रोमियो 11
11
इस्राएल पन परमेश्वरेरी दया
1ऐठणीरै तेईनी आंउ पुछता, कि क्या परमेश्वरै अपड़ै मैहणु छडि दित्तै? बिल्कुल ना! आंउ बि ता इस्राएलि आ। अब्राहमेरै वंशा बिन्यामीनेरै गौत्रा मझां आ। 2परमेश्वरै सैक्यै अपड़ै मैहणु ना छडै, जै तेनी पेहिलै किना चुणी लियौरै अत्तै; तुहां पता कि पवित्र शास्त्र ऐलिय्याह भविष्यवक्तेरै बारै मझ बोलता; सैक्या इस्राएलि मैहणुवां केरी परमेश्वरा सिंउ शिकायत काता। 3तेनी बौलु, प्रभु तैन्हैं तिंडै भविष्यवक्तै मारी छडोरै अत्तै जां तिंडि वेदी बि नष्ट करि छडि; सिर्फ आंउ-ऐ अक मैहणु आ, जै ऐम्हियां बि ताउ पिचोरै चलौरा जां सैक्यै मूं बि माना चांहथै अत्तै। 4पण परमेश्वरै ऐलिय्याह सिंउ बौलु, “मीं अपड़ै तेईनी सत्त हजार मैहणु रखि छडोरै अत्तै, जैन्हैं झूठै बाल देवतैरी अराधना ना की।” 5ऐहियें-चारै इस टैंमा बि परमेश्वरेरै अनुग्रह ला, ऐन्हां यहूदिया मझां कुछ मैहणु परमेश्वरै अपड़ै सच्चा मैहणुवां केरै रूपा मझ चुणै। 6परमेश्वरै सैक्यै अनुग्रहरै कारण चुणोरै अत्तै। ऐ भलै कंम कांने ला ना भूं। अगर कंमा केरै कारण भौरू भूंतु भुईं ता फिरी अनुग्रह कोस कंमैरा ना थ्या भूंणा।
7ऐनि कारणै इस्राएलियै परमेश्वरा सेईतै धर्मी बंणनैरी कोशिश की। पण सैक्यै सफल ना भुवै। पण जै मैहणु परमेश्वरै चुणोरै थ्यै, सैक्यै तैस सिंउ धर्मी बंणी ग्यै। होरै मैहणु जिद्दी बंणा दित्तै जां परमेश्वरेरी गल शुणना किना नमां करि दित्ता। 8जिहीं यशायाह भविष्यवक्तेरी किताबि मझ लिखोरू आ; कि परमेश्वरै तैन्हांंनि सुस्त दिमाग दितौरा, तैन्हांंनि ऐतियै टीरै दित्तै, ताकि सै तका ना सकिया जां ऐतियै कंन दित्तै, जै शुणि ना सकींथ्यै; जां ऐहै हाल आज तेईनी आ। 9जां राजा दाऊद बोलता कि आंउ विनती काता कि तैन्हांं मैहणुवां केरै आशीर्वाद बस तैन्हांं ढ़ढै गांहणैरा कारण बंणिया कि तैन्हांंनि मुसीबती जां सजा मेईया। 10तेन्हेरै मंना मझ बि अन्धारू भौ गहिया ताकि सै सच्चाई ना जांणि सकिया जां सैक्यै लगातार बौझै थल्लै दबियोरै जां मुश्किलियै मझ पियौरै रिय्हा।
11ता आंउ पुछता; कि क्या यहूदी मैहणु ठौकर लगणेरी वजहि हमेशा तेईनी नाश भौ गियोरै अत्तै? बिल्कुल ना! पण तेन्हैरै अविश्वासेरी वजहि ला होरनियां जातियनि उद्धार मैआ, ताकि इस्राएलेरा मैहणुवंनी जलन भुईया। 12अगर इस्राएलेरै मैहणुवां केरा अविश्वास संसारेरी होरनियां जातिया केरी भलाईरा कारण बंणता, ता इस्राएलेरा मैहणुवां केरू परमेश्वरा किनि वापस ऐईंणु सच मझ होरनियां जातिया केरै तेईनी बड़ी जादी आशीषै मेईं गांहणी।
कलम कांनेरा उदाहरण
13आंउ तुहां होरनियां जातिया सिंउ ऐ गलै बोलता। हलाँकि आंउ होरनियां जातिया केरै तेईनी खास चैला, तांबि मूं अपड़ि सेवकाय पन घमण्ड कांना। 14ताकि किहीं-चारै बि आंउ अपड़ा मैहणुवां मझ जलन पेईदा करि सकूँ जां तैन्हांं मझां बड़ा मैहणुवां केरा उद्धार कराउं। 15केईनी कि अगर इस्राएलेरै मैहणुवां केरै जरियै परमेश्वरैरा इन्कार कांना, मैहणुवां केरै मेल-मिलाप कांनेरी वजह भुई, ता जेख्णी तैन्हांं यीशु मसीह, मसीहरै रूपा मझ ग्रहण कांना, ता तेसैरा नतीजा ऐतिया भूंणा, जिहीं कि परमेश्वर तैन्हांं मरि गांहणा किना दुबारे फिरी जीवित काता।
16आंउ यहूदिया केरै बारै मझ अक उदाहरण दींता। ऐ असु यहूदिया केरा रिवाज आ, कि जेख्णी असै रोटी बंणाणेरै तेईनी आटु गुन्हथै, ता असै परमेश्वरानि दींणेरै तेईनी मुट्ठी भर आटु लींतै। अगर सैकेई अक मुट्ठी परमेश्वरेरी आ, ता ऐसेरा मतलब आ कि पूरू आटु बि तेसैरू आ; अगर बुट्टेरी सीरै परमेश्वरेरी अत्ति, ता डाई बि तेसैरी अत्ति। 17इस्राएलेरै मैहणु एकि अच्छु जैतूनेरू बुट्टेरी डाईया सैयि अत्तै जां असेड़ै पूर्वज अब्राहम, इसहाक जां याकूब तैस बुट्टेरी सीरै सैयि अत्तै। जां तुवे होरनियां जातिया केरै मैहणु जंगली जैतूनेरू बुट्टेरी डाईया सैयि अत्तै, जैन्हेरी जंगली जैतूनेरू बुट्टा पना बढि करि अच्छु जैतूनेरू बुट्टा पन कलम क्यौरी आ। अबै तुवे यहूदिया किना तिहियें-चारै फायदा लींतै, जिहीं कि जंगली जैतूनेरी डाई अच्छै जैतूना किना खुराक लींती। 18तु तैन्हांं डाईया केरै बारै मझ जै बढोरी थी घमण्ड मेईं काता; जां अगर तु घमण्ड करिया, ता याद रखै कि तु सीरै ना पाअता, पण सीरै ताउ पाअती अत्ति। 19तुवे शायद बोलि सकतै, कि “परमेश्वरै यहूदी तैन्हांं डाईया सैयि अस्वीकार करि दित्तै, जै बुट्टा किना छांटियुंती, ताकि सै होरनियां जातिया स्वीकार करि सकिया, जै तैन्हांं डाईया सैयि अत्तै, जै कलम करि लाउरै अत्तै।”
20ऐ सच आ कि सैक्यै तेन्हैरै अविश्वासै ला छांटियोरी अत्ति, पण तु विश्वासै ला बंणौरा रींहथा, ऐठणीरै तेईनी घमण्डी मेईं बंणै, पण डर मन। 21अगर परमेश्वरै अपड़ि पेहिलिया डाईया पन दया ना की, ता तैस तुहां पन बि दया ना कांनी।
22ऐठणीरै तेईनी तु परमेश्वरैरी दया जां गुस्सा याद कर। तेसैरा गुस्सा तैन्हांं केरै तेईनी आ, जै अविश्वासेरै कारण गिरी गियोरै अत्तै, पण तेसैरी दया तिंडै तेईनी आ। ऐठणीरै तेईनी तुवे तेसैरी दयाय मझ बणि रिहा, नता तु बि बढि सुटणा। 23अगर इस्राएलेरै मैहणु बदली करि विश्वास करिया, ता सैक्यै वापस बुट्टा मझ दुबारे फिरी ला दींणै; केईनी कि परमेश्वर तैन्हांं दुबारे जौड़नेरै तेईनी सामर्थी आ। 24कोसक्यै जंगली डाईरू कोसक्यै अच्छु बुट्टा पन लगणु आसान ना। जां तुवे जै यहूदी नत्तै ना सैक्यै एकि जगली जैतूनेरू बुट्टा किना बढोरी डाईया सैयि अत्तै जां एकि अच्छु जैतूनेरू बुट्टा पन लाउरै अत्तै। पण सैक्यै यहूदी एकि डाई सैयि अत्तै, जै तैस अच्छी डाई सैयि अत्तै जै अच्छु बुट्टा किना मोटियोरी थी, सही मझ सैकेई दुबारे फिरी अपड़ु तैस बुट्टा सिंउ मिलाई सकती।
सारै इस्राएलेरा उद्धार
25मिंडै विश्वासी भाईयो, आंउ चांहथा कि तुवे ऐस भेदा जांणा, ताकि तुवे अपड़ै बारै मझ घमण्ड ना मैहसूस करिया। हे भाईयो किहींक्यै ऐतियु न भुईया कि तुवै अपड़ै आपानि बुद्धिमान समझि लिया आंउ न चांहथा कि तुवे ऐस भेदा किना अणजांण रिहा कि होरी जाति पूरी रीति सेईतै प्रवेश न करेली तां तेईनी इस्राएलेरा अक भाग ऐत्तिया कठोर रींहणा। 26जां ऐसै रीति सेईतै पूरा इस्राएल उद्धार पाला जै ऐहीं लिखोरू आ कि छडाणै वा सिय्योन किना ऐईला जां अभक्ति याकूबा किना दूर करैला। 27जां तैन्हांं सेईतै मिंडा ऐक्या वायदा भौला जेख्णी आंउ तेन्हैरै पाप माफ करैला।
28यहूदी परमेश्वरेरै दुशमण अत्तै, केईनी कि सैक्यै खुशखबरी पन विश्वास ना कांना चांहथै जां ऐ तुहांनि फायदा भौ गियौरा। पण परमेश्वर तैन्हांं सिंउ प्रेम काता, केईनी कि तेनी सैक्यै अपड़ै तेईनी चुणी लियौरै अत्तै। ऐस गलैरा तेनी तेन्हैरै पूर्वजा सिंउ वायदा क्यौरा थ्या। 29केईनी कि परमेश्वर अपड़ै अनुग्रह, जां बुलाहटी ला कदि बि अपड़ा मंन ना बदलता। 30केईनी कि जिहीं होरियै जातियै पेहिलै परमेश्वरेरी आज्ञा न मनि, पण ऐम्हियां इस्राएलि मैहणुवां केरी आज्ञा ना मनणै ला तुहां पन दया भुई। 31तिहियें तैन्हैं बि अबै आज्ञा ना मनि कि तुहां पन जै दया भूंती आ, ऐनि ला तैन्हांं पन बि दया भुईया। 32परमेश्वरै सभनियांनि आज्ञा ना मनणेरै पापा मझ फसणा दित्तै, केईनी कि सैक्या सभनियां पन दया लुहाना चांहथा थ्या।
परमेश्वरेरी स्तुति
33अहा! परमेश्वरेरै अनुग्रहरा धन, बुद्धी जां ज्ञान सच मझ बड़ा महान आ। कोई बि तेसेरै फैसला केरै बारै ना शुणा सकता; जां ना कौ तेसेरी बत्तेरी समझ करि सकता। 34जिहीं पवित्र शास्त्रा मझ लिखोरू आ; “कोई बि ना जांणता कि प्रभु किहीं सौचता, जां कोई बि तेसनी सलाह ना दी सकता। 35जां कुनिक्यै परमेश्वरानि किछ ना दित्तु, कि परमेश्वरा तेसनी सै वापस दींणु पुईया।” 36केईनी कि सभ-किछ परमेश्वरा किना ऐईंतु। जां सभ-किछ तेनियें बंणाउरू आ जां सभ तेसैरूवै आ। तेसनी हमेशा आदर मेईया। आमीन।
Currently Selected:
रोमियो 11: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
