प्रेरितो कै काम 10
10
कुरनेलियुस का दर्शन
1कैसरिया नगर दा कुरनेलियुस नांव का ऐक आदमी थिया, जू इतालियानी नांव सैनिक गुट का सूबेदार थिया। 2सै पौरमेशवर कै भोक्ती कौरौ थिया, औरौ आपणै सौबै कुड़बे समैंत पौरमेशवर शै डौरौ थिया, औरौ गरीब यहूदी लोगौ कै बैजाए दान दैंव थिया, औरौ हमैशा पौरमेशवर शै प्रार्थना कौरौ थिया।
3ऐकी दूसै, दोफारी कै लमसम ती बोजे तैणै दर्शन दो साफ-साफ दैखौ कै पौरमेशवर कै ऐकी स्वर्गदूतै तैसकै धोरे भीतरै आयौ बौल़ौ, “ओए रै कुरनेलियुस।” 4कुरनेलियुसे तैसी ध्यान शै दैखा औरौ डौरेयौ बौल़ौ, “ओए रै मालिक का औसौ?” तैणै तैसी बौल़ौ, “तैरी प्रार्थनाए औरौ तैरै दान याद कारिए पौरमेशवर कै सामणै पौऊंचै रौवै। 5औरौ ऐबै याफा नगर दै आदमी भैज, औरौ शमौन नांव कै ऐकी आदमी खै बोईदै पा जैसीखै पतरस बै बौल़ौए। 6शमौन ऐसी सौमय कुणजाई चामड़े का धान्धा कौरणौवाल़ै कै घोरे मैहमान बौणैयौं टीकी रौआ थिया, जैसकौ घोर समुन्द्रो कै किनारे पांदी थियु।”
7जोबै स्वर्गदूत कुरनेलियुस शै बातौ कौरेयौ हौटै गौआ, तोबै कुरनेलियुसे दु नोकरो खै, जू तैसकै धोरे हाजिर रौंव थिए तिनुमुंजी दै ऐकी कै बौईदा, जू पौरमेशवर कै भोक्ती कौरणौवाल़ा सिपाही थिया। 8औरौ तिनुखै सौबै बातौ बौताएयो याफा नगर दा पतरस खै लाणौ कारिए छाड़ै।
पतरस का दर्शन
9औरौ जोबै कुरनेलियुस कै भैजैयौंदे तीन आदमी हांडदै-हांडदै दूजै दूसै दोफारो कै सौमय नगर कै नेड़िक पौऊंचै, तौ तैसी सौमय पतरस बै छोतौ पांदी प्रार्थना कौरणौ कारिए हौटै गौआ। 10तैसी भूख लागै औरौ किछै खाणौ चांव थिया, पौरौ जोबै तिनुऐ खाणौ कै तैयारी कौरे लोए थी तौ सै बेहोश हौए गौआ। 11औरौ तैणै दैखौ, कै स्वर्ग खोले गौ; औरौ किछै चीज़ कुणजै ऐक बौड़ै चादर कै जैशणै चोऊ कुणै शै लोटकैयौंदे, धोरती कै ढौबौ उतरदै लागै रोए थै। 12जिथमुंजी धोरती कै सौबै भान्त कै चौपाए औरौ रेंगणैवाल़ै कीड़ै मकोड़े औरौ गौयण कै चुड़कुल़ै थिए। इनु मुंजी कुणजैई जीव-जन्तु ऐशणै थिए जू अशुध्द थिए औरौ मूसा कै कानून कै हिसाब शै इनु खाणै मोना थिए। 13औरौ तैसकै ऐक ऐशणी आवाज़ शौणै, “ओए रै पतरस बिज़ मार औरौ खा।” 14पौरौ पतरसे बौल़ौ, “ना प्रभु, कौलोंई बै नी; जिथुकै मोऐं कौलोंई अपवित्र या अशुध्द चीज़ ना खाए रैई।” 15तैसकै दुजाल़ियो आवाज़ शौणै, “जू किछै पौरमेशवरे शुध्द कौरे राए, तिथु तू अशुध्द नी बौल।” 16औरौ तीन बैई ऐशैकैई हौं; तोबै तौलोंई सैजै चादर स्वर्ग कै ढौबौ ऊबै टिपै गौए।
कुरनेलियुस कै घोरे पतरस
17जोबै पतरस आपणै मनो दा दुविधा दा थिया, कै ऐसी दर्शन का मतलब का हौए सौकौ जू मोऐं दैख राए, तोबै सैजै आदमी जिनु कुरनेलियुसे भैजै राए थिए, शमौन कै घोरो का पोता लायौ दवारो पांदी आयौ खौड़ै हौवे। 18औरौ धाव दैयौ पूछदै लागै, “का शमौन जैसकै पतरस बै बौल़ौए, इथैशा मैहमान औसौ?” 19पतरस तैसी दर्शन पांदी सोंचै ही लो थियु कै पवित्र आत्माए तैसी बौल़ौ “दैख, ती आदमीए ताखै जौए लौआ। 20ऊबा बिज़यो उदा जा, बैशक सैजा आदमी बैगाना यहूदी औसौ, इथकारिए निशोंक तिनुआरी हौए जा, जिथुकै मोऐं तिनु भैजै राए।” 21तोबै पतरसे धैनै ओतरेयो तिनु आदमी कै बौल़ौ, “दैखौ, जैसीखै तुऐं जौए लौआ, सै हांव ही औसौ; तोंवारै आणौ कै का बौजैह औसौ?”
22तिनुऐ बौल़ौ, “कुरनेलियुस सूबेदार जू धरमी औरौ पौरमेशवर शै डोरणोवाल़ा औरौ सौबै यहूदी जाति कै लोगौ दा सुनांव आदमी औसौ, तैणै ऐक पवित्र स्वर्गदूतौ शै ऐजै बात पाए राए, कै ताखै आपणै घोरे बौएदैयौ तांव कैईंदा उपदैश शुणौ।” 23तोबै तैणै तिनु भीतरै बौएदैयौ तिनुखै रौणौ कै ठाँव दिया। औरौ दूजै दूसै, सै तिनकै साथै हौटा, औरौ याफा नगर कै कुणजैई भाई तैसकै साथै हौटै गौवै।
24तिजै दूसै सै कैसरिया नगर पौऊंचै, औरौ कुरनेलियुसे आपणै कुड़बे औरौ प्यारे दोस्तो कै कौठै कौरेयौ तिनका इंतजार कौरे लौआ थिया। 25जोबै पतरस भीतरै आन्दा लागै रौआ थिया, तौ कुरनेलियुस तैसीआरी भैटिया, औरौ तैसकै लातो पांदी पौड़ेयौ तैसी ढाल़ कौरा। 26पौरौ पतरसे तैसी बिजाल़यो बौल़ौ, “खौड़ा हौं, मैरी आराधना नी कौर हांव बै तौ आदमी औसौ।”
27औरौ तैसीआरी बातौ कौरेयौ भीतरै हौटा, औरौ भौरिशै लोगौ कै कौठै दैखैयो 28पतरसे तिनुकै बौल़ौ, “तुऐं जाणौए, कै बैगानै यहूदी लोगौ कै संगति कौरणै या तिनकै इथै जाणौ आमु यहूदी लोगौ कारिए अमारै कानून कै खिलाफ औसौ, पौरौ पौरमेशवरे मुखै बौताए राए कै कोसी आदमी कै अपवित्र या अशुध्द ना बुलू। 29इथकारिए मुखै जोबै बौईदा गौआ तौ बिना किछै पूछै आगु हौटा। ऐबै हांव पूछु कै मुखै कोसी कामौ कारिए बौएदै राए?”
30कुरनेलियुसे बौल़ौ, “चार दूस आगै, ऐसी सौमय, मोऐं आपणै घोरे दै दोफारी कै ती बोजे प्रार्थना कौरे लोए थै, कै ऐक आदमी चौमकिला खोटणो बाम्बैयौ, मैरै सामणै आयौ खौड़ा हौए गौआ। 31औरौ बौलदा लागा, ‘ओए रै कुरनेलियुस, तैरी प्रार्थना शौणै पाए औरौ तैरै दान पौरमेशवर कै सामणै याद राए कौरे।’ 32इथकारिए कोसी खै याफा नगर भैजैयो शमौन खै जैसी कै पतरस बै बौल़ौए, बौईद। सै समुन्द्र कै किनारे, चामड़े का धान्धा कौरणौवाल़ै शमौन कै घोरे मैहमान औसौ जोबै सै आला, तौ ताखै पौरमेशवर कै ढौबौशा ऐक सौंदेश बौतांदा। 33तोबै मोऐं तावल़ै तैरै धोरे लोग भैजै, औरौ तुऐं ठीक कियु जू आए गौआ। ऐबै आमु सौबै इथै पौरमेशवर कै सामणै औसौ, ताकि जू किछै पौरमेशवरे ताखै बौल़ै राए सैजौ शुणु।”
कुरनेलियुस कै घोरे पतरस का उपदैश
34तोबै पतरसे बौल़ौ, ऐबै मुखै बिशवाश हौए गौआ, कै पौरमेशवर कोसी का पक्ष ना लोंव, 35यानी हर देश दा जू पौरमेशवर शै डौरौ औरौ धरम कै काम कौरौ सै तिनु अपनावंए।
36तुऔं तैसी खबर कै बारै मुंजी पोता औसौ, जू पौरमेशवरे अमारै खातिर यानी इस्राएल देश कै लोगौ कै दैय राए थै। तैणै शान्तै कै बारै मुंजी सुसमाचार शुणौऊवा जू लोगौ खै यीशु मसीह पांदी बिशवाश कौरणौ कै दवारा भैटी सौकौ। सै सौबी लोगौ का पौरमेशवर औसौ। 37सैजा वचन तुऐं जाणौए, जू यूहन्ना कै बपतिस्मा कै प्रचार कै बाद गलील जिले शै शुरु हौयौ सारै यहूदिया प्रदेश दा फोयलै गौआ: 38पौरमेशवरे कैशैखै नासरत गांव कै यीशु खै पवित्र आत्मा औरौ अनौखी शौकतै लैई अभिषेक कौरा; सै भोलाए कौरदा औरौ सौबी खै जू शैतान कै सोताएयौंदे थिए, आछा कौरदा फिरा, जिथुकै पौरमेशवर तैसकै साथै थिया।
39औरौ आमुए चोणेयौंदे चैलै लोगौ खै तिनु सौबी बातौ कै बारै मुंजी बौताए लो, जू आमु यीशु कै यरूशलेम शहर दै औरौ बाकी यहूदी देश दै कौरदै दैखा औरौ यरूशलेम कै यहूदी नेताए तैसीखै क्रूसो पांदी लोटकायो मारै दिया। 40पौरौ पौरमेशवरे तिजै दूसै तैसीकै मौरेयौंदे मुंजीदा जियुंदी कौरा, औरौ दिखाए बै दिया। 41सौबी लोगै तैसी ना दैखी पौरौ तिनु गवाहै जू पौरमेशवर कै चोणेयौंदे चैलै औसौ जिनुखै पौरमेशवरे औगौड़ियौ ही चोणे राए थिए, मतलब आमु जिनुवै तैसकै मौरेयौंदे मुंजीदै जियुंदी हौणौ कै बाद तैसकै साथी खोऊ पियु;
42औरौ तैणै आमु आज्ञा दै कै सौबी लोगौ मुंजी प्रचार कौरेया औरौ गवाही दैया कै यीशु सैजाई औसौ जैसी पौरमेशवरे जियुंदै औरौ मौरेयौंदे का न्यायी बाणै राए। 43तैसकै सौबै पौरमेशवर कै बातौ बौताणौवाल़ै गवाही दैंव कै जू कुणिए यीशु पांदी बिशवाश कौरला, तैसी तैसकै नांव कै दवारा पापौ की माफी भैटदै।
बैगानै-यहूदियों पांदी पवित्र आत्मा का आणा
44पतरसे ऐजी बातौ बौल़ै ही लोई थी कै वचन कै सौबै शुणणौवाल़ै पांदी पवित्र आत्मा उतरे गौए। 45औरौ जैतरै खतना कौरेयौंदे यहूदी बिशवाशी पतरस कै साथी आए रौवै थिए, सै सौबै हैरान हुवे कै बैगानै यहूदी पांदी बै पवित्र आत्मा का दान दैय राए।
46जिथुकै तिनुऐ तिनु सांत-भांत की भाषा बौलदै औरौ पौरमेशवर कै बौड़ाए कौरदै शौणै, इथपांदी पतरसे बौल़ौ, 47“का ऐबै कुणिए इनु पाणी लैई रौकै सौकौ कै ऐजै बपतिस्मा नी पांव, जिनुवै आमु साए पौरमेशवर की औरौ शै पवित्र आत्मा पाए राए?” 48औरौ जू लोग कुरनेलियुस कै घोरे पुंडे कौठै थिए, तिनु लोगौ खै पतरसे आज्ञा दै की तिनु यीशु मसीह कै नांव शै बपतिस्मा दिया जांव। तोबै तिनुऐ पतरस शै बिन्ती कौरे, कै किछै दूस हौजौ अमारै साथी रौव। औरौ इथकारिए पतरस औरौ किछै यहूदी बिशवाशी किछै दूसौ कारिए तिथै रौकै गौवै।
Currently Selected:
प्रेरितो कै काम 10: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
