रोमियो 13
13
राज्यरै तेईनी जिम्मेवारी
1हर अक मैहणु प्रधान अधिकारिया केरै आधीन रिय्हा; केईनी कि सारै अधिकार परमेश्वरेरी तरफ सिंउ अत्तै, जां जै अधिकार अत्तै, सैक्यै परमेश्वरेरी तरफ सिंउ ठहराउरै अत्तै। 2ऐठणीरै तेईनी जै कोई ऐतिया अधिकारिया केरा विरोध काता, सै परमेश्वरेरी विधिरा विरोध काता; जां विरोध कांनारेनी सजा मेईंणी। 3केईनी कि अगर कोई अच्छा कंम काता, ता तैस अधिकारिया किना डरींणैरी जरूरत ना; पण अगर सैक्या बुरै कंम काता ता तैस डरींणैरी जरूरत आ। अगर तुवे अधिकारिया किना बिना डरै रींहणा चांहथै अत्तै, ता अच्छै कंम करा, कि सैक्यै तुवाड़ी तारीफ करिया। 4केईनी कि अधिकारी मैहणु तुवाड़ी मजत कांनेरै तेईनी परमेश्वरेरी तरफ सिंउ सेवक अत्तै। पण अगर तु बुराई करिया, ता डर; केईनी कि तैन्हांं किनि तुहांनि सजा दींणैरा हक आ जां सैक्यै परमेश्वरेरै सेवक ऐठणीरै तेईनी अत्तै, ताकि सैक्यै तैन्हांं मैहणुवंनी सजा दिया, जै गलत कंम कातै अत्तै। 5ऐठणीरै तेईनी तुहां ऐहीं सिर्फ सजाय किना बचणेरै तेईनी ऐ ना कांनु चेहिंथु, पण ऐठणीरै तेईनी बि कि परमेश्वरैरा आत्मा शुद्ध रिय्हा। 6ऐठणीरै तेईनी अधिकारियनी कर बि दिया, केईनी कि राज कांनार परमेश्वरेरै सेवक अत्तै जां अपड़ि जिम्मेवारी निभांणेरै तेईनी सैक्यै अपांणा समर्पित कातै। 7ऐठणीरै तेईनी जैसनि जै किछ दियूंणु निर्धारित आ, तेसनी सै दिया; जैस कर चेहिंथा, तेसनी कर दिया; जैस चुंगी चेहिंथी, तेसनी चुंगी दिया; जां सभनियांं अधिकारियनी पूरा आदर दिया।
पड़ोसी सिंउ प्रेम रखा
8तुहां सभनियां सिर्फ एकि गलैरै कर्जदार भूंणु चेहिंथु जां सैकेई ऐ आ कि तुवे सभ योकिया सिंउ प्रेम रखा; केईनी कि जै योकिया सिंउ प्रेम रखता, तेनिऐ व्यवस्था पूरी क्यौरी आ। 9केईनी कि मूसेरी व्यवस्थाय मझ बड़ी आज्ञाय अत्ति, जिहीं कि, “व्यभिचार मेईं करा, हत्या मेईं करा, लालच मेईं करा” जां ऐन्हां छडि करि होरी बि आज्ञाय अत्ति, तां तैन्हांं सभनियां किना बडी आज्ञा ऐ आ कि, अपड़ै पड़ोसी सिंउ अपड़ै समान प्रेम रख। 10प्रेम पड़ोसिरी किछ बुराई ना काता, ऐठणीरै तेईनी अगर असै प्रेम कातै, ता असै परमेश्वरेरी व्यवस्था पूरी कातै। 11तुहां मझियां हर-एकि योकिया सिंउ प्रेम कातै रींहणु चेहिंथु, केईनी कि सैक्या टैंम नीड़ आ, जेख्णी परमेश्वरा असै इस बुरी दुनियें किना बचांणै। जेख्णी असै पेहिली बारी मसीह पन विश्वास केईथ्या, तैस धियाड़िरी तुलनाय किना अबै मसीह असु बचांणेरै तेईनी वापस ऐईंणैरी धियाड़ी नीड़ आ। 12ऐस बुरी दुनियें मझ रींहणैरा असैड़ा टैंम अक रात खत्म भूंणा सैयि लगभग खत्म भौ गियौरा। जां सैक्या टैंम बि नीड़ आ, जेख्णी मसीह वापस ऐईणु; ऐठणीरै तेईनी असु अंधारै सिंउ जुड़ौरै कंम कांने बंद करि दींणै चेहिंथै, जां प्रगड़ु सिंउ सम्बंधित हथियार लै लींणै चेहिंथै। 13ऐईछा असै अपड़ा व्यवहार तैन्हांं मैहणुवां सैयि ठीक कांना शुरू करि दींतै, जै सच्चाई पन चलतै पण बुराई ना कातै। असै रंग-रली, नशैबाजी, व्यभिचार जां भोग-विलास झगड़ै जां जलन कांना किना दूर रिय्हा। 14पण प्रभु यीशु मसीह तुवाड़ा कवच बणि गहिया, जेनि ला तुवाड़ी रक्षा भौ सकिया, जां पापी स्वभावेरी ईच्छाय पूरी कांनेरी कोशिश मेईं करा।
Currently Selected:
रोमियो 13: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
