Amakorwa ga Abhatumwa 6

Abhantu muhungati bharasorwa okubheera abhatumwa

1Kuginsiku giyo, abheekirirya bha Yeesu bhaagendereryanga okwaruha bhukongʼu. Gati yaabho bhaaringa-ho Abhayahudi bhanú bhaahairanga Ekiyunani,#6:1a Abhayahudi bhanú bhaahairanga Ekiyunani. Abhayahudi bha Yerusaremu bhayo bhaaringa amanga amaaru. Abhandi obhusimuka bhwabho, bhaaringa bhanyarageeni mubhyaro ebhindi ebhyaru na bhaaringa bharahaira Ekiyunani. na Abhayahudi abhandi bhanú bhaahairanga Ekiaramu.#6:1b Abhayahudi abhandi bhanú bhaahairanga Ekiaramu. Ekiyunani kiragamba ega, Abhaebhurania. Eribhaga rirya, mukyaro kya Isiraeri, ekigambo kya kira orusiku kyaringa Ekiaramu. Ekigambo kya Ekiebhurania kyatumirwanga bhukongʼu mumasinagogi na mumangʼoore. Ebhigambo ebhibhiri bhiyo bhyaringa bhirahunkana bhukongʼu. Mbe, Abhayahudi bha Ekiyunani bhakeengʼeheerya ega, kumirimu gya obhugabhi bhwa ebhyakurya bhya kira orusiku, abhasino bhaabho bhataagabhirwanga ebhyakurya na Abhayahudi bha Ekiaramu. 2Kwa ego, abhatumwa ekumi na bhabhiri bharya, bhakakumanʼya abheekirirya bhonsego, bhakabhakeerya ega, “Etaabhe bhujomu bheetu tutige okwihigirya eringʼana rya Waryubha, kurusumo rwa okubhagabhira abhantu ebhyakurya. 3Bhoono, abhahiiri bheetu kuimani, musore gati yeenyu abhasaaja muhungati bhanú bhaana eginkuma eginjomu, bhanú bheejwiri Omutima Omurabhu na abha egintungwa. Bhayo, tubhahaane emirimu giyo, 4naho bheetu tugendererye na emirimu kwa okutumira eribhaga ryetu okumusabha Waryubha, na okwihigirya abhantu eringʼana ryaye.”

5Obhwamuri bhuyo, bhwa okusora abhantu abhandi bha okugabha ebhyakurya, bhwajomera abheekirirya bhonsego bhanú bhaaringa hayo. Mbe, bhakasora Sitefano, omuntu unú yaaringa yeejwiri Omutima Omurabhu na owa eimani bhukongʼu. Kweki bhakabhasora Firipo, Porokoro, Nikanora, Timoni, Parimena na Nikorao wa Antiokia,#6:5 Amariina ga abhantu bhonsego bhayo, m-mariina ga Abhayahudi bha omuganda gwa Ekiyunani. unú yaaringa yeehunjwiri akare okusoorana na edini ya Ekiyahudi. 6Bhakabhareeta abhasaaja muhungati bhayo embere ya abhatumwa. Bhonse bhakabhasabhira enu bhabhatuuriiri amabhoko eguru yaabho okubhanonka.

7Abheekirirya bhaagendererya okubharaarikira abhantu abhaaru eringʼana rya Waryubha, na erisaabhu ryabho ryagendererya okwaruha bhukongʼu, mumugi gwa Yerusaremu. Kora abhasyengeri abhaaru bhaamwigwa Waryubha kwa okumwikirirya Omukuru Yeesu.

Sitefano aragwatwa na Abhayahudi

8Mbe, Waryubha yaamunonka Sitefano uyo bhukongʼu, na yaamuhaana eginguru eginjaru, akabha arakora ebhiruguuryo na ebhimanyiiriryo kubhantu. 9Nawe, Abhayahudi abhandi, bhaaringa bharasakya okuhakaananʼya na Sitefano. Abhandi gati yaabho bhaaringa bha erisinagogi#6:9 Erisinagogi. Ryaringa enyumba ya Abhayahudi ya okusyengera Waryubha orusiku rwa Esabhato. Maaha Erisinagogi mu Moonjooro eguru ya Amangʼana Amakongʼu. rimwi, rinú ryabhirikirwanga ega, Erisinagogi rya Abhantu bha Obhwiyagaari. Bhayo, bhaaringa bharwiri mumigi gya Kirene na Arekisandiria. Abhandi bhaaringa bharwiri mubhyaro bhya Kirikia na Asia. 10Nawe, yaabhanga arabhahiga kwa okugamba amangʼana ga egintungwa kwa obhuturo bhwa Omutima Omurabhu.

11Mbe, Abhayahudi bhayo, bhakangʼeenererya abhantu nyabhurebhe, bhabheehe ega, “Tumwigwiri Sitefano aragamba amangʼana ga okubhatuka Musa na Omukuru Waryubha!”

12Bhakasiigirirya abhantu, hamwi na abhakaruka bha Ekiyahudi na abheehigirya bha amaragiriryo.#6:12 Abheehigirya bha amaragiriryo. Bhaaringa abhasomi bhanú bhasomeeri amaragiriryo ga Waryubha, na mbo bhoonjooranga na okwihigirya abhantu amaragiriryo gayo, na egimiira gyabho. Maaha Abheehigirya bha amaragiriryo mu Moonjooro eguru ya Amangʼana Amakongʼu. Bhayo bhonsego, bhakamuseeta Sitefano, bhakamugwata, bhakamuhira mwibharaja erikuru rya Abhayahudi. 13Kweki bhakareeta abheemiririri bha obhubheehi. Abheemiririri bhayo, bhakamuhaamirirya Sitefano ega, “Omuntu unu atakutiga okugamba amangʼana amabhiibhi, eguru ya erisyengerero erirabhu rya Waryubha, na eguru ya amaragiriryo ga Musa.#6:13 Amaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. 14Twamwigwa aragamba ega, Yeesu wa Najareeti, arihaanyura erisyengerero rya Waryubha riyo, na ega, arikyukya egimiira ginú twahaanwa na Musa.”

15Abhantu bhonsego mwibharaja muyo, bhakamutungʼaarira Sitefano, bhakarora obhusu bhwaye bhubheeri kya obhwa maraika.

Currently Selected:

Amakorwa ga Abhatumwa 6: Kabwa

Highlight

Copy

Compare