प्रेरितो कै काम 26
26
राजा अग्रिप्पा कै सामणै पौलुस का बेगुनाए का बैवरा
1राजा अग्रिप्पाए पौलुस खै बौल़ौ, “ताखै आपणै बारै मुंजी बौलणौ कि इजाज़त औसौ।” तोबै पौलुसे हाथ लैई इशारा कौरा औरौ आपणै बौचाव दा बौलांदा लागा, 2“ओए रै राजा अग्रिप्पा जैतरी बातौ का यहूदी नेता मुं पांदी दोष लांव, ऐलो तैरै सामणै तिथका जोवाब दैणौ खै हांव आपी कै धन्य सौमझु, 3हांव आपी कै धन्य सौमझु जिथुकै तू यहूदी लोगौ कै सौबी भोवारो औरौ विवादो खै जाणै। इथकारिए हांव बिन्ती कौरु, धीरज शै मैरी बातो शुण पा।”
4“जैशणा मैरा चाल-चलन जवानी कै सौमय आपणै लोगौ कै बीच औरौ यरूशलेम शहर दा थिया, ऐजौ सौबै यहूदी जाणौ।” 5सैजै लोग मुखै मैरी जवानी शै उंडा जाणौ औरौ जै चांव, तौ गवाही बै दैय सौकौ, हांव फरीसियों का ऐकै सदस्य रोए रौआ, जू की अमारै धरम का सौबिदा सख्त गुट औसौ। 6ऐलो हांव पौरमेशवर दवारा अमारै पुराणिया खै दैयौंदै वादै पांदी आशा राखणौ कै बौजैह शै इथै दोषी कै रुप दा खौड़ा औसौ। 7तैसी वादै कै पूरै हौणै खै आशा लायौ अमारै बारौ गोत्र आपणै सारै मन शै रात दूस पौरमेशवर कै आराधना कौरदै आए रौवै। ओए रै राजा, पौरमेशवर सैजौई कौरदा जू तैणै वायदा कौरे राए औरौ इयौं आशा कै बौजैह शै ऐजै यहूदी लोग मुं पांदी दोष लांव। 8तोबै पौलुसे भीड़ दै सौबी यहूदी लोगौ खै बौल़ौ, तुऔं ऐजै बात नामुमकिन काए लागौ कै पौरमेशवर मौरेयौंदे लोगौ खै औटेयौ जियुंदी कौरे सौकौ?
9“मोऐं बै सौमझै राए थियु की नासरत गांव कै यीशु कै खिलाफ मुखै बौहुत कुछ कौरणौ चैंई।” 10औरौ मोऐं यरूशलेम शहर दो ऐशैखैई कौरौ; औरौ मुख्य यहूदी पुरोहितो शै औधिकार पायौ खै भौरिशै पवित्र लोगौ खै कोयदखाने दै पाए, औरौ जोबै तिनु मारो थिए, तौ हांव बै तिनकै खिलाफ दै आपणी रजामंदी दियु थिया। 11औरौ हरेक यहूदी सभा-घोर दै हांव तिनु ताड़-ताड़ैयौ खै यीशु कि नेंदैया कौरौऊं थिया, इथै तौड़ी कै गुस्से कै मारै ऐशणा पागल हौए गौआ, कै ओकी शहरो दा बै जायौ खै तिनु सोतोऊं थिया।
12“इयौंई धुन दा जोबै हांव मुख्य यहूदी पुरोहित शै औधिकार औरौ आज्ञा पत्र लोयो खै दमिश्क शहर खै चालै रौआ थिया; 13तौ ओए रै राजा, बाटौ पुंडा दोफारी कै सौमय मोऐं गौयण पौरैशौ सुरजो शै बै जादा चोमकदार ऐक पेयाशो, आपणै औरौ आपणै साथी कै चोऊ ढौबौ चौमकैयौंदो दैखौ। 14औरौ जोबै आमै सौबै जोमीनो पांदी रिड़ै गौवै, तौ मोऐं इब्रानी भाषा दा, मुं आरी बौलदै बैई ऐजा शोब्द शुणा, ‘ओए रै शाऊल, ओए रै शाऊल, तू मुखै काए सोतांए? जै तू मैरै खिलाफ लोड़े, तौ तू सिरफ आपी खै बौहितै पौरैशानी दा पाईंदा।’
15मोऐं बौल़ौ, ‘ओए रै प्रभु, तू कुण औसौ?’ प्रभुए बौल़ौ, ‘हांव यीशु औसौ, जैसीखै तू सोतांए। 16पौरौ तू ऊबा बिज़, आपणै लातो पांदी खौड़ा हौ; जिथुकै मोऐं ताखै इथकारिए दर्शन दैय राए कै ताखै इनु बातौ का बै सेवक औरौ गवाह ठैहरोऊं, जू तुऐं दैख रैई, औरौ तिनका बै जिनु कारिए हांव ताखै दर्शन दैन्दा। 17औरौ हांव ताखै तैरै लोगौ शै औरौ बैगानै यहूदी लोगौ शै बौचांदा रौंदा, जिनकै धोरे हांव इबी ताखै इथकारिए भैजु। 18कै तू तिनकी आखी खुलै, ताकि सै इनारै पौरैशै पेयाशै खै डोबै, औरौ शैतानो कै औधिकारो शै पौरमेशवर कै ढौबौ फिरो; तोबै पौरमेशवर तिनकै पापौ खै माफ कौरदा, औरौ तिनु लोगौ कै साथै ऐक ठाँव दैंदा जू इथकारिए पवित्र कौरे राए जिथुकै सै मुं पांदी बिशवाश कौरौ।’
19इथकारिए ओए रै राजा अग्रिप्पा, हांव ऐसी स्वर्ग कै दर्शन का पालन कौरदा रौआ, 20पौरौ आगै दमिश्क शहर कै, तोबै यरूशलेम शहर कै रौणौवाल़ै कै, औरौ पूरै यहूदिया प्रदेश दै औरौ बैगानै यहूदियों खै मोऐं प्रचार कौरा, कै पाप कौरणा छोड़े दैंव औरौ पौरमेशवर कै ढौबौ फिरैयौ आपी खै साबित कौरौ कै तुऐं आपणै पापौ कै छोड़ेयौ पौरमेशवर कै ढौबौ फैरै गौवै। 21इनु बातौ की बौजैह शै यहूदी लोग मुखै मन्दिर दा पाकड़ेयो मारी दैणौ कै कौचिश कौरौ थिए। 22पौरौ पौरमेशवर कै मौदद लैई हांव ऐलो तौड़ी बोणेयोंदा औसौ, औरौ नानड़ै-बौड़ै सौबी कै सामणै गवाही दियु। औरौ हांव इनु बातौ खै छोड़ेयौ कै किछै ना बुलू, जू पौरमेशवर कै बातौ बौताणौवाल़ै औरौ मूसाए बै बौल़ै की हौणौवाल़ी औसौ, 23की मसीह खै दुख उठाणा पौड़दा, औरौ सै सौबिदा आगै मौरेयौंदे मुंजीदा जियुंदी हौयौ, यहूदी लोगौ औरौ बैगानै यहूदी लोगौ कारिए उध्दार कै पेयाशै का प्रचार कौरदा।”
24जोबै पौलुसे ऐशणै ढंग शै जवाब दैय लौआ थिया, तौ राज्यपाल फेस्तुसे जोर शै बौल़ौ, “ओए रै पौलुस, तू पागल औसौ। बौहितै विद्याए ताखै पागल कौरे राए।” 25पौरौ पौलुसे बौल़ौ, “ओए रै महाप्रतापी फेस्तुस, हांव पागल नी आथी, पौरौ सौचाई औरौ बुध्दि की बातौ बुलू। 26राजा बै जैसकै सामणै मोऐं बैदड़क हौयौ बौल़ै लौ, ऐजी बातौ जाणौए औरौ मुखै बिशवाश औसौ, कै इनु बातौ मुंजीदी कुणजै बै बात तैसीयादी छिपैयौंदी नी आथी जिथुकै ऐजी घटना तौ मेसो ना होई। 27ओए रै राजा अग्रिप्पा, का तू पौरमेशवर कै बातौ बौताणौवाल़ै का बिशवाश कौरे? हौर, हांव जाणुए, कै तू बिशवाश कौरे।” 28ऐबै अग्रिप्पाए पौलुस खै बौल़ौ, “का तू दैणी सौमझाणौ शै मुखै मसीह बाणणा चांए।” 29पौलुसे बौल़ौ, “पौरमेशवर शै मैरै ऐजी प्रार्थना औसौ, कै का दैणिक दा, का बौहितै दा, बस तू ही नी, पौरौ जैतरै लोग ऐलो मैरी शुणौ, मैरी इनु बेड़ियों कै छोड़ेयौ सै मैरै जैशणै मसीह बिशवाशी बौणै जांव।”
30तोबै राजा अग्रिप्पा औरौ राज्यपाल फेस्तुस औरौ तैसकै नानड़ै बौईण बिरनीके औरौ तिनकै साथै बौठणौवाल़ै लोग सौबै खौड़ै हौए गौवै औरौ आगु हौटै। 31जोबै सै बायरै जांदै लागै रौवै थिए, तौ सै ऐकी दूजै शै बौलदै लागै, “ऐसी आदमीए मौत का दण्ड या कोयदखाने जाणौ जूगा कुणजाई अपराध नी कौरे रैई।” 32राजा अग्रिप्पाए राज्यपाल फेस्तुस खै बौल़ौ, “जै ऐजा आदमी ऐजी मांग नी कौरदा कै महाराजा (कैसर) तैसका न्याय कौरौ, तौ छौटे सौकौ थिया।”
Currently Selected:
प्रेरितो कै काम 26: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
