Abharuumi 16

Pauro aratuma amangʼana bhamukeeranirye abhantu amanga amaaru

1Ndeenda mumumanye omuhara weetu kuimani Fibhi. Weeki m-mubheeri wa erikanisa rinú riringi mumugi gwa Kenkirea. 2Ndasabha mumugenihye bhujomu, kya ego ereenderwa kubhantu bha Waryubha, kwa okubha wonse m-mwikirirya wa Omukuru Yeesu. Kweki ndasabha ega, mumubheere kyokyonse kinú areenda, kwa okubha wonse yaabheera abhantu abhaaru, kora oni.

3Munkeeranirye Pirisikira na Akira. Bhayo m-bakori bha emirimu abharikyani kumirimu gya Kiristu Yeesu, 4na bheenda okubhurya obhuhoru bhwabho, kurusumo rwani. Ntaringi oni omwenego unú ndabhakumya, nawe, kora abheekirirya bhanú bhataringi Abhayahudi mumakanisa gonsego, bharabhakumya bhukongʼu. 5Kweki munkeeranirye abheekirirya bhanú oranyoora bhareekumanʼya iika owaabho hayo, hamwi na omuhanje waani Epaineto. Weeki ngʼo owa mbere okumwikirirya Kiristu mukyaro kya Asia.#16:5 Asia. Eriina rinu ensonga yaaye niiga, ekyaro kya Asia kubhutungi bhwa Ekiruumi. Bhoonwego ekyaro kiyo kirabhirikirwa Bhuturuki.

6Munkeeranirye Mariamu unú yaakora ekituunyo bhukongʼu, okukora emirimu kurusumo rwenyu. 7Munkeeranirye Anduroniko na Yunia. Bhayo m-Bayahudi abharikyani, bhaabhohwa hamwi na oni mwigereja. Bheeki bhaankangatira okumwikirirya Kiristu, kweki bhamanyikeeni bhukongʼu gati ya abhatumwa.#16:7 Bhamanyikeeni bhukongʼu gati ya abhatumwa. Ensonga eindi eratura okubha ega, bharasuukwa bhukongʼu na abhatumwa.

8Munkeeranirye omuhanje waani Amupuriato, omwikirirya wa Omukuru Yeesu Kiristu. 9Munkeeranirye Uribhano, omukori wa emirimu hamwi na oni ku Kiristu, na kora omuhanje waani Sitakisi.

10Munkeeranirye Apere. Weeki yeegumirirya amasakyo amaaru, akeekiriribhwa na Kiristu. Kweki munkeeranirye abhantu bha owa Arisitobhuro. 11Munkeeranirye Herodioni, Omuyahudi omurikyani. Kweki munkeeranirye abhantu bha owa Narikiso bhanú bharamwikirirya Omukuru Yeesu Kiristu. 12Munkeeranirye Tirifaina na Tirifosa. Abhakari bhayo, bhaana ekituunyo bhukongʼu okukora emirimu gya Omukuru Yeesu Kiristu. Kweki, munkeeranirye na omuhanje waani Perisisi. Weeki wonse yaakora ekituunyo bhukongʼu okukora emirimu gya Omukuru Yeesu Kiristu.

13Munkeeranirye Rufo, omusorwa wa Omukuru Yeesu Kiristu, hamwi na ngʼina waabho. Weeki m-maayi kuoni nonse, kwa okubha yaambeera kya omwana waaye. 14Munkeeranirye Asinkirito, Furegoni, Herime, Paturobha, Herima, na abhahiiri bhaani kuimani, bhonsego bhanú bharingi hamwi nabho.

15Munkeeranirye Firorogo na Yuria, Nerea na omuhara waabho Orimpa, na abheekirirya bhonsego bhanú bharingi hamwi nabho. 16Mubhenga murakeeranʼya kwa obhuhanje bhwa Ekikiristu. Abheekirirya bha amakanisa gonsego ga Kiristu, bharabhakeeranʼya.

Pauro arakemera abheekirirya

17Bhoono, abhahiiri bhaani kuimani, ndabhakomererya ega, mwiyangararire na abhantu bhanú bhareehigirya ameehigiryo ga okwahukanʼya abhantu. Abhantu bhayo bhareenda okusarya eimani ya abhantu, na bharaanga ameehigiryo ganú mweehigiribhwa. Mwiyahure nabho! 18Abhantu bhayo, bhatakumukorera emirimu Kiristu, Omukuru weetu, nawe, kinú bhareenda, nu-kwigutya orunamba rwabho orubhiibhi. Bharagamba amangʼana amasambaaruku ga okwikangatirirya, naho bhangʼeene abheekirirya bhanú bhatakwisigira obhubhiibhi bhobhonse.

19Abhantu bhonsego bheegwiri ega, muringi abheegwa. Eringʼana riyo, riranjomera bhukongʼu. Ndeenda mubhe na egintungwa gya okukora amajomu, mutabha na amasoro gogonse eguru ya amabhiibhi.

20Waryubha unú arabhahaana omurembe, araatajire hansi Erisambwa#16:20a Erisambwa. Maaha eringʼana rinu mu Moonjooro eguru ya Amangʼana Amakongʼu. bhwangu hanu na okubhahaana obhuhigi eguru yaaryo. Eriruguto rya Omukuru weetu Yeesu Kiristu ribhe hamwi na bheenyu bhonsego. [Amina.]#16:20b Amangʼana mumabhano ganu […] gataringi mumangʼoore agandi ga akare aga Ekiyunani.

21Timoteo, omukori wa emirimu omurikyani, arabhakeeranʼya. Na Abhayahudi abharikyani Rukio, Yasooni na Sosipatiro, bhonse bharabhakeeranʼya. 22Kora oni Teritio, omungʼoori wa enyarubha ya Pauro inu, nonse ndabhakeeranʼya kuriina rya Omukuru Yeesu. 23Gaayo, unú oni Pauro ndeekara owaaye, na owaaye nho abheekirirya bhonsego bha erikanisa rya hanu bhareekumanʼya, wonse arabhakeeranʼya. Erasito, omubhiiki wa egimbirya gya omugi gunu,#16:23 Omugi gunu. Omugi guyo hamwi ngo omugi gwa Korinto. wonse arabhakeeranʼya. Na omuhiiri weetu kuimani Kwarito wonse, arabhakeeranʼya.

[24Eriruguto rya Omukuru weetu Yeesu Kiristu ribhe hamwi na bheenyu bhonsego. Amina.]#16:24 Amangʼana mumabhano ganu […] gataringi mumangʼoore agandi ga akare aga Ekiyunani.

Pauro aramugungya Waryubha

25Bhoono, tumugungye Waryubha! Weeki aratura okubhakora mubhenga muranaga kuimani yeenyu, okuhitira ku Mangʼana Amajomu eguru ya Yeesu Kiristu ganú naaringa ndaraarika kubheenyu. Amangʼana gayo, akare gaaringa ekinyerera kya Waryubha kinú kyaringa kiibhisiri. 26Nawe, bhoono gatubhwirwe, na okuhitira mu Mangʼoore Amarabhu ga abharooti, amangʼana gayo, gamanyikeeni mubhyaro bhyonsego. Waryubha owa koko, ngʼo aragiriirye ega, amangʼana gayo, garaarikwe kubhantu bhonsego, naho bhayo bhonse bhature okumwikirirya na okumwigwa Omukuru Yeesu.

27Waryubha omwenego, ngʼo yaana egintungwa gyonsego. Weeki ngʼo abhenga aragungibhwa koko, okuhitira ku Yeesu Kiristu! Amina.

Currently Selected:

Abharuumi 16: Kabwa

Highlight

Copy

Compare