प्रेरितो कै काम 23
23
1पौलुसे महासभा कै ढौबौ टकटकी लायौ खै दैखौ, औरौ बौल़ौ, “ओए रै भाईयों, मोऐं ऐलो तौड़ी पौरमेशवर कारिए बिल्कुल साची विवेक शै जिन्दगी बिताए राए।” 2पौलुसे जू बौल़ौ ऐजौ शोणेयो कै हनन्याह महायहूदी पुरोहिते, तिनुखै जू तैसकै धोरे खौड़ै थिए, तैसकै मुँओं पांदी चढताल़ा लाणौ कै आज्ञा दै। 3जोबै कोसीए पौलुसो कै चढताल़ा लाया, तिथकै बाद, पौलुसे तैसी बौल़ौ, “ओए रै पाखंडी, पौरमेशवर ताखै मारदाए। तू मूसा कै कानून कै हिसाब शै मैरा न्याय कौरणौ कारिए बौठै रौआ, औरौ तोबै का मूसा कै कानून कै खिलाफ मुखै मारणौ की आज्ञा दैय?” 4जू नेड़िक खौड़ै थिए, तिनुऐ बौल़ौ, “का तू पौरमेशवर कै महायहूदी पुरोहित कै नेंदैया कौरे?” 5पौलुसे बौल़ौ, “ओए रै भाईयों, हांव ना जाणु थिया, कै ऐजा महायहूदी पुरोहित औसौ, जिथुकै पवित्र शास्त्र दो लैख राए, आपणै लोगौ कै प्रधान कै बुरु नी बौल।”
6तोबै पौलुसे ऐजौ जाणैयौ, कै किछै सदूकी लोग औरौ किछै फरीसी लोग औसौ, महासभा मुंजी जोर शै बौल़ौ, “ओए रै भाईयों हांव फरीसी औरौ फरीसियों कै सन्तान का औसौ, मैरा मुकदमा इथकारिए हौंदा लागै रौआ जिथुकै मुखै आशा औसौ कै पौरमेशवर मौरेयौंदे लोगौ खै मौरेयौंदे मुंजीदा जियुंदी कौरदा। 7जोबै तैणै ऐजै बात बौल़ै तोबै फरीसी औरौ सदूकी लोगौ मुंजी झोगड़ा हौंदा लागा, औरौ सभा घोरो दै फूट पौड़ै गौए। 8जिथुकै सदूकी लोगौ का ऐजा बिशवाश औसौ, कै लोग मौरणौ कै बाद मौरेयौंदे मुंजीदै जियुंदी ना हौंदै, ना स्वर्गदूत औरौ ना आत्मा आथी, पौरौ फरीसी लोग इनु सौबी बातौ दा बिशवाश कौरौ। 9तोबै बौड़ा रोल़ा पौड़ा औरौ किछै यहूदी शास्त्री जू मूसा कै कानून शिखाणौ वाल़ै थिए, खौड़ै हौयौ औरौ ऐजौ बौलेयौ बैहस कौरदै लागै, आमुए ऐसी आदमी दी किछै बै बुराए ना पैई औरौ हौए सौकौ कै ऐक आत्मा या स्वर्गदूतै ऐसीआरी बात कौरे राए”
10जोबै तिथै बैजाए बैहस हौंदै लागै, तौ सैनिक गुट कै सरदारे ऐसी डौरौ शै कै सै पौलुसो कै टुकड़ै-टुकड़ै नी कौरे दैंव सैनिक गुट कै आज्ञा दै की ओतरेयो पौलुस खै सभा कै सदस्यों कै बीचो मुंजीदा जोरै घाड़ो, औरौ गढ़ दा लोय जाव। 11तैसी रातै प्रभु यीशुए पौलुस कै धोरे खौड़ै हौयौ बौल़ौ, “ओए रै पौलुस सब्र राख; जिथुकै जैशणै तुऐं यरूशलेम शहर दै मैरै गवाही दै, तैशैखैई ताखै रोम देश दै बै गवाही दैणी पौड़दै।”
पौलुस कै मारणौ का षडयंत्र
12जोबै झीश हौए, तौ किछै यहूदी लोगै तरकीब बाणै, औरौ तिनुऐ ऐजै शौं खाए कै जांव तौड़ी आमु पौलुस खै मारै नी दियु, तांव तौड़ी आमु ना किछै खोऊं औरौ ना किछै पियुं। 13जिनुवै ऐजै शौं खाए राए थी, सै चाल़ीश दै बै जादा आदमी थिए। 14तिनुऐ मुख्य यहूदी पुरोहित औरौ बुड़ेईको कै नेड़िक आयौ बौल़ौ, “आमुए ऐजै शौं खाए राए कै जांव तौड़ी आमु पौलुस खै मारै नी दियु, तांव तौड़ी जै किछै बै खोऊं, तौ आमु पांदी लानत औसौ।” 15इथकारिए ऐबै महासभा समैंत सैनिक गुट कै ठोगड़े खै ऐशै सोमझाव, कै जोबै सै पौलुस खै तोंवारै धोरे लेयालै, तोबै ऐशणा दिखावा कौरेया कै तुऐं तैसकै मुकदमे कै बारै मुंजी हौजौ बै ठीक शै जांच कौरणा चांव, औरौ आमु तैसकै पोऊंचणौ दै औगौड़ियौ ही तैसी मार दैणौ कारिए तैयार रौंदै।
16पौरौ पौलुस कै भांजै शुणु कै यहूदी लोगै पौलुस खै मारणौ कै तरकीब बाणै लोए थी, तौ गढ़ दा जायौ पौलुस खै सौंदेश दिया। 17पौलुसे सूबेदारो मुंजीदा ऐकी खै आपणै धोरे बौएदैयौ बौल़ौ, “इनु जोवानो खै सैनिक गुट कै ठोगड़े कै नेड़िक लोय जाव, ऐजै तैसीखै किछै बौलणौ चांव।” 18इथकारिए सूबेदार पौलुस कै भांजै खै सैनिक गुट कै ठोगड़े कै धोरे लोय गौआ औरौ बौल़ौ, “कैदी पौलुसे मुखै बौएदैयौ बिन्ती कौरे, कै ऐजा जवान सैनिक गुट कै ठोगड़े शै किछै बौलणौ चांव; ऐसी तैसकै धोरे लोए जांव।” 19सैनिक गुट कै ठोगड़े तैसका हाथ पाकड़ेयो, औरौ तैसी जौई नियौ पूछु, “तू मुंकैई का बौलणौ चांए?” 20तैणै बौल़ौ, “यहूदी नेताए योजना बाणै राए, कै तांव कैईंदै बिन्ती कौरौ कै दोतियो पौलुस कै महासभा दा लायौ, ऐशणा दिखावा कौरेयौ कै तुऐं तैसकै बारै मुंजी हौजौ बै ठीक शै जांच कौरणा चांव। 21पौरौ दया कौरेयौ तैशै नी कौरेया जैशै सै ताखै कौरणौ कारिए बौल़ौ, जिथुखै तिनुमुंजी दै चाल़ीश दै जादा आदमी तैसकै मारणौ कै ताको दै औसौ, जिनुवै ऐजी शौं खाए रैई कै जांव तौड़ी सै पौलुसो खै मारै नी दैंव, तांव तौड़ी ना खांदै ना पींदै, औरौ ऐबै सै तैयार औसौ औरौ तैरै वचन कै ठोल़नाए कौरे लोए।” 22तोबै सैनिक गुट कै ठोगड़े जोवानो खै ऐजै आज्ञा दैयौ आगु छाड़ै, “कोसी कैंई नी बौलेया कै तुऐं मुखै ऐजी बातौ बौताए रैई।
पौलुस कै कैसरिया खै भैजणा
23सैनिक गुट कै ठोगड़े तोबै दु सूबेदारो खै बौएदैयौ खै बौल़ौ, दो सौ सैनिक, सतर शवार, औरौ दो सौ भाले खै कैसरिया शहर जाणौ कारिए तैयार कोरयो राखौ, तू राती कै नौ बोजे निकल़ेया।” 24औरौ पौलुस कै शवारी कारिए घोड़ा तैयार राखौ, कै तैसी फेलिक्स राज्यपाल कै धोरे ठीक ढंग शै पोऊंचाए दैंव।
25सैनिक गुट कै ठोगड़े ऐशैखैई राज्यपाल खै ऐक चिट्टी लैखै: 26“महाप्रतापी फेलिक्स राज्यपाल खै क्लौदियुस लुसियास की औरौ शा नमशकार। 27ऐसी आदमी खै यहूदी लोग पाकड़ेयौ खै मारणा चांव, पौरौ जोबै मोऐं जाणौ कै सै रोम शहर का रौणौवाल़ा औसौ, तौ सैनिक गुट नियौ खै बौचायौ लियोऊवा। 28औरौ हांव जाणु थिया, कै सै तैसी पांदी कियों बौजैह शै दोष लांव, इथकारिए तैसी तिनकी महासभा दै लोए गौवै। 29तोबै मोऐं जाणै पोऊँ, कै सै आपणै यहूदी कानून कै बैहस कै बारै मुंजी तैसी पांदी दोष लांव, पौरौ मारणौ या बानणो कै लायक तैसदा कुणजाई दोष नी थी। 30औरौ जोबै मुंआगो बौतौऊं, कै सै ऐसी आदमी कै मारणौ कै ताको दै लागै रौवै तौ मोऐं तौलोंई तैसीखै तैरै धोरे छाड़ै दिया; औरौ तिनु यहूदी लोगौ कै जिनुवै तैसी पांदी आरोप लाए राए तिनुकै आदैश दिया कै तैरै सामणै तैसी पांदी दोष लांव।”
31तियौंई राती सैनिके दैयौंदै आदैशो कै पूरै कौरे: सै पौलुसो खै यरूशलेम शहर शै लोए गौवै औरौ तैसी अन्तिपत्रिस शहर दा लियोऊवा। 32दूजै दूसै तिनिए घुड़-शवारों खै पौलुस कै साथै कैसरिया शहर कै डियाल़ेयो औरौ पौयदल सिपाही आपी यरूशलेम शहर खै पाछु ओऊवे। 33तिनुऐ कैसरिया नोगर पोंचैयो राज्यपाल खै चिट्टी दै; औरौ पौलुसो खै बै तैसकै सामणै खौड़ा कौरा। 34राज्यपाले चिट्टी पोढ़ेयो खै पूछु, “ऐजा कोसी प्रदेश का औसौ?” 35औरौ जोबै जाणै पोऊँ कै किलिकिया प्रदेश का औसौ; तौ तैसीकै बौल़ौ, “जोबै तैरै आरोपी बै आलै, तौ हांव तैरा मुकदमा लोड़दा।” औरौ तैणै पौलुस खै राजा हेरोदेस कै किले दै, रोखवाल़ी दै राखणौ कि आज्ञा दै।
Currently Selected:
प्रेरितो कै काम 23: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
