रोमियों 7
7
शादीशुदा जीवन का उदारण
1ओए रै बिशवाशी भाईयों, तुऐं जाणौए कै (हांव नियम जाणणौ वाल़ै शै बुलू) कै जांव तौड़ी आदमी जियुंदी रौंव, तांव तौड़ी तैसी पांदी नियमौ का औधिकार रौंव।
2बैयाएयौंदे बैटमाणिश नियम कै हिसाब शै आपणै घोरवाल़ै कै जीतै जी तैसीआरी जोड़ेयौंदे औसौ, पौरौ जै घोरवाल़ा मौरे जांव, तौ सै घोरवाल़ै कै नियम पौरैशै छुटै गौए। 3इथकारिए जै घोरवाल़ै कै जीतै जी सै कोसी ओकी आदमी कै हौए जांव, तौ सै गौलत सौमबंध वाल़ी बौणौ, पौरौ जै घोरवाल़ा मौरे जांव, तौ सै तैसी नियम पौरैशै छुटै गौए, इथै तौड़ी कै जै कोसी ओकी मर्द कै हौए जांव तौ सै गौलत सौमबंध वाल़ी ना ठोहरदै।
4तौ ओए रै मैरै बिशवाशी भाईयों, जोबै तुऐं मसीह कै साथै मौरे गौवै, तौ तुऐं नियम कै औधिकार कारिए बै मौरे गौवै। ऐबै तुऐं मसीह कै औसौ जू मौत पौरैशा जियुंदी हौए गौआ ताकि तुऐं पौरमेशवर कारिए फलदायक जीवन जी सौकौ। 5जिथुकै जोबै आमै आपणै पापी स्वभाव कै बश दै थिए, तौ पापी अभिलाषाएँ जू नियम कै दवारा थी, मौत का फोल़ पौयदा कौरणौ कारिए अमारै शोरीर दी काम कौरौ थी।
6पौरौ आमै तैसी नियम कारिए मौरे गौवै थिए जैणै आमु बोन्दी बाणै राए थिए, ऐबै नियम पौरैशै ऐशै छुटै गौवै, कै ऐबै आमु पौरमेशवर कै सेवा पुराणै तरीकै शै लिखित नियम कै मानणौ कै दवारा ना कौरु, पौरौ नौवें तरीकै शै पौरमेशवर कै आत्मा कै अगुवाई कै दवारा कौरु।
नियम औरौ पाप
7तौ आमै का बुलू? का नियम पाप औसौ? ना! बिल्कुल नी! बल्कि नियम कै दवारा हांव पाप कै जाणै सौकु। मोऐं जाणौ कै लालच कौरणा पाप औसौ जिथुकै नियम ऐजौ बौतांव, “कै लालच नी कौर” तौ हांव ऐजौ जाणै ना पांदा कै लालच कौरणा गौलत औसौ। 8पौरौ पापै इयौं आज्ञा का इस्तैमाल कौरेयौ मुं पांदी सौब भान्त कै लालच पौयदा कौरे, जिथुकै नियम कै बिना पाप मौरेयौंदा औसौ।
9आगै तौ हांव मूसा कै कानून कै बिना जाणै जियुंदी थिया, पौरौ जोबै मोऐं मूसा कै कानून जाणै पाए, तौ पाप कौरणौ कै शौकतै मुं दै बौढ़दै लागै, औरौ पापै मुखै पौरमेशवर शै जौई कौरे दिया। 10सैजै आज्ञा जियौं पौरमेशवरे मैरै जिणौ कै बौजैह बाणै, मुखै पौरमेशवर शै दूर कौरे दिया।
11जिथुकै पापै इयौं आज्ञा का इस्तैमाल कौरेयौ मुखै धौखा दिया, औरौ तिथकै दवारा हांव पौरमेशवर शै दूर हौए गौआ। 12तौ आमै ऐजौ बौल़ै सौकु कै नियम पवित्र औसौ, औरौ आज्ञा पवित्र, धरमी औरौ आछै औसौ।
पाप शै बौचाणौ दै नियम बैकार
13तौ का सैजै नियम, जू आछै औसौ, मुखै पौरमेशवर शै दूर कौरा? ना! बिल्कुल नी! पौरौ ऐजा पाप थिया जिथुवे ऐशै कौरौ, पापै तिनु नियम का इस्तैमाल कौरा जू ठीक थिए औरौ मुखै पौरमेशवर शै दूर कौरा। ऐशैखै पापै दिखोऊ कै सै हकीकत दै का औसौ, औरौ आज्ञाए दिखोऊ कै पाप पूरी तरह शै बुरु औसौ। 14जिथुकै आमै जाणुए कै नियम तौ आत्मिक औसौ, पौरौ हांव आदमी औसौ औरौ हांव पाप का गुलाम औसौ।
15औरौ जू हांव कौरु तिथुकै ना जाणु, जिथुकै जू हांव चोऊं सैजौ नी कौरेया कौरु, पौरौ जिथलैई मुखै नफरत आंव, सैजौई कौरु। 16औरौ जै, जू हांव ना चोऊं सैजैई बुरै काम कौरु, तौ हांव मानै पोऊँ कै नियम भले औसौ।
17तौ ऐशणी दशा दा बुराई कौरणौवाल़ा आदमी हांव ना आथी, यानी पाप औसौ जू मुं दा बौसेयौंदा औसौ। 18जिथुकै हांव जाणुए कै मुं दा औरौ मैरै पापमय आदमी कै स्वभाव दै कुणजै बै आछै चीज़ ना रौंव, भले काम कौरणौ कारिए इछा तौ मुं दै औसौए पौरौ तिनु हांव कौरे ना सौकु।
19जिथुकै जैसी आछै कामौ कै हांव इछा कौरु, सैजौ तौ ना कौरु, पौरौ जिनु बुराई कै इछा ना कौरु, सैजौई कौरेया कौरु। 20पौरौ जै हांव सैजौई कौरु जिथकी इछा ना कौरु, तौ तिथका कौरणौवाल़ा हांव ना रोई, पौरौ पाप जू मुं दा बौसेयौंदा औसौ। 21तौ हांव ऐजै नियम पोऊँ कै जोबै भोलाए कौरणौ कै इछा कौरु, तौ हांव सैजौ कौरु जू बुरु औसौ। 22जिथुकै हांव आपणै पूरै मन शै तौ पौरमेशवर कै नियम लैई बैजाए खुशी रोऊं। 23पौरौ मैरै आपणै शोरीर कै अंगो दै औकै भान्त कै नियम दैखियौं, मैरा मन जिनु नियम कै सोही मानौ, तिनु नियम कै खिलाफ मैरा शोरीर लोड़ो औरौ ऐजै नियम मुखै पाप का कैदी बाणौ, औरौ पाप जू मैरै शोरीर दा काम कौरौ।
24हांव कैशणा निर्भागै आदमी औसौ! जिथुकै मैरै शोरीर की इछाएं मुखै पौरमेशवर शै दूर कौरौ। मुखै इनु शोरीर कै इछाओं शै कुण छुड़ाला? 25हांव पौरमेशवर का धन्यवाद कौरु जैणै यीशु मसीह कै दवारा मुखै बौचौऊंवा, इथकारिए हांव आपणी बुध्दि लैई तौ पौरमेशवर कै नियम का, पौरौ शोरीर लैई पाप कै नियम कै सेवा कौरु।
Currently Selected:
रोमियों 7: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
