Amakorwa ga Abhatumwa 22

1“Bheenyu abhahiiri bhaani, na bhataata munyitegeerere, nibhagirire embere yeenyu!” 2Abhantu bhayo, hanú bheegwa Pauro arahaira kwa ekigambo kyabho kya Ekiebhurania, bhakakira kiri. Pauro akagendererya okubhakeerya ega, 3“Oni m-Muyahudi, omwibhurwa wa mumugi gwa Tarso, mukyaro kya Kirikia. Nawe, naarererwa mumugi gwa Yerusaremu hanu. Gamarieri ngʼo yaanyihigirya okugwata kwa obhuheene amaragiriryo ganú twatigirwa na bhajaaji weetu. Naakora ekituunyo bhukongʼu okumukorera emirimu Waryubha, kya ego bheenyu murakora reero inu.

4“Naanyankyanga bhukongʼu abhantu bhanú bhaagwatanga Enjira ya Omukuru Yeesu, kora abhandi naabheetanga. Naagwatanga abhasaaja na abhakari, ndabhabhoha mwigereja. 5Amangʼana ganú ndabhakeerya, kora omusyengeri omukuru, hamwi na abhakuru abharikyaye bhonsego, bhakaageemiririiri ega, m-maheene. Abhakuru bhayo, mbo bhaangʼaana eginyarubha gya okuhirira Abhayahudi abharikyetu bha mumugi gwa Damasikasi. Nkeemuka okugya eyo, naho mbabhohe Abhakiristu bha eyo, mbareete Yerusaremu hanu, naho bhajibhibhwe.

6“Hanú naaringa haangʼi okuhika Damasikasi, ensa esansabha gya omubhasu, rumwigo, endingaasi enduru okurwa murwire ekammirika mbaara gyonsego. 7Nkagwa hansi, nkeegwa eriisi rirankeerya ega, ‘Sauri, Sauri! Ndeegwa orannyankya?’ 8Nkakyukya ega, ‘Omukuru, uuwe nuuwe-wi?’ Wonse akankyukya ega, ‘Oni nooni Yeesu wa Najareeti, unú uuwe oranyankya.’ 9Abharikyani bhanú naasoorananga nabho, bhaarora endingaasi irya, nawe bhateegwa eriisi rya unú yaahairanga na oni. 10Nkamubhuurya ega, ‘Omukuru, nkore egaki?’ Wonse akankyukya ega, ‘Imirira! Osohe Damasikasi. Muyo, oraakeeribhwe emirimu gyonsego ginú oreenderwa okore.’ 11Eribhaga riyo, ntaaringa ndarora, kwa okubha endingaasi enduru irya yaaringa inhokerye. Ego, abharikyani bhakangwatirira okubhoko, bhakanhikya Damasikasi.

12“Mbe, Damasikasi hayo, yaaringa-ho omuntu umwi. Omuntu uyo, yaabhirikirwanga Anania. Weeki yaaringa omwigwa ku Waryubha na yaaringa na ekituunyo bhukongʼu kya okugwata amaragiriryo geetu, kweki yaagungibhwanga bhukongʼu na Abhayahudi bhonsego bha eyo ega, m-muntu wa heene. 13Yaanyijira akeemirira embarika waani, akankeerya ega, ‘Omuhiiri waani Sauri, rora kweki!’ Hayohayo, ameeso gaani gakaribhuka, nkatura okumurora.

14“Kimwi akagendererya okunkeerya ega, ‘Waryubha wa bhajaaji weetu akusoreri, naho omanye obhwendi bhwaye. Areenda omurore urya Owa Obhuheene, na omwigwe aragamba kwa omunwa gwaye omwene. 15Akoreri ego, kwa okubha oribha omwimiririri waaye kubhantu, orabhakeerya amangʼana gonsego ganú oruuji na okwigwa. 16Bhoono okyaganya-ki? Imirira! Obhatiijwe, osabhe Waryubha, naho woogibhwe obhusarya bhwaho.’

17“Kimwi nkahunjuka Yerusaremu. Hanú naaringa ndamusabha Waryubha mwisyengerero erikuru, rumwigo, nkahitirwa na nkatungʼaara, nkarora obhurori. 18Mubhurori bhuyo, naarora Omukuru Yeesu arankeerya ega, ‘Kora bhwangu, orwe mumugi gwa Yerusaremu munu, kwa okubha abhantu bha mumugi munu bhateekirirye amangʼana ganú oraabhenga oragamba eguru yaani.’ 19Kimwi oni nkamukyukya ega, ‘Omukuru, nawe abheene bhamanyiri kya ego naagyanga mumasinagogi, naho okubhabhoha mwigereja na okubhatema abhantu bhanú bhaakwikiriryanga. 20Kora eribhaga rinú amanyinga ga omwimiririri waaho Sitefano geetika, oni nonse naaringa nimiriiri haangʼi. Nkeekirirya ega, yeetwe, na emyenda gya bhanú bhaamwita, nooni naagyangarariranga.’ 21Wonse akakyukya ega, ‘Genda, kwa okubha ndakutuma hare kubhantu bhanú bhataringi Abhayahudi.’”

22Omuganda gwa abhantu bharya, bhaamwitegeereranga Pauro bhukiri. Nawe, hanú yaagamba eringʼana rya obhumaririryo riyo, bhakaamba okujanjagana ega, “Omuntu unu atakwenderwa okubha omuhoru, mumwite!” 23Abhantu bhayo, bhaaringa bharajiirira na okuhuujahuuja emyenda gyabho eguru, enu bharatiimura oruteeri. 24Omukuru wa abhasirikare urya hanú yaarora ego, akakeerya abhasirikare bhaaye bhamusohye Pauro munkambi yaabho, bhamuteme emijariti, naho atubhure kinú kikoreri abhantu bhayo bhamujiiririri. 25Nawe, abhasirikare hanú bhaamara okumubhoha kwa egingoye, naho bhamuteme, Pauro akabhuurya omwimiririri wa abhasirikare unú yaaringa yeemiriiri hayo ega, “M-maheene amaragiriryo ga Ekiruumi gareekirirya okutema Omuruumi, kora nyoore etaramanyikana ega, asarirye?”

26Omwimiririri uyo, hanú yeegwa ego, akagya akamukeerya omukuru wa abhasirikare ega, “Oreenda okumukora egaki? Omuntu unu, m-Muruumi.” 27Mbe, omukuru wa abhasirikare uyo, akagya ku Pauro, akamubhuurya ega, “Nkeerya, uuwe m-Muruumi?” Pauro akamukyukya ega, “Yee.” 28Omukuru uyo, akamukeerya ega, “Oni naaruusya ebhintu ebhyaru bhukongʼu, okubha Omuruumi.” Pauro akamukyukya ega, “Nawe, oni m-Muruumi wa okwibhurwa.”

29Rumwigo, abhasirikare bhanú bhaaringa bhareenda okumwikomya amangʼana, bhakamutiga. Omwimiririri waabho uyo, yoobhoha bhukongʼu okwigwa ega, Pauro m-Muruumi, kwa okubha yaaringa amubhoheri kwa eminyororo.

Pauro arareetwa embere ya eribharaja erikuru

30Omwimiririri wa abhasirikare uyo, yeendanga okumanya obhuheene bhwa kinú kikoreri Pauro ajongerwe na Abhayahudi. Kwa ego hanú bhwakya, akamusibhura na okubharagirirya abhasyengeri abhakuru na eribharaja erikuru#22:30 Eribharaja erikuru. Maaha Eribharaja erikuru rya Abhayahudi mu Moonjooro eguru ya Amangʼana Amakongʼu. ryonsego, bheekumanʼye. Kimwi akamureeta Pauro, akamwimirirya gatigati yaabho.

Currently Selected:

Amakorwa ga Abhatumwa 22: Kabwa

Highlight

Copy

Compare