Amakorwa ga Abhatumwa 23

1Pauro akabhamogorera abhachaama bha eribharaja erikuru bhayo, akagamba ega, “Abhahiiri bhaani, naabha ndeekara kwa ameetegeerero amajomu embere ya Waryubha, nawanyareero.” 2Omusyengeri omukuru Anania hanú yeegwa ego, akakeerya bhanú bhaaringa bheemiriiri haangʼi na Pauro ega, bhamuteme erikoofi kumunwa. 3Kimwi Pauro akamukeerya ega, “Wonse Waryubha arikutema, uuwe omurwambe! Oringi kya endigi inú ehakirwe echokaa! Uuwe wikeeri hanu, naho okumbuturira ekiina okuringʼaana na amaragiriryo. Nawe, uuwe omwene oragakyuka amaragiriryo, kwa okubha wamwiri ega, ntemwe erikoofi.”

4Abhantu bhanú bhaaringa bheemiriiri haangʼi na Pauro, bhakamukeerya ega, “Uuwe, oramutuka omusyengeri omukuru wa Waryubha?” 5Pauro akabhakyukya ega, “Abhahiiri bhaani, ntaari mmanyiri ega, ngʼo omusyengeri omukuru! Mmanyiri yaangʼoorwa ega, ‘Otamugamba obhubhiibhi omutungi weenyu.’#23:5 Maaha mukitabho kya Okuhuruka 22:28.”

6-8Eribhaga riyo, Pauro yaaringa amariri okumanya ega, gati ya abhantu bhayo, abhandi m-Basadukaayo na abhandi m-Bafarisaayo. Kwa ego, Pauro akagamba kwa eriisi erinene embere wa eribharaja erikuru riyo ega, “Abhahiiri bhaani, oni m-Mufarisaayo, m-mwana wa Abhafarisaayo. Njongeerwe hanu, kwa okubha ndeekirirya ega, abhaku bharihyuka.” Hanú yaamara okugamba ego, eriihe rikeebhuka gati ya Abhafarisaayo na Abhasadukaayo. Bhaahukana, kwa okubha Abhasadukaayo bhateekiriryanga ega, obhuhyuki bhwa abhaku bhuriho, bhamaraika bhariho kora eginkoro giriho. Nawe, Abhafarisaayo bheekiriryanga gayo gonsego.#23:6-8 Bhaahukana, kwa okubha Abhasadukaayo bhateekiriryanga ega, obhuhyuki bhwa abhaku bhuriho, bhamaraika bhariho kora eginkoro giriho. Nawe, Abhafarisaayo bheekiriryanga gayo gonsego. Maaha Abhasadukaayo na Abhafarisaayo mu Moonjooro eguru ya Amangʼana Amakongʼu.

9Mbe, gati ya abhantu bhayo, hakabha-ho na obhuhakaananʼya bhukongʼu. Abheehigirya bha amaragiriryo#23:9 Abheehigirya bha amaragiriryo. Maaha eringʼana rinu mu Moonjooro eguru ya Amangʼana Amakongʼu. abhandi bha orubhaara rwa Abhafarisaayo bhakeemirira, bhakahakaana bharagamba ega, “Tutakurora obhusarya bhobhonse kumuntu unu! Hamwi nyoore n-kihwi kasi maraika, ahaiiri nawe!” 10Eriihe rikabha erinene, okuhikira omukuru wa abhasirikare akoobhoha ega, abhachaama bha eribharaja bhayo, bharatura okumutabhurana Pauro. Kwa ego, akaamura abhasirikare bhagye bharuusye Pauro gati yaabho kwa eginguru, bhamusohye munkambi ya abhasirikare.

11Obhutiku bhuyobhuyo, Omukuru Yeesu yeemirira haangʼi nawe, akamukeerya ega, “Otereme! Kya ego unyimiririiri mumugi gwa Yerusaremu hanu, egoego niigo oreenderwa unyimiririre na mumugi gwa Ruumi.”

Eniku ya okumwita Pauro

12Hanú bhwakya, Abhayahudi abhandi bhakakora ekiikaro bhugunyi, bhakariirana emuuma ega, bheeyime okurya na okunywa okuhikira bhamwite Pauro. 13Abhantu bhanú bhaariirana emuuma iyo, bhaaringa bharaambuka mirongo ena. 14Ego, bhakagya kubhasyengeri abhakuru na abhakaruka bha Ekiyahudi, bhakabhakeerya ega, “Turiiri emuuma ega, tureeyima okurya na okunywa ekintu kyokyonse, okuhikira tumwite Pauro. 15Mbe bhoono, bheenyu hamwi na abhakuru abharikyenyu, mumusabhe omukuru wa abhasirikare, amureete Pauro kubheenyu. Mwikorye ega, mureenda okumwikomya bhujomu eguru ya ganú turamujongera. Bheetu twiseemerye okumwita, eribhaga atarahika hanu.”

16Nawe, omwihwa wa Pauro, akeegwa amangʼana eguru ya ekiina kyabho kiyo, kimwi akagya munkambi ya abhasirikare muyo, akamukeerya Pauro. 17Nho, Pauro akabhirikira omwimiririri umwi wa abhasirikare, akamukeerya ega, “Hira omumura unu, kumukuru weenyu, yaana eringʼana rya okumukeerya.” 18Kimwi, omwimiririri wa abhasirikare uyo, akamuhira kumukuru waabho, akamukeerya ega, “Omubhohwa urya Pauro, yaambirikiiri yaansabha ega, ndeete omumura unu kuuwe, yaana eringʼana rya okukukeerya.” 19Omukuru wa abhasirikare uyo, akamugwata omumura uyo okubhoko, akagya nawe kabhejyo, kimwi akamubhuurya ega, “Oreenda okunkeerya-ki?”

20Omumura uyo, akagamba ega, “Abhayahudi bheekirireenʼye ega, bhakusabhe Pauro ejo, omuhire mwibharaja ryabho. Bhakeekorya ega, bhareenda okwikomya bhujomu amangʼana ganú bharamujongera. 21Mbe, uuwe otige okwikirirya, kwa okubha abhantu bhayo bharaambuka mirongo ena, bhaakamugunyire Pauro kunjira, naho hanú yaakahite bhamwitire eyo. Abhantu bhayo, bhariiri emuuma ya okwiyima okurya na okunywa ekintu kyokyonse, okuhikira hanú bharaamwite. Bhoono bheeseemerye bharaganyirira obhwamuri bhwaho.” 22Kimwi omukuru uyo, akakeerya omumura uyo ega, “Otakeerya omuntu wowonse ega, unsimiri ekiina kiyo!” Akamwikiririrya agende.

Pauro arahirwa kumwanangwa Feriki

23Mbe, omukuru wa abhasirikare uyo, akabhirikira abheemiririri abhabhiri bha abhasirikare, akabhakeerya ega, “Museemye abhasirikare magana gabhiri bha amaguru, na abhasirikare mirongo muhungati bha egifaraasi, na abhasirikare magana gabhiri bha amatimu, bhagye mumugi gwa Kaisaria kwibhaga rya ensa esatu obhutiku. 24Museemerye Pauro wonse, efaraasi ya okumugega, naho ahike bhwaheene kumwanangwa wa Ekiruumi Feriki.”

25Omukuru wa abhasirikare uyo, akangʼoora enyarubha, ega,

26“Uuwe omusuukwa omwanangwa Feriki, oni Kiraudio Risia ndakukeeranʼya. 27Omuntu unu, yaagwatwa na Abhayahudi, bhakeenda okumwita. Oni hanú naanyoora amangʼana ega, m-Muruumi, nkagya hamwi na abhasirikare, nkamutuurya. 28Neendanga okumanya ekintu kinú kirakora Abhayahudi bhayo bharamujongera, kwa ego, nkamuhira mwibharaja ryabho erikuru. 29Nkarora ega, bharamujongera eguru ya amangʼana ga amaragiriryo gaabho. Nawe, kuganú bhaamujongeranga, ritariho eringʼana kora erimwi rinú rikaakoreri yeetwe kasi abhohwe. 30Hanú naakeeriibhwe ega, Abhayahudi bhakoreri eniku eguru ya omuntu unu, nduuji ega, mmureete kuuwe eyo bhwangu. Na mbakeererye abhantu bhanú bharamujongera, bhaaje bhamujongere kuuwe.”

31Mbe, abhasirikare bhayo, bhakamugega Pauro kya ego bhaaringa bharagiririibhwe, bhakamuhira obhutiku bhuyo, okuhikira mumugi gunú gwabhirikirwanga Antipatiri. 32Hanú bhwakya, abhasirikare bhanú bhaagendanga kwa amaguru, bhakahunjuka munkambi, bhakatiga abharikyabho bha egifaraasi bhamuhire Pauro. 33Mbe, hanú bhaahika mumugi gwa Kaisaria, bhakahaana omwanangwa wa Ekiruumi enyarubha irya, bhakamugwatya na Pauro. 34Wonse hanú yaamara okusoma enyarubha iyo, akabhabhuurya ega, “Omuntu unu, ngʼ-wa-ha?” Hanú yaakeeribhwa ega, ngʼ-wa mukyaro kya Kirikia, 35akakeerya Pauro ega, “Nakakwitegeerere, hanú abhajongeri bhaaho bhaakahike.” Kimwi akaamura ega, Pauro yaangararirwe, mumenyo enkuru ya omukama Herode.#23:35 Mumenyo enkuru ya omukama Herode. Emenyo iyo yaahagaajwa na Herode Omukuru. Eribhaga erindi emenyo iyo ngʼyo abhaanangwa bha Ekiruumi bhaatumira. Maaha Herode Omukuru mu Moonjooro eguru ya Amangʼana Amakongʼu.

Currently Selected:

Amakorwa ga Abhatumwa 23: Kabwa

Highlight

Copy

Compare