रोमियों 14
14
आज़ादी का नियम
1जू बिशवाशी भाई बिशवाश दा कमजोर औसौ तैसीखै कमजोर बिशवाश कै साथै बिना कोसी शक कै अपनांव,, तैसकै साथै बैहस नी कौरौ कै का कौरणौ चैंई या का ना कौरणौ चैंई। 2जिथुकै ऐकी कै बिशवाश औसौ, कै सौब ठुँ खाणौ आछौ औसौ, पौरौ जू बिशवाश दै कमजोर औसौ, सै शाग पात ही खांव।
3औरौ जू मांसहारी औसौ, सै निर्मांसी कै बैकार ना जाणौ, औरौ जू निर्मांसी औसौ सै मांसहारी पांदी दोष नी लाया; जिथुकै पौरमेशवर दु कै स्वीकार कौरौ। 4इथकारिए तुऔं कोसी कै दास का न्याय नी कौरणा चैंई? सै चाहै कामयाब हौंव या ना हौंव, तैसकै स्वामी ही शै सौमबंध राखौ, यानी सै कामयाब ही कौरे दिया जाला जिथुकै प्रभु तैसी कामयाब कौरे सौकौ।
5तैशैखैई ऐकी दूसौ कै ओकी शै बौड़ैयो मानौ, औरौ कुणिए सौबी दूसौ कै ऐक जैशणै मानौ: सौबी कै यकीन हौणा चैंई कै सै का सुंचौ? का सै सोही औसौ? 6जू कुणिए बै कोसी दूस कै मानौ, तौ सै ऐशैखै इथकारिए कौरौ जिथुकै सै प्रभु का आदर कौरणा चांव, जू मांसहारी औसौ, सै प्रभु कारिए औसौ, औरौ जू निर्मांसी औसौ सै बै प्रभु कारिए औसौ औरौ पौरमेशवर का धन्यवाद कौरौ।
7आमु सौबवे प्रभु कै औसौ। इथकारिए अमारै जीवन शै औरौ अमारै मौत शै आमु तैसी खुश कौरणा चैंई आपी कै नी। 8जिथुकै जै आमै जियुंदी औसौ, तौ प्रभु कै खातिर औसौ; औरौ जै आमु मौरे जोऊं, तौ प्रभु कै खातिर मौरु; तोबै आमै जियुं या मौरु, आमै प्रभु ही कै औसौ। 9जिथुकै मसीह इथकारिए मौरा औरौ औटेयौ जियुंदी हौए गौआ कै सै सैजाई औसौ जैसी मौरेयौंदे औरौ जियुंदी लोग दुईनै प्रभु कै रुप दै स्वीकार कौरौ।
10तौ तुऐं किथु आपणै साथी बिशवाशी भाई पांदी दोष लांव? या तोबै तुऐं किथु आपणै साथी बिशवाशी कै बैकार जाणौ? आमु सौबी का न्याय पौरमेशवर कै दवारा हौंदा। 11पवित्र शास्त्र दो,
“प्रभु बौल़ौ, हांव आपणै जीवन कै शौं खोऊं, सौबै मैरै धोरे घुंडू नियुड़ांदै,
औरौ सौबै आदमी पौरमेशवर कै मानै पांदै।”
12तौ तोबै, आमु मुंजीदै सौबी कै आपणै-आपणै कामौ का लैखा पौरमेशवर कै दैणा पौड़दा। 13इथकारिए औगौड़ियौ कै आमु ऐकी दूजै पांदी दोष नी लाणा चैंई, पौरौ तुऐं ऐजौ ठाणै पाव कै कुणिए आपणै साथी बिशवाशी कारिए पाप कै जाल दै फोशणौ कै बौजैह ना बौणौ।
प्यार का नियम
14हांव जाणुए, औरौ प्रभु यीशु शै मुखै पाको हौए रो, कै सौबै भोजन खाणौ कारिए ठीक औसौ, पौरौ जू तिथुकै अशुध्द सौमझौ, तैसी कारिए अशुध्द औसौ। 15जै तैरा भाई तैरै खाणौ कै बौजैह शै उदास हौंव, तौ तोबै तू प्यार कै हिसाब शै ना चालै, तौ आमु चौकश रौणौ चैंई ताकि आमु भोजन कै बौजैह शै अमारै साथी बिशवाशी कै बिशवाश खै नाश ना कौरु, जिथुकै मसीह तैसकै खातिर बै मौरा थिया।
16इथकारिए भले ही तुऐं जू कौरे लो सैजौ आछौ औसौ, पौरौ जै कुणिए आदमी सैजौ बुरु मानौ, तौ ऐजौ नी कौरेया। 17जिथुकै पौरमेशवर कै राज्य दो खाणौ पिणु खास ना आथी। खास बात ऐजी औसौ कै पौरमेशवर कै साथै सोही जीवन जिणा, पवित्र आत्मा दै शान्तै औरौ खुशी औसौ।
18जू कुणिए इयौं बौजैह शै मसीह कै सेवा कौरौ, तैसदा पौरमेशवर खुश हौंव औरौ लोग बै तैसकै बारै मुंजी आछौ बौल़ौ।
19इथकारिए आमु हमैशा तिनु बातौ कै कौचिश कौरणै चैंई जू शान्तै की बौजैह बौणौए, जिथलैई ऐकी दूजै कै मौदद औरौ बिशवाश मोजबूत हौंव। 20तुंआरै किछै खाणौ पिणौ की चीज़ौ कै बौजैह शै पौरमेशवर कै काम ना बिगड़ौ। सौब ठुँ ठीक औसौ, पौरौ किछै ऐशणै चीज़ खाणै गौलत औसौ जू ओकी आदमी कै पाप दै पोड़णो कै बौजैह बौणौ।
21भोला तौ ऐजौ औसौ कै तू ना मांस खाएं औरौ ना अंगूर का रस पिंए, औरौ ना किछै ऐशणौ कौरे जिथलैई तैरा साथी बिशवाशी पाप दा नै पौड़ौ।
22तू इनु बातौ कै बारै मुंजी जू किछै मानै सै तैरै औरौ पौरमेशवर कै बीच कै बात औसौ। धन्य औसौ सैजा जू तैसी बातौ दा, जिथुखै सै ठीक सौमझौ, आपी खै दोषी ना मानौ। 23पौरौ जै तुऔं इयौं बातौ दा शक औसौ कै तुऔं किछै खाणौ चैंई या ना, तौ जै तुऐं औगौड़ियौ बौढ़ेयौ इथु खाए दियु तौ तुऐं पाप कौरे लौआ। जिथुकै तुऐं आपणै बिशवाश का पालन ना कौरे लैई। आमु जू बै कौरुए, जै ऐजौ प्रभु दो बिशवाश कै साथै ना आथी, तौ सैजौ अमारै खातिर पाप औसौ।
Currently Selected:
रोमियों 14: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
