प्रेरितों के काम 24
24
फेलिक्सेरै सांमणै पौलुस
1पंजा धियाड़िया किना बाद हनन्याह महायाजक किछ वुजुर्गा जां तिरतुल्लुस नाँईयेरै एकि बकीला सेईतै कैसरिया नगरा एईछी पुज्जा; तैन्हैं राज्यपालेरै सांमणै पौलुसेरै खिलाफ दोष पत्र समझा। 2जेख्णी पौलुस शदा तां तिरतुल्लुस तैस पन दोष लाकरी बोलणा लगा, “हे महाप्रतापी फेलिक्स, तिंडै शासना मझ बड़ै टैंमा किना शांत महौल बणि रिय्हा जां तिंडि बुद्धी ला ऐस देशा मझ केत्थरी बधिया गलै योउरी अत्ति। 3राज्यपाल फेलिक्सैरा, असै हर जगाय जां हर तराहि सिंउ धन्यवाद करि-करि दिल सेईतै आदर कातै। 4पण ऐठणीरै तेईनी कि आंउ तिंडा ज्यादा टैंम ना लींणा चांहथा, आंउ तांउ सेईतै विनती काता, कि मिंडै तेईनी दयालु रैह जां मेहरबानि करि-करि असेड़ि दो अक गलै शुणि लै।
5केईनी कि असै ऐ मैहणु उपद्रव काता तका जां संसारेरै सारै यहूदिया मझ मतभेद जां पन्गै करांणार, जां ऐक्या एकि दलैरा अगुवा बि आ जैसनि नासरी बोलतै। 6सै मंदरा अशुद्ध कांना चांहथा थ्या, जां असुवें सै पकड़ी करि बन्दी बणा ल्या। असै तेसनी अपड़ै रीति-रिवाजेरै अनुसार दण्ड दितौरा भूंता; 7पण पलटनिरै सरदारै लुसियासै अईछी करि सैक्या जबर्दस्ती असेड़ै हत्था किना हरि नियां, 8जां जैन्हैं ऐस पन दोष लाईथ्या तेन्हांनि तिंडै सांमणै ऐईंणनी आज्ञा दित्ती। ऐ सभ गलै जेसेरै बारै मझ असै तैस पन दोष लांतै अत्तै, तांउ ऐपुवै तेसैरी जांच पड़ताल करि-करि सारी सच्चाईया केरा पता लगी गांहणा।”
9यहूदियै बि तैस बकीलेरा साथ दीकरी बौलु, ऐकेई गलै जिहीं तेनी बोलोरी अत्ति सै सच अत्ति।
फेलिक्सेरै सांमणै पौलुसैरा उत्तर
10जेख्णी राज्यपालै पौलुसनी बोलणनी इशारा केया ता तेनी उत्तर दित्ता: “आंउ ऐ जांणीकरी कि तु बड़ै साला किना ऐस देशेरै मैहणुवां केरा न्याय काता, जां ऐठणीरै तेईनी आंउ आनन्द सेईतै अपड़ा उत्तर दींता।” 11तु ऐपु ऐ पता करि सकता, कि जेख्णी किना मूं यरूशलेम मझ अराधना कांनानि मंदरा मझ यौउरै बाहरा धियाड़िया किना ज्यादा टैंम ना भुआ। 12जां ऐन्हैं ना आंउ मंदरा मझ ना यहूदी सभा घरा मझ, ना नगरा मझ कोसक्यै सिंउ वाद-विवाद काता या नगरा मझ शान्ति भंग काता हैरा; 13जां नंता ऐ तैन्हांं गला, जैन्हां केरै बारै मझ ऐ मूं पन दोष लांतै अत्तै, तिंडै सांमणै तैन्हांं सच साबित करि सकतै। 14पण ऐ आंउ तिंडै सांमणै मनि लींता, कि आंउ मसीहरी बत्तैरी याद दिवांता यहूदी मैहणु ऐसनि कुबत्त बोलतै, तेसै रीति पन आंउ अपड़ै पूर्वजा केरै परमेश्वरेरी पूजा काता; जां जै गलै व्यवस्थाय जां भविष्यवक्ता केरी किताबि मझ लिखोरी अत्ति, तैन्हांं सभनियांं पन विश्वास काता। 15जां परमेश्वरा किना आशा रखता जै सेक्यै ऐपु बि रखतै, कि धर्मी जां अधर्मी दोईयो परमेश्वरा मौरा मझां जींतै कांने। 16ऐसै नजरियै सिंउ आंउ बि परमेश्वरा जां मैहणुवां दोईयो केरै सांमणै हमेशा अक सही स्वाभाव बणा रखणनि भरपूर कोशिश काता।
17मत्तै साला बाद आंउ अपड़ै गरीब मैहणुवंनी उपहार दींणा, जां परमेश्वरानि बलिदान चाढ़ना यरूशलेम शहरा मझ यौउरा थ्या। 18तेसै टैंमा जेख्णी आंउ ऐ काता थ्या तैन्हैं आंउ मंदरा मझ शुद्ध भूंणै बाई रीति पूरी कांना बाद हैरा, तैठि ना कोई भीड़ थी जां ना ऐ किछ हूला थ्या। तैड़ी आसिया प्रदेशेरै किछ यहूदी मैहणु थ्यै जैन्हैं गड़बड़ी वा महौल बणाईथ्या। 19अगर मीं किछ गलत क्यौरू थियु, ता तैन्हांं मूं पन आरोप लांणेरै तेईनी ऐड़ि तिंडै सांमणै खड़ै भूंणु चेहिंथु थियु। 20या ऐ मैहणु, जै ऐड़ि खड़ै अत्तै, ऐपुवै शुणां दिया कि जेख्णी आंउ सभायरै सांमणै खड़ा भौरा थ्या ऐन्हैं मूं मझ केणुहां त्या अपराध हेथिया? 21अक ऐ आरोप आ जै ऐक्यै मिंडै खिलाफ सच मझ ला सकतै, सै ऐक्या आ कि जेख्णी मीं तेन्हैरी उपस्थिति मझ जौरै-जौरै बोलथियु, “आज मिंडा तुवाड़ै सांमणै फैसला भूंता, केईनी कि आंउ विश्वास काता कि परमेश्वरा सैक्यै मैहणु जै मरि गियोरै अत्तै सै दुबारे जींतै कांने।”
22राज्यपाल फेलिक्स जै ऐस प्रभुरी बत्तै किना अच्छी तराहि सिंउ बाकम थ्या, सभनियांंनि ऐ बोलि करि दूर भेईजा, कि “जेख्णी पलटनिरा सरदार लूसियास ऐईला, तां तुवाड़ी ऐस गलैरा फैसला करैला।” 23जां तेनी सूबेदारानि आज्ञा दित्ती, कि पौलुसा सिपाहिया केरी निगरानि मझ रखा, पण तेसनी योउती तैई छूट जरूर दैई कि तेसेरै यारा दोस्ता, तैस सिंउ मिलणा जां तेसैरी सेवा पांणी कांना किना मेईं रौकतै।
पौलुसेरी फेलिक्स जां तेसेरी लाड़ी सिंउ गलबात
24किछ धियाड़िया किना बाद राज्यपाल फेलिक्स अपड़ि लाड़ी द्रुसिल्लाय, जै यहूदी थी, सेईतै लैकरी अईछी पुज्जा, जां पौलुस शदवाकरी तैस किना यीशु मसीहरै विश्वासेरै बारै मझ शुणु। 25जेख्णी पौलुसै, धार्मिकता, आत्मिक सब्र जां परमेश्वरेरै द्वारा ऐईंणै बाऐ न्यायरे बारै मझ चर्चा शुरू की, तेख्णी फेलिक्स डरि ग्या जां उत्तर दित्ता, कि “ऐम्हीं ता तु गा; टैंम कढि करि मूं फिरी तु शदा लींणा।” 26हलाँकि फेलिक्स तैन्हांं गला केरै बारै मझ डरींता थ्या जै पौलुसै बोलोरी थी; फिरी बि सैक्या अक्सर तैस शदाईंथ्या जां तैस सेईतै गलै करींथ्या। केईनी कि सै सोचींथ्या कि पौलुसा जैल्ही किना भेईर निकूंणेरै तेईनी किछ पेईंसै दैला। 27पण जेख्णी दो साल बीति ग्यै, तां फेलिक्सेरी जगाय पुरकियुस फेस्तुस राज्यपाल बणीं ग्या, जां फेलिक्सै यहूदिया खुश रखणेरै तेईनी पौलुस जैल्ही ऐ मझ रींहणा दित्ता।
Currently Selected:
प्रेरितों के काम 24: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
