प्रेरितों के काम 18
18
कुरिन्थुस नगरा मझ पौलुस
1ऐठां बाद पौलुस एथेंस शहरा छडि करि कुरिन्थुस शहरा मझ या। 2जां तेन्हांनि तैठि अक्विला नाँईयेरा अक यहूदी मैहणु मैआ, जेसैरा जन्म पुन्तुस प्रदेशा मझ भौरा थ्या; जां कुछ टैंम पेहिलै ऐ अपड़ि लाड़ी प्रिस्किल्ला सिंउ इटली प्रदेशा यौउरा थ्या, केईनी कि सम्राट क्लौदियुसै सारा यहूदियनी रोम देशा किना निकोहि गांहणैरी आज्ञा दितोरी थी, जां पौलुस तैन्हांं सिंउ मिलणनी ग्या। 3जां पौलुस, अक्विला जां प्रिस्किल्लैरा अक्कै धन्धा थ्या; ऐठणीरै तेईनी पौलुस तैन्हांं सिंउ बेठा जां कम कांना शुरू केया, सै दोईयो तम्बु बणांणार थ्यै। 4जां पौलुस हर आरामेरी धियाड़ी यहूदी सभा घरा मझ वाद-विवाद करि करि यहूदिया जां यूनानियां बि यीशु मसीह पन विश्वास कांनेरै तेईनी राजी कराईंथ्या।
5जेख्णी सीलास जां तीमुथियुस मकिदुनिया प्रदेशा किना यै, ता पौलुसै तम्बु बणांणै छडि दित्तै जां अपड़ा सारा टैंम वचन शुणांणा मझ जां यहूदिया मैहणुवां केरै सांमणै ऐ गवाहि दिईंथ्या कि यीशु ऐ सै मसीह आ। 6पण जेख्णी यहूदी मैहणु पौलुसेरै खिलाफ निंदा कांना लगै, ता तेनी अपड़ै लिकड़ा किना धूड़ झाड़ी करि तैन्हांं सिंउ बौलु “परमेश्वरैरा संदेश ना मनि करि तुवे ऐपुवै तैस सजायरै जिम्मैवार अत्तै जै सजा तुहांनि परमेश्वरा दींणी! आंउ निर्दोष आ। अबै मूं गांहणु जां होरनियां जातिया मझ खुशखबरिरा प्रचार कांना।”
7जां अराधनालय किना चलि करि, पौलुस, तीतुस यूस्तुस जै परमेश्वरेरी अराधना करींथ्या, जां होरनियां जातिया मझां थ्या, तेसेरै घरै गहि करि होरनियां जातियनि शिख्राउ, तेसैरू घर अराधनालय सेईतै थियु। 8तां यहूदी सभा घरेरै सरदारै क्रिस्पुसै अपड़ै पूरै परिवारै समैत प्रभु पन विश्वास केया; जां बड़ै सारै कुरिन्थ शहरा मझ रींहणारै मैहणुवें बि शुणि करि विश्वास करि-करि बपतिस्मा ल्या। 9जां अक रात प्रभु दर्शन दी-करि पौलुसा सिंउ बौलु, “अबै मेईं डरै, वचन प्रचार काता गा, जां चुप मेईं रेही; 10केईनी कि आंउ ताउ सेईतै आ, कोसेरै बोलै बि ताउ पन हमला जां तिंडा नुकसान ना करियूंणा; केईनी कि ऐस शहरा मझ बड़ै सारै मैहणु मिंडै अपड़ै अत्तै।” 11ऐठणीरै तेईनी पौलुस तैन्हांं मझ परमेश्वरैरा वचन शिख्रांता डेढ़ी साला तेईनी रिय्हा।
12जेख्णी गल्लियो अखाया प्रदेशेरा राज्यपाल थ्या ता यहूदी मैहणु किट्ठी करि पौलुसेरै विरोधा मझ खड़ै भौ ग्यै, जां तैस अदालती मझ लै गियै जां बोलणा लगै; 13तैन्हैं तैस पन ऐक्या दोष ला कि “ऐ मैहणुवां समझांता कि परमेश्वरेरी अराधना ऐसै रीति सेईतै करा जै बिल्कुल यहूदी व्यवस्थायरै खिलाफ आ।” 14जेख्णी पौलुस अपड़ै बचावेरै तेईनी किछ बोलणै वा थ्या, ता गल्लियो राज्यपालै यहूदिया सेईतै बौलु, “हे यहूदियो, अगर ऐ अन्याय या कुछ अपराधैरी गल भूंती तां सही थियु कि आंउ तुवाड़ी गल शुंणता भुईं। 15पण तुवे व्यवस्थायरिया गला जां नाँईयां केरै बारै मझ झगड़ा कातै अत्तै, तुवे जांणा केईनी कि आंउ ऐन्हां गला केरा इन्कार ना काता।” 16जां गल्लियो बाऐ तेन्हांनि आदेश दित्ता कि सै तैन्हांं अदालती किना कढि दिया। 17तां मैहणुवें यहूदी सभा घरैरा मुखिया सोस्थिनेस पकड़ी करि अदालतिरै सांमणै मारा। पण गल्लियो राज्यपालै ऐन्हां गला केरी किछ बि चिंता ना की।
अन्ताकियेनि वापस ऐईंणु
18फिरी पौलुस बड़ा धियाड़िया तेईनी कुरिन्थुस शहरा मझ रिय्हा, फिरी पौलुस विश्वासिया भाईयनी आ बेशा करि-करि किंख्रिया शहरानि चलि ग्या, तैठि तेनी अपड़ु शिर मुनंउ, केईनी कि तेनी बंन्धा क्यौरा थ्या जां सै संमुद्री जहाजा पन सीरिया प्रदेशनी चलि ग्या जां तैस सेईतै प्रिस्किल्ला जां अक्विला थ्यै। 19जां तैन्हैं इफिसुस शहरा मझ गहि करि प्रिस्किल्ला जां अक्विला तैठि छडै, जां ऐपु यहूदी सभा घरा मझ गहि करि यहूदिया सेईतै गल-बात कांना लगा। 20जेख्णी मैहणुवें पौलुसेरै छंन्दै क्यै कि “तु असु सेईतै कुछ धियाड़ि हौरा बेश।” पण पौलुस ना मना; 21पण पौलुस ऐ बोलि करि चलि ग्या कि, “अगर परमेश्वरै मौका दित्ता ता मूं तुहां किनि फिरी ऐईंणु।” तां सै इफिसुस नगरा छडि करि संमुद्री जहाजा पन आघै चलि गियै; 22जां कैसरिया नगरा किना यरूशलेम शहरानि ग्या जां तैठि कलीसियेरै मैहणुवां सिंउ मिलिकरी हैट अन्ताकिया नगरा मझ या।
पौलुसेरी त्रीं प्रचार-यात्रा शुरू
23फिरी कुछ धियाड़ी रैही करि सै अन्ताकिया शहरा किना होरी जगायनी चलि ग्या, जां एकि तरफि सै गलातिया जां फ्रूगिया प्रदेशा मझ सारा चैलानि मजबूती दींता फिरा।
अपुल्लोस नाँईयेरा ज्ञानि मैहणु
24तैस टैंमा अपुल्लोस नाँईयेरा अक यहूदी मैहणु थ्या, जेसैरा जन्म सिकन्दरिया शहरा मझ भौरा थ्या, जै अक ज्ञानि जां वक्ता थ्या जां पवित्र शास्त्रा बड़ै अच्छै तरीकै सिंउ जांणीथ्या, सै इफिसुस शहरा मझ या। 25तेसनी प्रभुरी बत्तेरै बारै मझ शुणाउरू थियु, जां मंन ला करि यीशुरै बारै मझ ठीक-ठीक शुणाईंथ्या जां शिख्राईंथ्या, पण सै सिर्फ यूहन्नेरै बपतिस्मैरी गल जांणीथ्या। 26सै यहूदी सभा घरा मझ बिना डरै बोलणा लगा, पण प्रिस्किल्लै जां अक्विलै तेसैरी गलै शुणि, जां तैस अपड़ै घरै लै ग्यै जां परमेश्वरेरी बत्त तेसनी होरी बि सही तरीकै सिंउ शुणाय। 27जां जेख्णी तेनी पक्का मंन बणा ल्या कि पार उतरि करि अखाया प्रदेशनी गांहथा तां विश्वासियै भाईयै सैक्या उत्साहित केया जां चैलानि लिखु कि सैक्यै तैठि तैस सिंउ अच्छै तरीकै सिंउ मिलिया, जां तेनी तैठि पुजि करि तैन्हांं मैहणुवां केरी बड़ी मजत की जैन्हैं अनुग्रहरै कारण विश्वास क्यौरा थ्या। 28केईनी कि अप्पुलोस पवित्र शास्त्रा मझां शक्ति जां कड़ेदम सेईतै वाद-विवाद करि करि यहूदियनी सबूत दीकरी ऐ बलींथ्या कि यीशु ऐ मसीहा आ।
Currently Selected:
प्रेरितों के काम 18: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
