प्रेरितों के काम 3
3
लट्टा भिखारी ठीक कांना
1अक धियाड़ी पतरस जां यूहन्ना धियाड़िरै त्रियें बजै प्रार्थनायरै टैंमा मंदरानि गांहथै थ्यै। 2मैहणुवें अक मैहणु नींणा लाउरा थ्या, जै जन्मा किना लट्टा थ्या। सै तैस रौज अंणि करि मंदरा मझ एकि सुन्दर, नाँईयेरै फाटका किनि रखि छडींथ्यै, जां सै मंदरा मझ गांहणारै मैहणुवां किना भिख मगींथ्या। 3जेख्णी तेनी पतरस जां यूहन्ना मंदरानि गांहथै लधै ता तैन्हांं किना पेईंसेरी भिख मगि। 4पतरसा जां यूहन्नेरी नजर सिधि तैस पन पैई। पतरसै बौलु, “असु धेरै तका।” 5सै किछ तैन्हांं किना लींणेरी भायि मझ बड़ै ध्यान सिंउ तैन्हांं धेरै हैना लगा।
6तां पतरसै बौलु, “मूं किनि ना ता चांदी आ ना सुन्ना। मूं किनि जै किछ आ, तैस आंउ ताउनि दींता; नासरत वासी यीशु मसीहरू नाँ लै-करि उठ जां चल फिर।” 7जां पतरसै तेसैरा सुमला हत्थ पकड़ी करि सै खड़ा उठाआ, ता तेसै टैंमा तेसेरै पैयिड़ जां जेणु ठीक जां मजबूत भौ ग्यै। 8सै उटकि करि खड़ा भौ ग्या जां हँठणा लगा। सै हँठि करि उटकता जां परमेश्वरेरी स्तुति काता तैन्हांं सिंउ मंदरेरै आंगणा मझ या। 9सारै मैहणुवें सै हंठता जां परमेश्वरेरी स्तुति काता तका। 10मैहणुवें सै परयांणी ल्या कि ऐ सै आ जै मंदरेरै सुन्दर फाटका पनि बेशि करि भिख मगींथ्या, जां ऐ तका करि कि ऐस सिंउ ऐ कितु भूं सै ऊईंयै हरशुन भौ ग्यै।
11जेख्णी सै मैहणु पतरसा जां यूहन्ने पकड़ी करि बेठौरा थ्या, ता सारै मैहणु हैरान भौ-करि तैस जगायनी जैसनि सुलेमानैरा बिरांडा बोलतै, तैस धेरै खिट दी-करि यै। 12पतरसै ऐ तका करि मैहणुवां सिंउ बौलु, “हे इस्राएलि भाईयो! तुवे ऐस मैहणु सिंउ जै भूं तैस तका करि केईनी हैरान भूंतै अत्तै, तुवे असु धेरै केईनी घूंरी करि तंकातै अत्तै, समझा कि असुवें ऐक्या अपड़ि शक्ति जां परमेश्वरेरी भक्ति ला ऐ चलणा-फिरनेरै काबिल बंणा।” 13असेड़ै पूर्वज अब्राहम, इसहाक, जां याकूबेरै परमेश्वरै अपड़ै सेवक यीशुरी महिमा की, पण तुहैं तैस मांनेरै तेईनी सै रोमी अधिकारिया केरै हवालै करि दित्ता जां जेख्णी पिलातुसै तैस छडणैरी गल की ता तुहैं पिलातुसेरै सांमणै यीशुरा नमां केया। 14तुहैं यीशु छडणेरै तेईनी नमां केया जै धर्मी जां पवित्र थ्या। जां तुहैं बौलु कि तुवाड़ै तेईनी एकि खून कांनारै मैहणु छडि दिया। 15जां जै मैहणुवंनी अनन्त जीवन दींता सै मारी छडा, ऐ सैहै मैहणु आ जै परमेश्वरै मौरा मझां दुबारे जींता केया, ऐस गलैरै असै गवाह अत्तै। 16यीशुरै नाँ मझ जां विश्वासेरै कारण ऐस मैहणु जैस तुवे तंकातै अत्तै जां जांणतै बि तेनी शक्ति दित्ती। तेनिऐ विश्वासै ला जै यीशु मझ आ, ऐक्या तुहां सभनियांं केरै सांमणै बिल्कुल ठीक भौ ग्या। जिहीं कि तुवे सभ ऐस ऐपुवै तका सकतै।
17अबै हे भाईयो! मूं पता कि तुहां जां तुवाड़ै अगुवे ऐ यीशु अंणजाणै मझ मारी छडा, केईनी कि तुहां ना थ्या पता कि सै मसीह थ्या। 18पण जै गलै परमेश्वरै सभनियांं भविष्यवक्ता केरै जरियै पेहिलै शुणाउरी थी, कि मसीह दुख सैहणा जां सै मारी छडणा; तैन्हैं ऐ गलै सच करि-करि लुहाई। 19ऐठणीरै तेईनी पापा किना मंन फैरा जां परमेश्वरै धेरै वापस ऐईछा कि सै तुवाड़ै पापा मिटा दिया, जेनि ला प्रभुरी तरफ सिंउ आरामैरा टैंम ऐईछिया। 20जां तैस यीशु भेईजणा, जां सैहै मसीह आ जै परमेश्वरै तुवाड़ै तेईनी चुणी लियौरा। 21यीशुरू स्वर्गा मझ त्यो-तेईनी रींहणु जरूरी आ, जेख्णी परमेश्वरा सै सारी चीजै दुबारे नंउवी बंणा छडणी जै तेनी बंणाउरी थी, बड़ै टैंम पेहिलै परमेश्वरै मैहणुवंनी ऐ शुणाणेरै तेईनी पवित्र भविष्यवक्ता केरै जरियै ऐतिया वायदा केया। 22जिहीं कि मूसै बौलु, “प्रभु परमेश्वरा तुवाड़ै भाई मझां तुवाड़ै तेईनी मूं सैयि अक भविष्यवक्ता भेईजणा जां जै किछ तैस तुहां सिंउ बोलणु, तेसैरा पालन करै।” 23पण जै कौ मैहणु तैस भविष्यवक्तेरी गलैरा पालन ना काता, तेसैरा मैहणुवां मझां नाश करियूंणा। 24शमूएल किना लै करि हरेक भविष्यवक्तै जेसेरै बारै मझ बोलोरू आ सै आज भूंतु आ, तैन्हैं सभनियें ऐकेई गलै लाष्टिया धियाड़िया जै भूंणु आ तेठणिरै बारै मझ शुणाउरी अत्ति। 25तुवे सभ भविष्यवक्ता केरी अउलादि जां तैस वायदेरै सहभागी अत्तै, जै वायदा परमेश्वरै असेड़ै पूर्वजा सिंउ क्यौरा। जेख्णी परमेश्वरै अब्राहमा सिंउ बौलु कि, “तिंडै वंशा किना जै पुत्र भूंणा, तेनी ला सारै संसारेरी जातियनि आशीष मेईंणी।” 26परमेश्वरै अपड़ा सेवक मौरा मझा जींतैरी करि सभनियांं पेहिलै तुहां किनि भेईजा, कि तुहां मझां सारै जंणै बुरै कमैं वा जीवन छडि दिया ताकि तुहांनि आशीष मेईया।
Currently Selected:
प्रेरितों के काम 3: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
