turingi abhahoru, kasi tukwiri. Obhuhanje bhuyo, abhutubhwiri kubheetu okuhitira ku Kiristu Yeesu, Omukuru weetu.

Currently Selected:

Abharuumi 8: Kabwa

Highlight

Copy

Compare