रोमियो 5
5
परमेश्वरा सिंउ मेल
1ऐठणीरै तेईनी जब असै विश्वासै ला धर्मी बंणा छडोरै अत्तै, ता असेड़ै प्रभु यीशु मसीहरै जरियै परमेश्वरा सेईतै असैड़ा मेल-मिलाप भौ गियौरा। 2ता असेड़ै विश्वास कांने ला, मसीह असै ऐस अनुग्रह मझ अंणै, जेठि असै ऐम्हियां पुजोरै अत्तै। असै ऐस गलै सौचि करि खुश भूंतै कि असु किनि परमेश्वरेरी महिमा मझ हिस्सैदार भूंणैरी आशा आ। 3यौतुवै ना पण जेख्णी असै परेशानियां मझ भूंतै, तेख्णी बि आनन्द मना सकतै, केईनी कि असु पता कि असै दुख सहन कातै, ता अच्छै तरीकै सिंउ धीरज रखणा जांणतै। 4जां परमेश्वर असु स्वीकार काता, केईनी कि असै धीरज रखणा जांणतै जां सैक्या असु स्वीकार काता, ऐठणीरै तेईनी असु आशा। 5जां ऐ आशा असु निराश ना भूंणा दींति, केईनी कि पवित्र आत्मा जै परमेश्वरै असुनि दितौरा, तेनी ला परमेश्वरैरा प्रेम असेड़ै दिला मझ भरी दितौरा।
6केईनी कि जेख्णी असै निर्बल ऐ थ्यै, ता परमेश्वरेरै जरियै सही टैंमा पनि मसीह असुवां अधर्मियां मैहणुवां केरै तेईनी मरा। 7कोसकैरू एकि धर्मी मैहणुरै तेईनी मरनु मुश्किल आ। पण शायद भौ सकतु कि कोई सच मझ कोसक्यै अच्छै मैहणुरै तेईनी मरनेरै तेईनी तियार भौ गहिया। 8पण परमेश्वर असु पन अपड़ै प्रेमैरी भलाई ऐहीं-चारै प्रकट काता कि जेख्णी असै पापी-ऐ थ्यै, तेख्णी मसीह असेड़ै तेईनी मरा। 9अगर असै यीशु मसीहरै खूनै ला धर्मी ठहराउरै अत्तै, ता तैस असै सही मझ परमेश्वरेरै गुस्सै किना बचांणै। 10केईनी कि जेख्णी असै परमेश्वरेरै दुशमण थ्यै, ता तेनी अपड़ै पुत्रेरी मोउती ला असैड़ा मेल-मिलाप करा, ऐठणीरै तेईनी असै सही मझ ऐ जांणि सकतै कि जेख्णी अबै असैड़ा तैस सिंउ मेल-मिलाप आ, ता तैस असै बचांणै, केईनी कि मसीह जींता। 11जां सिर्फ ऐक्यु-ऐ ना, पण अबै ता असेड़ै प्रभु यीशु मसीहरै जरियै परमेश्वरा सिंउ असैड़ा मेल-मिलाप भौ गियौरा; ऐठणीरै तेईनी असै परमेश्वरा मझ आनन्दित अत्तै।
आदम मझ मोउत, मसीह मझ जीवन
12ऐठणीरै तेईनी एकि मैहणु ला संसारा मझ पाप या, मतलब आदमै ला या। सैक्या पेहिला मैहणु जै परमेश्वरै बंणा, केईनी कि आदमै पाप केया जां सैक्या मरि ग्या; जां ऐहियें-चारै सभनियां मैहणुवां केरै जीवना मझ मोउत यैई, केईनी कि सभ पापी भौ गियोरै थ्यै। 13परमेश्वरेरै द्वारा मूसेनी व्यवस्था दींणा किना पेहिलै बि पाप संसारा मझ थ्या, पण ऐसेरी पापेरै रूपा मझ गिणती ना भुई, केईनी कि हालै-तेईनी त्रोड़नेरै तेईनी कोई व्यवस्था ना थी। 14तांबि आदमा किना लै-करि मूसै तेईनी सभनियें मैहणुवें पाप क्यौरा, जां सभ मरि गियोरै अत्तै, आदम किछ गलै मझ तैस मैहणु सैयि थ्या जां किछ गलै मझ तैस किना अलग थ्या, जै ऐईंणै वा थ्या।
15पण आदमैरा पाप तैस वरदाना सैयि ना, जै परमेश्वर असुनि अपड़ै अनुग्रह ला दींता। केईनी कि एकि मैहणुरा पाप सारा मैहणुवां केरै तेईनी मोउत लै करि या। पण परमेश्वरैरा अनुग्रह जां धार्मिकतायरा वरदान, जै असुनि तेनी दित्ता; तेसैरी कीमत सभनियां मैहणुवां केरै तेईनी तेत किना बड़ी जादी आ। जां यीशु मसीह एकि मैहणुरै रूपा मझ अपड़ै अनुग्रह ला जै कियु, तेनी ऐ संभव कियु। 16परमेश्वरै जै वरदान असुनि दितौरा, सै आदमेरै पापा सैयि ना। केईनी कि एकि मैहणुरा पाप सजा लै-करि या, पण बेशक असै बड़ै सारै पाप क्यौरै अत्तै, फिरी बि परमेश्वरै असुनि अक ऐतिया अनुग्रह दित्ता, जेनि असै तेसेरी नजरी मझ धर्मी बंणा दित्तै। 17केईनी कि जेख्णी एकि मैहणुरै पापै ला सभनियां मैहणुवां मझ मोउत यैई, ता जैन्हां मैहणुवंनी अनुग्रह जां धार्मिकताय वा वरदान भरपूर रूप सिंउ मेईंता, तैन्हांंनि एकि मैहणु मतलब यीशु मसीह ला अनन्त जीवन मेईंणा जां तैन्हांं यीशु मसीह सिंउ राज कांनु; केईनी कि सैक्यै तैस पन विश्वास कातै।
18ऐठणीरै तेईनी जिहीं एकि मैहणु ला सभनियां मैहणुवंनी सजा मेयि; तिहियें मसीहरा धर्मेरा कंम बि सभनियां मैहणुवां केरै तेईनी धर्मी बंणनेरी वजह बंणी, जै जीवन दींता। 19केईनी कि जिहीं एकि मैहणुरी आज्ञा ना मनणै ला, बड़ै सारै मैहणु पापी बंणै, तिहियें एकि मैहणुरी आज्ञा मनणै ला बड़ै सारै मैहणु धर्मी बंणनै। 20मूसेरी व्यवस्था ऐठणीरै तेईनी दित्ती, ताकि सभ मैहणु तका लिया कि सैक्यै कियोतै पापी थ्यै। पण जेख्णी मैहणुवें हौरा जादा पाप केया ता परमेश्वरै जै अनुग्रह लुहा, सैक्या हौरा बि जादा भौ ग्या। 21कि जिहीं सभनियें मैहणुवें पाप केया जां सैक्यै सारै मरि ग्यै, तिहियें असेड़ै प्रभु यीशु मसीहरै जरियै, परमेश्वरेरै अनुग्रह ला सैक्यै धर्मी बंणाणै जां तैन्हांंनि अनन्त जीवन दींणा।
Currently Selected:
रोमियो 5: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
